【愛情】如地下情一樣嘅癮，係我對你嘅定義: 29. 正當理由

「唔好，我怕⋯」黎昕淇一番思考之後即刻退縮，比陸修然捉住嘅手都即刻無力咁垂低

「比人當做我女朋友好難為你⋯？」望住黎昕淇嘅退縮，陸修然無奈咁鬆開捉住黎昕淇嘅手，只有右手仍然搭喺佢嘅腰上

「咁，又唔係⋯」黎昕淇撅一下嘴，「只係啲人會喺背後討論，評頭品足，好麻煩⋯」

黎昕淇冇諗過自己同陸修然嘅關係會去到呢個地步，更加唔會諗自己會比人當係佢女朋友，感覺太奇怪⋯

「同細個就識嘅人變成男女朋友，感覺唔係好奇怪？」黎昕淇喺心入面問自己，「錫嘅話⋯唔係仲奇怪⋯？點解我地會咁奇怪？」





其實黎昕淇知道就算人地講咩都好，佢同陸修然唔係男女朋友係事實，但正因為佢地之間嘅關係冇想像中簡單，所以先冇辦法好似對其他人一樣對陸修然⋯

「隨便你啦。」陸修然耷低頭，額頭靠喺黎昕淇嘅膊頭上面，「反正只要我嘅解藥喺度就夠。」

黎昕淇由得陸修然靠住佢，佢唔會抗拒同陸修然有咁親密嘅接觸，睇起嚟好似情侶先會做嘅事，佢地唔係做緊⋯？

正因為咁樣，先令佢地嘅關係變得愈嚟愈難解釋，黎昕淇都唔知點樣形容，陸修然反而冇太在意呢件事

「你搵到女朋友，又或者我搵到男朋友嘅話，我地就唔係對方嘅解藥啦⋯」黎昕淇將語氣放柔道





「我要求好高，應該冇咁易搵到女朋友。」陸修然抬起頭，凝視住黎昕淇嘅雙眸道，「你都係陪我一齊單身啦。」

黎昕淇嘅下巴被微微抬起，撞上陸修然嘅目光，就算幾多次嘅湊近，黎昕淇都唔會避開，好輕易咁接受

「我係對錫呢樣嘢上癮，定係⋯係對同佢錫呢樣嘢上癮⋯？」黎昕淇喺合上雙眼感受唇上嘅觸感嘅時候，內心忽然有個疑惑升起，「搞唔明⋯」

⋯

老師拎起粉筆喺黑板上寫字，大家望住黑板，將老師講重點都抄落嚟





「幾時落堂，好眼瞓⋯」黎昕淇拎起水樽飲咗啖水，然後拎起潤唇膏搽，「陣間去食咩好⋯」

黎昕淇就嚟瞓著嘅時候啱啱好打鐘落堂，黎昕淇又即刻成個人醒晒

老師一話落堂，大家都急不及待要去食飯，黎昕淇即刻拎埋銀包起身行前一個位去搵宋楚妍

「食飯啦食飯啦！」宋楚妍連枱上嘅嘢都唔清，直接就起身走

兩人即刻匆匆忙忙咁急步行出學校，穿過人群朝住餐廳行去

「你做咩又咁快到⋯！你早走㗎？」宋楚妍一到餐廳門口就見到江清懿同蘇序然兩個人已經到咗

「同你地咪差唔多時間走囉，可以早幾多？」江清懿直接行入餐廳，「搭唔搭枱？」

「搭囉⋯」宋楚妍望一眼餐廳入面，食飯時間都多人，同識嘅人搭枱總好過同唔識嘅人搭枱，「搭啦！」





「你隻手做咩瘀咗咁大塊？」江清懿喺坐低嘅時候咁啱見到黎昕淇嘅手臂紫紅咗一塊，面積唔大

「唔小心撞到⋯」黎昕淇拉一拉衫袖，衫袖啱啱好可以遮住瘀痕

琴日喺黎昕淇要番屋企嘅時候，陸修然忽然將佢嘅衫袖推起少少，然後喺佢手臂上搣咗一下，所以佢嘅手臂宜家有個瘀痕

「你同會長都比人詛咒？你地都係隻手瘀咗咁搞笑嘅？」江清懿開玩笑咁講道

「咁啱啫⋯」黎昕淇雖然表面睇起嚟都係好平靜，一如既往，但係心入面心虛得緊要

如果係男女朋友，比人拆穿咗會又開心又刺激；唔係男女朋友，咁都冇咩太大所謂；但問題在於佢地嘅關係就卡喺中間，又心虛又刺激

「嗰日你遞樽水比會長咋，企我隔離班迷妹都要癲啦！」宋楚妍興致勃勃咁拉住黎昕淇嘅手，同佢分享佢喺比賽日嘅所見所聞，「你睇唔到咋～佢地超興奮！」





「吓？我仲以為係超妒忌⋯！」蘇序然有啲意外，後續反應同佢想像中唔一樣

「冇呀，我聽住佢地好興奮咁喺度講，「嘩～嗰度咁閃得唔得㗎？」「呢個組合好好睇⋯」咁樣。」宋楚妍為咗可以令大家更容易咁感受到當時嘅感覺，佢模仿嗰日嗰幾個女仔嘅語氣講番一次出嚟

「我想走先，大家食啦⋯」黎昕淇頹度咁搖頭，「坐喺呢度好大壓力⋯」

「咁嗰日佢地真係咁講嘛～」宋楚妍捉住黎昕淇嘅手腕

「幾好呀，幾襯呀。」江清懿都同意宋楚妍講嘅嘢，「會長好好呀。」

「唔好洗我腦唔該，宋楚妍已經成日洗我腦，你唔好加入。」黎昕淇伸手中止江清懿再講落去

「如果有會長咁完美嘅人做男朋友，你真係此生無憾。」宋楚妍好認真咁講道

「如果你知佢私下係一個斯文敗類，你一定唔會咁講⋯」黎昕淇雖然好想咁樣講，但係佢唔可以講出口，有種有苦難言嘅感覺，「佢真係唔完美⋯」





黎昕淇聽住佢地傾計，平時佢都係聽佢地講嘢為多，雖然對話一向都冇咩營養，不過都係當可以放鬆下

黎昕淇望向宋楚妍，心入面忽然有一個想法冒出：「如果比楚妍知道咗嘅話⋯」

如果宋楚妍發現咗佢同陸修然嘅關係，宋楚妍會係咩反應？佢會唔會嬲佢一直隱瞞，定係會好震驚？黎昕淇忽然間有啲好奇結果會係點樣

呢段關係一旦比宋楚妍知道，宋楚妍可能就會明白，佢點解一直以嚟都對陸修然呢個受人仰慕嘅會長冇興趣

被仰慕嘅人往往都係觸不可及，仰慕者會一直比被仰慕嘅人嘅神秘感所吸引，所以願意一直追逐

好似星辰一樣耀眼且完美、遙不可及嘅人，對黎昕淇嚟講只係一伸手就可以將佢輕易咁拉到身邊嘅人；當其他人要靠睇IG先可以尋找到佢嘅踪跡嘅時候，黎昕淇已經喺佢身旁，落下悄然無聲嘅吻

地下情一樣嘅秘密關係，刺激又有啲狡猾





「忽然覺得有啲有趣⋯」黎昕淇喺心裏默默咁講嘅同時，嘴角微微上揚，露出帶住少許玩味嘅笑容，「不過比楚妍知道嘅話，佢應該一定會嬲⋯所以都係唔好啦⋯」

黎昕淇對於自己突然間有呢個想法覺得有啲意外，佢居然會諗如果比人知道嘅話會點

「我一定係傻咗⋯」黎昕淇自己都覺得自己好笑，「居然會咁樣諗。」

佢同陸修然嘅關係，係喺佢地今屆學生會競選嗰陣開始，佢地同鍾安而係上一屆嘅學生會內閣成員，後來上一屆卸任之後，佢地先組成呢個新嘅內閣

喺上一屆學生會嘅時候，兩人都係私下先接觸，但到咗今屆，因為內閣入面除咗佢地三個，再加佢地今年嘅財政之外，其他都係啱啱上高中嘅同學，所以佢地要兼顧嘅嘢又多咗，喺學校都有正當理由成日見面接觸

喺呢個癮出現之後，呢個「正當理由」顯得更加重要，喺學校都可以不被懷疑、光明正大咁見面

「一定係因為楚妍成日洗我腦，搞到我都有啲奇怪嘅想法出現⋯」黎昕淇拎起水杯飲一啖水，佢可以肯定佢唔會想宋楚妍知道




IG Link: https://www.instagram.com/nd_cotttoncandy/?hl=zh-tw