【愛情】如地下情一樣嘅癮，係我對你嘅定義: 70. 噓⋯
「發呆？」陸修然側一側頭，探頭望向黎昕淇
「冇。」黎昕淇嘅嘴微微一撅，以平靜嘅語氣回答，「有啲攰。」
「番去瞓陣。」陸修然嘅背貼喺櫈背上，仰起頭合起雙眼閉目養神
「嗯。」黎昕淇低聲道
黎昕淇垂眸，視線落喺兩人之間嘅距離，佢同陸修然之間嘅距離比平時近，手臂貼住對方呢件事睇起嚟好親近
「一齊放學其實又唔代表啲咩⋯」黎昕淇嘅手將握喺手中嘅手機捏嚟捏去，一唔小心將螢幕長㩒，彈咗另外set嘅wallpaper出嚟
黎昕淇將頁面拉到第三格，上次比陸修然發現嘅合照放咗喺第三格；陸修然睜開眼望向前方，餘光咁啱望到黎昕淇嘅手機螢幕
陸修然沉默不語，只係見到黎昕淇唔小心㩒咗螢幕一下將合照set咗做wallpaper，黎昕淇頓時將wallpaper換番佢本來用緊嘅相
陸修然輕笑一下，明明會慌張但只係將wallpaper嘅次序放後咗
兩人落車後沿路行番屋企，陸修然同黎昕淇喺同一層出去，將黎昕淇送到番屋企門口
「我到啦，你都—」黎昕淇嘅說話講到一半，企喺身後嘅陸修然忽然間提手，將手托喺佢嘅下巴令佢嘅頭微微抬起
黎昕淇擰轉頭望過去，陸修然嘅影子將佢籠罩，唇上嘅觸感係熟悉嘅感覺
黎昕淇將門柄㩒低準備推開門嘅手將門柄鬆開，佢企喺門前轉身望向陸修然
對上一雙明亮卻帶點困惑嘅眼睛，陸修然冇絲毫閃縮，定睛凝視黎昕淇嘅雙眸
「你仲唔番去？」黎昕淇仰頭望向陸修然，「你唔係都眼瞓？」
「還好，冇特別。」陸修然嘅嘴角滲出一絲笑意，好淡、唔明顯嘅笑意，托喺黎昕淇下巴嘅手可以感覺到佢吞口水嘅時候嘅郁動
黎昕淇捉住陸修然嘅手腕輕哼一聲，將佢嘅手從佢嘅下巴拎開；黎昕淇行到門前㩒低門柄開門，行入玄關嘅時候，一黑一白嘅貓即刻跑出嚟企喺鞋櫃邊探頭望，但佢望住嘅係喺門外嘅陸修然
「你係咪番去？」黎昕淇第二次問陸修然
「我冇特別攰。」陸修然從黎昕淇嘅眼神同說話了解句子嘅含意
「哦。」黎昕淇淡然回答，自顧自企喺玄關除鞋
「仲夠精神？」陸修然將大門閂上，蹲低摸一摸芝麻同牛奶
「宜家暫時夠，陣間好難講。」黎昕淇將書包除咗落嚟放喺一邊嘅矮櫈上
黎昕淇翹埋雙手，手臂貼住鞋櫃望住玩緊貓嘅陸修然；陸修然感覺到視線，拍一拍兩隻貓嘅頭後企起身，將書包除低放喺地上靠住牆
兩人沉默不語，黎昕淇一臉高冷咁輕哼一聲就轉身行開；陸修然困惑又無奈，有時黎昕淇嘅心情真係好難觸摸
「去邊度？」陸修然行前一步，伸手拉住黎昕淇嘅手踭將佢拉到自己面前
只要喺咁近嘅距離就可以聞到陸修然身上獨一無二且濃烈嘅味道，黎昕淇覺得大腦都有少少空白
「你係想我喺度陪你發呆，定係想要解藥啦？」陸修然帶住笑意低聲問道
「邊個要你陪？」黎昕淇轉身反駁道，雙手翹埋抱喺胸前，擺出高冷嘅態度問道：「我睇起嚟似要人陪？」
「所以，你係要解藥？」陸修然明知故問，佢明明喺黎昕淇隱晦嘅說話中已經聽出當中嘅意思，但都要問一句
黎昕淇一手捉住陸修然嘅校呔，冇出太多力但都好輕鬆咁將陸修然拉向自己，踮起腳尖湊近陸修然，但喺唇與唇間咁有1cm嘅時候停咗落嚟
「你估下。」黎昕淇用氣音低聲道
陸修然嘅提問，講中咗一半，講唔中一半
面對黎昕淇嘅要求，陸修然直接伸手捏住黎昕淇嘅兩邊臉頰將佢嘅下巴抬起，喺佢水潤嘅唇上直接狠狠錫一啖
只係一下，已經令兩人都有種微喘嘅感覺，陸修然係真係不留情面咁落口，黎昕淇喺陸修然嘅胸口上用拳頭不輕不重咁打咗一下
喺再一次湊近同時，陸修然捉住黎昕淇輕握住拳頭嘅手嘅手腕，拉住佢嘅隻手一齊垂低，左手攬過黎昕淇嘅腰
陸修然嘅大腦未到空白嘅地步，佢稍微思考一下後，將黎昕淇嘅左手捉起，前臂打橫放喺後腰，陸修然嘅手仍然捉住佢嘅手腕冇鬆手嘅打算
黎昕淇靠陸修然同自己嘅右手支撐住微微踮起腳尖嘅自己
被扣住嘅手腕好似發緊熱一樣，或者係因為陸修然嘅手暖、體溫比較高嘅關係
但好快佢就感覺到扣住佢手腕嘅力度消失咗，由手腕移到佢嘅手心，指尖將佢嘅指縫撐開，將佢嘅手緊扣喺佢嘅手心中
黎昕淇感覺自己嘅體溫比啱啱更高，陸修然完全唔比機會佢逃跑，右腳忽然踏出咗一步撞到黎昕淇嘅左腳，黎昕淇嘅左腳自然咁向後踏一步
行咗一步又一步，黎昕淇停低嘅時候係因為感覺到大髀後方掂到餐枱嘅邊；陸修然一步一步將黎昕淇逼近到餐枱前，將佢困喺自己同餐枱之間
枱邊冰涼觸感令黎昕淇下意識縮咗一下，但喺佢面前有陸修然令佢進退兩難，一直踮起腳尖都有啲麻痺冇力
黎昕淇一下子踩到地面，陸修然自然感覺到面前嘅人突然下墜一樣
「冇力堅持咁耐⋯」黎昕淇低聲抱怨道
陸修然微微彎腰，幸好黎昕淇唔重，陸修然好輕鬆就將黎昕淇抱到枱上坐好，一瞬間嘅離地令黎昕淇都未嚟得切有反應
喺黎昕淇反應過嚟嘅時候，陸修然已經湊近，連空氣都冇時間吸一啖
陸修然嘅手鬆開放喺黎昕淇嘅大髀兩旁，黎昕淇放喺後背嘅手無力咁垂低，指尖輕敲喺枱上，手緩緩移到身旁㩒喺枱上，指尖不經意咁搭喺陸修然嘅手指上
陸修然將手移開少少，將佢嘅手由底抽出嚟放喺上面，手嘅位置同黎昕淇交換咗，手蓋喺黎昕淇嘅手上將佢嘅手輕輕握住
黎昕淇嘅指尖微微捲縮起嚟，手背又好手心都好都可以感覺到溫暖，成個人忽然間都變得暖笠笠，或者因為泛紅嘅臉頰⋯
IG Link: https://www.instagram.com/nd_cotttoncandy/?hl=zh-tw