【愛情】如地下情一樣嘅癮，係我對你嘅定義: 61. 約會
「唔係要打機？」陸修然望住坐喺床邊、側身伏喺床上嘅黎昕淇
「嗯。」黎昕淇點點頭，緩緩坐起身，拎起放喺手邊嘅手掣
陸修然坐喺電腦椅上拎住手掣，望住掛喺床尾嘅電視畫面，呢隻game佢買咗番嚟之後幾乎冇玩過，通常都係黎昕淇喺度玩
所以通常只有黎昕淇喺度嘅時候，佢先會開呢隻game，主要係陪黎昕淇玩，只有佢自己一個嘅話，連開都唔會開
玩咗幾場之後黎昕淇已經覺得攰，拎住手掣側身瞓低喺床上面；陸修然將手掣從黎昕淇嘅手中抽走、執好其他嘢，將所有物品歸位
陸修然起身行出房去廁所，喺佢番嚟嘅時候黎昕淇已經喺半瞓著嘅迷糊狀態
「唔⋯」黎昕淇爬起身坐喺床上，睇起嚟仍然好想瞓
「你唔係瞓陣？」陸修然拉開書枱前嘅櫈坐低，坐低同時轉去面向黎昕淇
黎昕淇挪動到床邊跪起，雙手搭到陸修然嘅膊頭上，佢嘅上身已經向前傾，陸修然嚇到即刻伸出手扶住黎昕淇
「你小心。」陸修然輕皺起眉頭，伸手捉住黎昕淇嘅手臂同時坐出咗少少
黎昕淇彎腰低頭錫喺陸修然嘅唇上，只不過陸修然擔心黎昕淇會跌落嚟多啲
一個星期嘅時間太長，呢一星期嘅壓抑都喺呢一刻爆發出嚟，吻與吻之間可以稍微呼吸嘅時候愈嚟愈短、愈嚟愈進取⋯
陸修然伸手攬過黎昕淇嘅腰，起身離開櫈嘅時候將右腳跪到床上，黎昕淇順勢向後坐喺床上，雙手攬住陸修然嘅腰，成個人已經靠住陸修然借力一樣
陸修然一隻手㩒喺床上面，一個星期所壓抑嘅癮連佢都冇察覺到原來有咁多，掛住嬲、掛住鬥氣，都冇察覺到壓抑落嚟嘅癮一直默默累積
佢係佢獨一無二嘅解藥呀⋯點可能可以被輕易取代⋯？
輕微嘅缺氧加上本來已經有嘅倦意，黎昕淇喺久違嘅熱吻後感覺更加疲倦，雙眼已經緩慢咁一眨一眨
黎昕淇側住頭，將額角靠喺陸修然嘅頸窩上，因為信任而將成個人嘅重心都交到陸修然手上
陸修然身上嘅氣味令黎昕淇嘅心好平靜好安心，呼吸逐漸變得平穩起嚟，意識逐漸模糊
「昕？」陸修然輕抱住黎昕淇，見佢好似冇反應於是柔聲叫咗佢一聲
陸修然嘅動作都唔敢太大，只係微微一郁望一望黎昕淇，見到黎昕淇安心咁將佢當成依靠
「又瞓咗⋯成日都眼瞓⋯」陸修然喺心裏無奈道，輕輕咁用指尖將落喺黎昕淇臉頰上嘅髮絲繞到耳後
陸修然悄悄咁再抱多黎昕淇一陣，畢竟黎昕淇喺佢懷中瞓得咁安心
「鬥氣鬥足一個星期都攰啦⋯」陸修然望住懷中乖巧小白兔一樣嘅黎昕淇，嘴角露出一絲唔明顯嘅笑容
佢同黎昕淇之間嘅關係係用三言兩語冇辦法解釋清楚，看似簡單易明嘅關係裏又收起咗一絲複雜
以為可以用字詞去釐清佢地嘅關係，但實際上所以字詞都係比上不足比下有餘⋯
「真係好難觸摸、好難明。」陸修然喺心入面無奈慨嘆
⋯
夜晚
「前嗰排我公司咪抽獎，我抽咗兩張戲飛。」媽媽笑住對爸爸講
「咩戲？」爸爸自然咁問，「同你去睇囉。」
「科幻片嚟，你幾時有見過我睇科幻片？」媽媽反問道，然後放低筷子從餐枱前起身行番房，再番出嚟嘅時候拎住兩張卷一樣嘅長方形紙
「阿然，比你呀。」媽媽將嗰兩張卷放喺陸修然嗰邊，「你同阿昕睇咗佢。」
「吓，阿昕點會睇科幻片呀⋯」陸修然有啲唔太想要呢兩張卷
「你問下阿昕先啦，可能佢去呢。」媽媽游說道，「你拎啦，唔好嘥嘛。」
「哦。」陸修然望住兩張卷有啲無奈
⋯
星期日
黎昕淇推開屋企嘅大門，陸修然已經喺佢門口等緊佢，黎昕淇行到門前閂門，扶住門喺屋企嘅大門前將鞋踭整番好
「你冇戴cap帽？」陸修然問
「我諗你會戴，所以我唔戴cap帽啦。」黎昕淇解釋，然後起身行去㩒𨋢，「呢個鐘數應該唔會撞到人嘅，都6點啦。」
黎昕淇嘅打扮同平時冇咩太大分別，不過今日噴咗之前同宋楚妍一齊買嘅香水
平時兩人好少一齊出門口有食飯以外嘅活動，所以睇戲算係第一次一齊睇
去到戲院之後，因為卷喺陸修然手上，所以黎昕淇企喺一碌粗嘅柱隔離等夠鐘睇戲就夠
「係唔係6點半場？」黎昕淇問朝佢行過嚟嘅陸修然問
「嗯，仲有⋯十分鐘。」陸修然望一眼手錶嘅時分針
「喺度等啦，反正都買咗嘢飲。」黎昕淇嘅手拎住佢喺過嚟嘅時候喺地鐵站就買咗嘅嘢飲
陸修然企喺黎昕淇隔離睇緊手機，大概係覆緊媽媽嘅message；黎昕淇嘅目光偶然落喺門口嗰邊，有兩個女仔行入戲院範圍，黎昕淇一眼就認到係佢地學校嘅人
黎昕淇一秒向左邊行咗兩步企到柱會擋到嘅位置，陸修然望住黎昕淇嘅行為有啲困惑
「呢個鐘數都見到學校嘅人⋯！」黎昕淇一臉難以置信咁講
「邊度？」陸修然四周望，但都冇學校嘅人
「嗰度！」黎昕淇壓低聲線，拉住陸修然微微探頭望向售票處
「係我地學校㗎咩？」陸修然唔太認得嗰兩個女仔，佢平時喺學校都好少留意
「上次人地仲請你食朱古力！嗰幾個女仔入面其中兩個！」黎昕淇擰轉頭對陸修然講道，順手將陸修然嘅帽檐壓低啲，「陣間比佢地見到我同你一齊點算？」
黎昕淇望住嗰兩個女仔拎住戲飛轉身離開售票處，黎昕淇即刻縮番去柱後面
「佢地未必同我地睇同一套戲嘅。」陸修然耷低頭將帽檐拉低
「早知我今日戴cap帽啦⋯！」黎昕淇抬頭一臉後悔咁對陸修然道
「入得啦。」陸修然拍一拍黎昕淇嘅背，朝住唯一著咗燈嘅「1」字抬一抬下巴
IG Link: https://www.instagram.com/nd_cotttoncandy/?hl=zh-tw