【愛情】如地下情一樣嘅癮，係我對你嘅定義: 04. 癮
「番緊去」黎昕淇托住頭，書包放喺大髀上面，戴上耳機，耳機中播住佢最中意嘅歌
陸修然灘喺床上，睡意忽然來襲，直接拎住手機迷迷糊糊咁就瞓著咗；黎昕淇到佢屋企嘅時候，什至係陸修然嘅媽媽開門比佢
「阿昕你自己上嚟先呀？」陸媽媽望住門前獨自企喺度嘅黎昕淇
「媽咪叫我上嚟先，我買咗嘢飲上嚟～」黎昕淇手上抱住兩份六盒一份嘅紙包飲品
「快啲入嚟擺低先啦，好重啦一定⋯！」陸媽媽一臉心痛黎昕淇嘅模樣，拉住黎昕淇入屋，「擺去雪櫃先啦！」
「哦！」黎昕淇拎住嘢飲行到廚房，打開雪櫃就擺入去，轉身望一眼雲石枱，上面擺滿今晚陸媽媽要煮嘅餸，「媽咪話佢遲咗少少收工，佢嚟緊㗎啦～」
「好呀，唔緊要，叫媽咪唔洗急。」陸媽媽點點頭，「出去坐啦，唔好喺廚房啦，有個餸都要等埋你媽咪先整。」
「哦，好呀！」黎昕淇點點頭，孭住書包行出廚房，經過客飯廳走向走廊，行到走廊嘅第二間房嘅房門前輕敲兩下門，然後同平時一樣扭動門鎖推開門
打開房門後所見嘅係冇開燈嘅房間，房內嘅窗簾拉埋咗，黎昕淇望到瞓著咗嘅陸修然之後安靜咗閂埋房門，孭住書包行到梳化坐低睇手機睇電視
等咗大半個鐘之後，陸修然嘅房門終於打開，佢行出走廊，見到坐喺梳化嘅黎昕淇
「你幾時上嚟⋯？」陸修然行到黎昕淇嘅身旁坐低，用手抓一抓頭髮
「大半個鐘前。」黎昕淇抬頭望一望時間，望住陸修然無力咁向後一倒靠住櫈背，「你好眼瞓？」
「一般般，未瞓醒⋯」陸修然合埋眼等雙眼可以慢慢適應光
「我個書包擺入你房啦。」黎昕淇攬住書包起身，直接就行去陸修然嘅睡房
陸修然跟喺黎昕淇身後行入房，陸修然行到床邊坐低，但人仍然未醒晒，黎昕淇坐喺書枱前面嘅電腦椅面向住床嘅方向托住頭
佢見過陸修然嘅另一面，自然唔會有好似其他人一樣嘅仰慕，其他人見唔到嘅陸修然，係黎昕淇見到習以為常嘅一面，所以好難帶住濾鏡去睇佢
踏入對方嘅生活太多，反而會失去本來帶嚟好感嘅神秘感，保持一定嘅距離，都係一種維持個人神秘感嘅方法
「醒啦陸修然。」黎昕淇望住仍然迷迷糊糊嘅陸修然嗌道
「嗯⋯」陸修然向後一瞓，側身攬住被合埋眼，「刨冰好唔好食？」
「嗯，幾好～」黎昕淇笑道，腦海中即刻閃出刨冰嘅甜同冰涼，「好好食～會長你又想食？」
黎昕淇拎起陸修然嘅相機，順手又隨心咁影咗兩張相，然後就輕輕咁將手機放低
「放咗學啦，仲會長⋯」陸修然睜開眼坐起身，無奈咁講道
「你唔係仲著住校服咩？番到嚟做咩連衫都唔換？」黎昕淇戳咗陸修然嘅領結一下，陸修然嘅領呔已經喺番嚟嘅時候拉低咗，「唔似你喎，會長。」
「洗個面先。」陸修然企起身行出睡房，行到廁所開水洗一洗面清醒下
陸修然拎面巾抹乾面上嘅水珠之後就行番房，房門仍然同啱啱一樣虛掩住，陸修然行入房同時捉住門柄將房門閂上，見到企喺門後嘅黎昕淇
「仲諗住嚇我？」陸修然無語一笑，伸手拉起黎昕淇嘅手腕，一下就將佢拉近自己
「阿姨喺度，你唔好亂嚟。」黎昕淇輕哼一聲，語氣聽起嚟好似警告緊陸修然一樣，「陣間比阿姨發現，好麻煩㗎。」
「佢又唔會突然入嚟。」陸修然輕笑一下講道
「你係唔係將我當成某個人嘅代替品？」黎昕淇心入面一直有呢個疑問，但佢冇問出口，只係將問題留比自己思考
陸修然微微彎腰，耷低頭嘅時候黎昕淇稍微踮起腳尖，佢地都習慣咗呢個秘密帶嚟嘅觸感
感覺黎昕淇嘅唇上仍然有少許刨冰嘅甜味殘留，舌尖有少許冰涼嘅感覺，喺舌尖互相觸碰之際，好似有電流通過全身一樣，黎昕淇感覺自己全身都麻咗一下
喺分開嘅時候舌尖都要拉出絲，紅霞一直由黎昕淇嘅臉頰延伸到耳仔，微微張開口喘住氣
同一個做咗好多年朋友嘅人kiss係咩感覺⋯？感覺好奇怪，但又好新奇，想拒絕佢但又冇辦法真係拒絕⋯
「一開始係邊個開始先⋯？」黎昕淇喺心入面問自己，佢都唔太記得係邊個先開始呢段難以言喻嘅關係
陸修然嘅手仍然拉住黎昕淇嘅手腕，要回想起開始嘅一日實在太難
黎昕淇將額頭靠喺陸修然嘅膊頭上，有時候佢會偷偷地覺得呢種狀態好刺激
所有人都仰慕嘅學生會會長陸修然，同佢喺學校要保持距離，但喺私下連kiss都可以做到⋯
「比人知道嘅話會好麻煩⋯」黎昕淇低聲講道，「呢段關係，其實都唔應該存在⋯」
「你係咁諗？真係？」陸修然低聲問道，望向黎昕淇嘅眼神係唔信任嘅眼神
「冇辦法，總唔會一直咁樣落去⋯」黎昕淇先一步鬆開手，行到書枱前坐低，「最衰就係你，搞到我地宜家嘅關係咁奇怪⋯」
「淨係靠我一個人冇辦法令關係變成咁樣。」陸修然坐低喺床邊，然後將校呔除咗落嚟，向後一灘就灘低喺床上
當初只係一個無聊嘅原因，只係因為好奇，想稍微咁嘗試一下，就令成件事變得一發不可收拾一樣
稱唔上係替代品，只係嘗試咗一次就發現呢樣嘢真係會上癮⋯
「我去廁所。」黎昕淇已經恢復過嚟，起身就行出房
陸修然轉側身，腦海有啲空白，變成呢個狀態係近呢一年嘅事，若然只係癮咁簡單嘅問題，唔再私下見面就可以⋯
黎昕淇企喺廁所前面，若無其事一樣拎出潤唇膏就搽，望住鏡中嘅自己，黎昕淇忽然覺得成件事好迷
「其實又唔係唔啱，我地都冇拍拖⋯」黎昕淇低聲講道，手中仍然握住潤唇膏，「係囉，我地都冇拍拖⋯」
⋯
黎昕淇啱啱上車就見到宋楚妍，宋楚妍坐喺靠窗嘅位置
「楚妍～」黎昕淇坐低喺宋楚妍隔離，除咗一邊嘅耳機，「早安～」
「早呀黎昕。」宋楚妍抬起頭，睇起嚟好眼瞓
「做咩咁攰呀？琴晚好夜瞓呀？」黎昕淇拎咗個麵包出嚟食，第一啖喺左邊咬
「幾啦⋯唔知點解灘咗好耐都瞓啱著⋯」宋楚妍揉揉眼，「好眼瞓呀⋯」
「轉頭落車叫你。」黎昕淇一隻手拎住麵包，另一隻手拎住手機，睇到IG跳到下一個嘅story嘅時候呆咗一下
「邊個嚟？」宋楚妍嘅餘光望到好似可以令佢感興趣嘅嘢，側過身探頭望黎昕淇嘅手機，「會長？」
宋楚妍即刻拎手機出嚟，用自己嘅手機睇琴晚陸修然po嘅story，配上一句caption：「邊個偷影我瞓覺⋯？」
IG Link: https://www.instagram.com/nd_cotttoncandy/?hl=zh-tw