【愛情】如地下情一樣嘅癮，係我對你嘅定義: 60. 婉轉
「唔該⋯！」黎昕淇喺禮貌道謝嘅同時抬起頭，望到陸修然嘅臉龐嘅瞬間不禁一愣
「唔洗。」陸修然企起身，將簿疊齊遞比黎昕淇
呢句唔該，係一個星期嘅冷戰中第一句說話，今日嘅事睇起嚟似層相識，曾經喺同一個位置意外相撞、斷咗橡筋、功課簿散落喺地上
黎昕淇默默吞一啖口水，只係冷戰一個星期但睇起嚟好似啱啱先識一樣，連對望嘅勇氣都有啲不足，開口講嘢嘅時候都有啲緊張
一呼一吸間，熟悉嘅氣味喺鼻前飄過，陸修然默默深呼吸，氣味好熟悉，不過最近都冇喺咁近嘅距離聞到
黎昕淇攬住功課簿企喺陸修然面前微微耷低頭，兩人嘅默契大概係冇喺執好嘢同幫完手之後即刻行開各自離去
身後嘅樓梯一直有人從樓下行上嚟，兩個人企喺呢個位有啲顯眼，特別係陸修然喺呢度同黎昕淇一齊
陸修然微微點頭，然後從黎昕淇嘅身旁經過行上樓梯，黎昕淇冇停留喺原位，喺陸修然向左邊行嘅時候，黎昕淇都向佢嘅左邊行，兩人又一次默契咁分開
晏晝食完飯之後，黎昕淇今日終於決定要去會室
「你今日終於要去會室啦？」宋楚妍笑問道，「始終都係慣咗過去啦～」
「想恰一陣，課室太嘈啦⋯」黎昕淇細聲對宋楚妍講道
「陣間上堂見啦～」宋楚妍比咗個Okay手勢
黎昕淇行出課室，行到會室嘅門口輕敲兩下門，然後扭動門鎖推門入去
會室入面只有陸修然一人，陸修然坐喺佢一向嘅主席位，伏低喺枱上似乎小睡緊
黎昕淇行到陸修然隔離嘅座位坐低，陸修然似乎冇留意到黎昕淇入咗嚟會室
「瞓咗⋯」黎昕淇望住側住頭枕喺前臂上瞓嘅陸修然
呢度係大家都中意用嚟瞓晏覺嘅地方，畢竟冇課室咁嘈
黎昕淇伸手輕輕摸陸修然嘅頭髮，又伸手輕戳陸修然嘅臉頰一下，陸修然都冇咩反應
「睇嚟真係瞓咗。」黎昕淇將手縮回
黎昕淇伸手，將指尖放喺陸修然壓喺下面嘅左手上，輕扣住佢因為放鬆而微曲嘅指尖
喺會室內好安靜，但係同只有自己一個人喺屋企嗰陣嗰種安靜唔一樣，呢種柔和嘅氣氛令人嘅內心平靜落嚟
「都唔知係唔係因為佢喺度，所以感覺咁唔同⋯」黎昕淇嘅嘴角小幅度咁微微上揚，佢自己都覺得好奇怪
正當黎昕淇將放喺陸修然手上嘅手提起收回嘅時候，陸修然嘅手指捲縮起嚟，將黎昕淇嘅手扣住喺手中
「你冇瞓著。」黎昕淇講道
陸修然緩緩睜開眼，然後睡眼惺忪咁坐起身，佢本來就冇瞓得好冧，喺黎昕淇開門入嚟會室嘅一刻佢已經醒咗
「你入嚟嘅時候醒咗。」陸修然講道，佢嘅手
陸修然瞓醒，黎昕淇坐喺原位，兩人卻沉默不語，唔知道要點樣開口打破冰牆先啱
「嬲完未？」黎昕淇爽快利落咁問，既然唔知道點樣開口，咁直接講重點就夠
如果陸修然仲嬲緊，今日小息佢大概唔會同佢講嘢，陸修然看似已經踏出咗一步
「點知道。」陸修然聳肩道，扣住黎昕淇嘅手緩緩鬆開
「如果你未嬲完，咁我都冇辦法。」黎昕淇將櫈向後推，準備起身嘅時候，陸修然伸手捉住咗佢嘅手腕
喺陸修然捉住黎昕淇嘅瞬間，黎昕淇嘅嘴角不自覺咁上揚，佢抿一抿唇收起淡淡嘅笑容，側一側頭定睛望住陸修然
「你嬲完未？」陸修然鬆開手同時問道
「你嬲完我咪嬲完。」黎昕淇兜咗個大圈就係唔直接講嬲完未
陸修然伸手捉住黎昕淇嘅櫈，一手將佢拉到自己隔離，黎昕淇嘅膝頭貼住喺陸修然嘅櫈邊
「你係唔係咁無聊？」陸修然輕皺起眉頭
「嗯！」黎昕淇頷首，「係你發脾氣在先！」
「你可以唔理㗎。」陸修然反駁道，然後連人帶櫈轉去面向黎昕淇，「又唔係冇比你揀。」
「你有比我揀咩？」「你宜家揀囉。」
陸修然唔怕黎昕淇又嬲過一樣直接朝住門口嘅方向抬一抬下巴，黎昕淇眸色一沉，握起拳頭垂直喺陸修然嘅大髀上用力揼咗一下
雖然覺得有啲痛，但陸修然冇縮開，黎昕淇不悅咁又喺陸修然嘅手臂上搣咗一下
陸修然皺起眉頭，伸手握住黎昕淇嘅手免得佢又搣自己；喺黎昕淇正想講啲咩嘅時候，陸修然嘅背離開櫈背，彎腰將額頭靠喺黎昕淇嘅膊頭上
黎昕淇嘅雙腳拍埋放喺陸修然雙腿之間，雙手放喺大髀上面，佢嘅指尖同陸修然嘅指尖輕輕扣住
「嬲完啦？」黎昕淇低聲問道，伸手摸陸修然嘅頭髮
「點知道。」陸修然嘅回答無棱兩可，不過睇嚟係已經嬲完
陸修然抬起頭坐好，黎昕淇用另一隻手托喺陸修然嘅下巴，將佢嘅臉頰捏住
「個game上次仲未過⋯」陸修然低聲講道，捉住黎昕淇嘅手腕，「你打唔打機？」
「嗯，好呀。」黎昕淇抿一抿唇，帶住少許嘅遲疑微微點頭
黎昕淇望住眼前嘅人輕嘆一口氣，兩人總算結束咗冷戰嘅時間
明明平日番學都會見到面，但再一次喺咁近嘅距離嘅時候，忽然覺得好似對上一次喺咁近嘅距離已經係好耐之前嘅事，連身上嘅氣味都變成久違會聞到嘅氣味
放學之後兩人一如既往一前一後番去，連搭車都唔會坐喺附近，直到落車出閘之後先會慢慢將距離縮短
陸修然行喺前面㩒𨋢，𨋢到嘅時候黎昕淇就啱啱好推門，大步行入𨋢入面，兩個人企喺角落嘅位置
每一次要閂門嘅時候都會有人入𨋢，本來已經唔大嘅𨋢好快變得好擠擁，黎昕淇已經背貼住牆企
陸修然企前咗一小步，將人都擋喺身前，黎昕淇半個人都喺陸修然嘅身後，黎昕淇嘅手捏住陸修然嘅衫角
喺到陸修然所住嘅樓層之前其他人都已經出晒去，陸修然行出𨋢嘅時候黎昕淇仍然拉住佢嘅衫角
黎昕淇踏入陸修然嘅睡房，熟悉又已經有啲陌生嘅味道撲鼻而來；陸修然著住屋企衫、拎住換咗落嚟嘅校服推門行入房
IG Link: https://www.instagram.com/nd_cotttoncandy/?hl=zh-tw