【愛情】如地下情一樣嘅癮，係我對你嘅定義: 30. 妒忌
最近嘅班際比賽都已經完結，學生會嘅成員都可以休息一下先再準備下一個活動
陸修然同莫淮禮一齊走，佢地都係搭地鐵，所以好自然就會一齊放學；兩個人企喺月台等車，陸修然望住幕門，從幕門嘅反射見到黎昕淇同宋楚妍一齊
兩人喺佢同莫淮禮身後經過，行到隔離嘅車門，江清懿同蘇序然都喺度，陸修然嘅眉頭不自覺一樣輕輕一皺，神色稍微一變，但好快又回復原來嘅狀態
「江清懿同鍾安而真係好唔一樣。」莫淮禮喺呢個時候講咗一句，陸修然嘅目光由幕門上嘅倒影移向企喺幕門前嘅江清懿身上，「聽講係異父異母，難怪咁唔一樣。」
「親兄弟都會性格各異，更何況佢地係完全冇血緣可言嘅兄弟。」陸修然望住隔離打鬧嘅幾人，再多瞄一眼就收回視線，拎起手機
「佢睇起嚟似係會有好多緋聞嗰種⋯」莫淮禮笑道，「佢好似同黎昕一齊番part time。」
「哦，好似係。」陸修然睇起嚟唔太在意，語氣都偏向冷淡
「佢睇起嚟好似同黎昕都幾熟，唔知黎昕中唔中意呢類型。」莫淮禮只係講笑，但係陸修然嘅臉色一秒沉咗落嚟
「佢睇點都唔似會中意呢類型。」陸修然喺莫淮禮冇察覺到嘅時候帶住不屑嘅眼神瞄咗一眼
列車駛入月台，車門打開，陸修然同莫淮禮行到對面嘅門邊企，陸修然背靠住玻璃同黎昕淇佢地嘅方向，莫淮禮企喺陸修然隔離
「你啲小迷妹前嗰排先講緊你同黎昕好襯。」莫淮禮提起前一排嘅籃球比賽，作為好友嘅佢都會留意一下呢啲對陸修然嚟講係雞毛蒜皮嘅小事，「佢地見到黎昕遞水比你，佢地仲興奮過當事人⋯」
「係咩。」陸修然嘅唇角小幅度向上勾起，覺得好笑而輕笑一下一樣嘅表情
「係呀⋯」莫淮禮無語一笑，「黎昕好呀，黎昕幾靚，又高又靚，有迷妹估你地有冇偷偷一齊，幻想到可以寫小說啦⋯」
「咁一定冇，我佔有慾比較強。」陸修然回頭望咗一眼，黎昕淇同江清懿唔知講緊啲咩，臉上嘅笑容都係平時對住佢見唔到嘅笑容
對於學校嘅人講嘅嘢，佢一向都唔會太在意，不過有時聽到關於佢同黎昕淇嘅傳聞，佢都會忍唔住好奇，啲人到底諗緊咩
「星期六番工見，聽日都見。」江清懿喺黎昕淇要落車嘅時候講道
「好⋯聽日見⋯」黎昕淇無奈咁笑一笑就邁步行出車廂
喺行到屋企樓下嘅大堂嘅時候，黎昕淇停低落嚟等埋陸修然
兩人一齊行入𨋢，喺𨋢門完全閂埋之後，黎昕淇嘅手臂貼住陸修然嘅手臂，兩人都冇開口講嘢
「聽講，有人諗緊我同你嘅關係。」陸修然好似隨便搵個話題一樣悠悠開口
「楚妍有提起過。」黎昕淇微微點頭，「你啲迷妹喺度諗緊。」
「啱啱莫淮禮問我，你會唔會中意江清懿。」陸修然將校呔嘅領結拉低咗啲，露出裇衫嘅頸喉鈕
「吓，點解咁突然⋯」黎昕淇聽完都覺得無語，佢同江清懿點解可以扯得上關係，「佢完全唔係得我中意嘅類型⋯」
黎昕淇雖然都唔可以好肯定咁講出自己中意嘅類型，但佢可以肯定一定唔係江清懿呢類⋯
「我同佢只係熟，嗯。」黎昕淇下意識就解釋起嚟
「哦。」陸修然仰起頭，將頭靠喺牆上面，淡然咁回答咗一聲
黎昕淇探頭望向陸修然，佢心入面覺得呢個話題嘅開始同結束都有啲突然，好似講完想講嘅嘢就結束話題一樣
喺黎昕淇番到屋企打開門嘅瞬間，牛奶同芝麻已經坐定喺門口等佢開門，牛奶見到黎昕淇身後嘅陸修然，行過去喺佢腳邊蹭兩下
「貓貓乖。」陸修然踎低，一手摸牛奶嘅頭，一手摸芝麻嘅頭，然後就起身除書包
黎昕淇冇特別招呼陸修然，反正大家都識咗咁耐，都冇招唔招呼呢回事，佢自己行入房換衫
芝麻嚟湊完熱鬧就番去佢本來瞓緊嘅位置，只有牛奶仍然喺陸修然嘅腳邊，一臉期待咁望住陸修然
「做咩呀？」陸修然彎腰將牛奶抱起柔聲問道，「我冇零食比你。」
黎昕淇換完衫行出廳嘅時候，見到陸修然坐喺地上，手上拎住逗貓棒同牛奶玩緊
「開心啦牛奶，有人陪你玩。」黎昕淇坐低喺陸修然嘅身旁，因為著住短褲嘅關係，地板冰涼嘅觸感令黎昕淇打咗個冷震
牛奶一直跑嚟跑去追住逗貓棒，陸修然只係拎住長長嘅逗貓棒陪玩，黎昕淇望住精力充沛嘅牛奶，又望向百無聊賴嘅陸修然
黎昕淇將臉頰靠喺陸修然嘅膊頭上，腦海中思考緊啱啱陸修然問佢嘅嘢
「陸修然，你妒忌呀？」黎昕淇坐好起身探頭問道
「吓？我妒忌啲咩？」陸修然一時三刻冇反應過嚟，仍然拎住逗貓棒同牛奶玩
黎昕淇冇講，只係定睛望住佢，早幾日陸修然咁樣問過佢，佢宜家又咁樣問番陸修然
陸修然諗咗一陣，似乎明白黎昕淇問緊咩，佢聳肩道：「我有妒忌嘅必要？」
黎昕淇伸手拉住陸修然嘅校呔，跪坐喺佢嘅雙腿之間，將陸修然向自己嘅方向拉，要佢彎腰低頭遷就自己
喺唇碰到嘅一刻，嗰種熟悉嘅觸感又番嚟，柔軟且帶住少許濕潤嘅觸感點解會令人著迷？
吻意愈嚟愈強烈，每一次都係難以停止⋯空氣總會喺不知不覺間變得熾熱起嚟，逗貓棒被遺棄一樣放喺地上面
牛奶呆呆咁企喺度，有啲唔明白咁望住放喺地上嘅逗貓棒，表情似乎係問緊：「仲玩唔玩㗎⋯？」
牛奶一臉困惑咁走向陸修然，喺陸修然同黎昕淇中間嘅縫強行爬入去
陸修然感覺到有嘢踩佢隻腳，肚嘅位置有嘢郁緊，佢同黎昕淇分開咗少少，望到牛奶踩喺黎昕淇嘅大髀上面，抬頭望住陸修然
「喵！」佢呢一下叫聲聽起嚟好似質問陸修然點解唔同佢玩一樣
佢一聲抱怨，將兩人都逗笑，黎昕淇將牛奶抱起，但雙腳騰空嘅牛奶一直扭嚟扭去想掙脫
黎昕淇將牛奶放番喺地上，牛奶即刻跑過去咬起逗貓棒，又急急腳番到去陸修然嘅面前將逗貓棒放低
「你好醒呀牛奶～」黎昕淇伸手摸牛奶嘅後背，「淨係識玩⋯嗯？」
陸修然伸手捏住黎昕淇嘅臉頰，都要幫黎昕淇嘅臉頰㩒到一個酒窩，黎昕淇嘅嘴微微嘟起，同陸修然對上視線
「做咩？」黎昕淇見陸修然咩都冇講，便主動開口問道
IG Link: https://www.instagram.com/nd_cotttoncandy/?hl=zh-tw