【愛情】如地下情一樣嘅癮，係我對你嘅定義: 71. 分享

「同之前嘅完全唔一樣⋯」黎昕淇感覺到吻嘅變化，唔似之前一樣每一樣都係搶奪一樣，今次比較⋯溫柔

帶嚟安全感嘅擁抱、比佢稍高嘅體溫、令人產生依戀感嘅氣味、唇上難以抗拒嘅觸感，令佢總係輕易被撩起心底嘅癮⋯

微喘而泛紅嘅臉頰、清澈明亮卻喺吻後會染上一層薄霧嘅雙眼、非佢不可嘅眼神、身上微微嘅淡香，如果話唔想據為己有，咁一定係講緊大話⋯

「眼唔眼瞓？」陸修然低聲問道，佢早就睇得出黎昕淇除咗攰之外嘅眼瞓定律

「今日還好。」黎昕淇凝視陸修然嘅雙眸，緩緩眨一下眼





「平時，你都會眼瞓。」陸修然笑一笑，黎昕淇眨一下眼但沉默不語，陸修然微微側頭湊近輕吻一下

黎昕淇將佢嘅左手抽出嚟，雙手喺陸修然嘅頸後交搭着，陸修然冇咁輕易將解藥嘅服用時間結束，今次嘅吻唔會再好似啱啱一樣溫柔，又一次回復到本來嘅程度

陸修然一下子將黎昕淇從枱上抱起走向梳化將佢放低喺梳化上，陸修然側身坐喺梳化邊，上身朝黎昕淇稍微壓落去

黎昕淇冇反抗，曲起雙腳瞓喺梳化上，右手捉住陸修然嘅衫袖，心跳因為緊張而直線上升

「要繼續⋯？」黎昕淇嘗試調整呼吸，輕舔唇後細聲問咗一句





「既然你主動留我，我就唔會咁輕易放過你啦⋯」陸修然俯身壓低聲線道，佢嘅右手將黎昕淇嘅左手㩒喺梳化上

「就知道你係個斯文敗類⋯」黎昕淇喺說話嘅最後一個字講出口後，唇上落下嘅觸感令佢不禁握住拳頭、將陸修然嘅衫袖都捏皺

背住所有人做呢種事，有罪惡感同時又默默覺得刺激，舌尖嘅觸感令人深陷其中，每一次都彷彿加深緊癮嘅深度一樣

⋯

星期六係番工嘅日子，晚市時段一般都比較忙，大家都係冇停手嘅狀態





黎昕淇一直喺廚房嘅出菜區同樓面來回走，基本上一個鐘都冇停過手

「唔該，差一份芝士炸雞。」一台客人喺江清懿行到過去送餐嘅時候順便道

「哦好呀～我幫你睇睇。」江清懿微微點頭，望一眼枱號就番廚房嘅出菜區，「有冇一份芝士？」

「呢度冇。」黎昕淇望住眼前已經有嘅炸雞餐，「差幾多？」

「一份。」江清懿再望多一眼確定，肯定冇後彎腰從出菜口對廚房內嗌：「27差一份芝士！」

廚房內嘅人回覆：「宜家補一份比你！」

「好攰⋯」江清懿雙手㩒喺枱面垂頭稍作休息，「應該完咗呢輪就可以休息下，等收工⋯」

喺差唔多10點嘅時候，喺鋪內嘅客人都離開晒，清潔嘅時間又到





「快手快手～陣間收工啦～」本來仲係好攰嘅江清懿呢一刻突然好精神，哼住歌開水拖地

黎昕淇喺一邊拎住抹枱布抹枱，執好枱上嘅餐具同餐牌，抹到一半都已經忍唔住打喊露

兩人搞掂晒所有嘢之後就換衫走，一行出餐廳門口，黎昕淇就拎出手機，一如既往咁見到宋楚妍分享比佢睇嘅片

「你收工啦？啱啱見到你睇咗」黎昕淇睇到一半就收到宋楚妍嘅message

「你睇住我覆未？」黎昕淇一笑，退回對話紀錄嘅頁面，一如既往冇其他未讀訊息

佢同陸修然嘅對話停留喺前日，大概一望全都係簡單又直接嘅提問，好似冇咩嘢好分享一樣

「你同副會長平時會唔會send message？」黎昕淇好奇咁問江清懿





「好少，就算有都係啲「好」、「嗯」、「知」呢類好直接嘅字。」江清懿稍作思考後道，「大家住喺同一間屋，日日都見住，有咩當面講都可以，都唔洗下下send message。」

「樂時呢？你地會唔會分享下其他嘢？」黎昕淇又問，思考後覺得都係問同女仔有關嘅比較好

「都好少，成日見住好難分享啲咩，大家啲行動軌跡日日都差唔多⋯」江清懿耷低頭合埋眼閉目養神，「冇咩特別嘢值得分享⋯」

「都係嘅⋯」黎昕淇若有所思，微微點一下頭，「日日見都真係冇咩特別要分享嘅嘢。」

「做咩突然間咁問？」江清懿好似察覺到一絲異常一樣問道

「好奇下啫。」黎昕淇搖搖頭

佢同江清懿一齊坐嘅時候，兩人之間永遠都會留有半個拳頭嘅位置；雖然識前，黎昕淇都會相信謠言中嘅江清懿嘅為人，不過真係認識之後會知道佢其實唔係輕浮花心嘅人，雖然佢冇中意邊個

「我落車啦，星期一見。」黎昕淇起身，喺巴士停定前扶住扶手行落下層





黎昕淇番到屋企門口，一打開門行入去已經聽到佢爸媽嘅討論聲

「帶唔帶呢件好？會唔會太重？」「你帶另外嗰件好舊嘅衫，去到著完就掉啦。」

「好呀，你到時放叉電線。」「得啦。」

「咁快執定行李啦？」黎昕淇換上拖鞋行去客廳，客廳同飯廳中間放咗兩個打開嘅行李喼

「過兩日飛啦，宜家仲唔執？」媽媽將衫摺好放入行李喼，「幾日都得你自己咋，你Okay嘛？」

「我？我Okay呀，又唔係第一次。」黎昕淇行番房拎衫去沖涼

「我地去晒旅行，有咩事你搵阿然啦，你兩個都乖乖地食飯啦～」媽媽講道，行到枱前抱起放喺地上嘅芝麻





「你記得放飯餵貓。」爸爸望到芝麻後順口提醒道，「唔好餓住牛奶芝麻呀。」

「知啦知啦⋯」黎昕淇更無奈，佢爸媽嘅心都向住貓，怕佢會唔記得餵貓一樣要認真咁提佢

黎昕淇閂上廁所門，企喺鏡前將髮圈解落嚟，莫名嘆一口氣

「幾日都係得我同阿然⋯」黎昕淇望住鏡中嘅自己喃喃自語，「好似會，好不妙⋯」

⋯

星期一嘅朝早，黎昕淇換好校服，行入廚房打開櫥櫃，喺出門口番學前拎貓糧出嚟餵貓

平日通常都會係佢將貓糧倒喺瓦碗中，然後晚餐就由媽媽負責

「搞掂～出門口！」黎昕淇將膠盒放回原位之後拎起放喺餐枱上嘅書包孭起、行到鞋櫃前著上番學嘅皮鞋就出門口

黎昕淇企喺𨋢門前等𨋢，幸好佢住嘅層數比較高，唔洗同人逼𨋢；𨋢到佢呢層嘅時候停咗落嚟，𨋢門緩緩打開，陸修然企喺角落嘅位置

「早⋯」黎昕淇行入𨋢，㩒咗閂門後行到陸修然身旁




IG Link: https://www.instagram.com/nd_cotttoncandy/?hl=zh-tw