【愛情】如地下情一樣嘅癮，係我對你嘅定義: 03. 無感

「冇，唔記得咗想講咩啦。」陸修然聳肩，佢望住黎昕淇嘅表情變化更加想笑出嚟，不過佢忍住咗

「嘖⋯」黎昕淇喺心入面冷笑一聲，然後起身，行到會室門口嘅時候擰轉頭平靜咁問：「我買嘢飲，你地飲唔飲呀？」

「我飲水得啦。」鍾安而微笑着搖頭，然後望向陸修然

「我飲，照舊。」陸修然舉起手，完全無視黎昕淇已經一副咬緊牙關嘅模樣

「好。」黎昕淇咬住牙關微笑住點頭，然後行出會室





喺會室嘅門閂上之後，陸修然同鍾安而對望，鍾安而無奈咁搖搖頭

「你真係唔客氣，佢陣間真係嬲呀⋯」鍾安而無奈笑道

「黎昕？唔會，佢唔係咁小氣嘅人嚟。」陸修然搖搖頭，鍾安而有啲懷疑，不過見黎昕淇都冇講啲咩所以都冇諗太多

黎昕淇呢頭行出會室，嗰頭陸修然就感覺到放喺褲袋嘅手機震起嚟，直覺話比陸修然知呢個一定係來自黎昕淇嘅message

「果然。」手機一拎出嚟即刻自動著咗螢幕，真係黎昕淇





黎昕淇：「你真係完全唔客氣，學下人地副會長得唔得？」

陸修然隔住手機螢幕都可以感覺到黎昕淇嘅語氣，不過陸修然先唔會因為咁少嘅事就怕咗黎昕淇，畢竟佢都都算了解黎昕淇嘅性格，只係紙老虎，多數只係睇起嚟嬲

「得逞啦，肯定喺度偷笑⋯」黎昕淇望住變成藍剔嘅message，唔理陸修然有冇回覆佢就直接將手機收入裙袋

黎昕淇冇將陸修然嘅名set做啲咩特別嘅名，只係set咗全名，本來黎昕淇係連陸修然嘅電話號碼都冇save喺手機，只係一串數字，不過後來有一次陸修然問起佢冇save佢電話嘅原因，黎昕淇就入番電話號碼

黎昕淇拎住一盒朱古力奶同一盒維他奶番到會室，一步一步行到陸修然坐嘅位置，將朱古力奶放喺陸修然嘅面前





「朱古力奶。」黎昕淇講道，然後就行去鍾安而對面拉開櫈坐低

「唔該，轉頭比番錢你。」陸修然露出禮貌嘅微笑對黎昕淇講道

「好呀，唔急。」黎昕淇微微點一下頭，然後就耷低頭邊睇手機邊食飯

佢地平時都中意匿喺學生會室食飯，有時都會出去各自朋友出去食飯，喺會室嘅三人好安靜，大家都安靜咁戴住耳機耷低頭食飯

食完飯之後，鍾安而坐喺原位，用指尖輕托一下眼鏡，拎起放喺手機下面嘅小說，係佢早前未睇完嘅推理小說，掀開書頁，抽起書籤，然後喺安靜嘅會室中再花小小時間睇書

鍾安而戴住一副銀色幼框眼鏡，睇起嚟文質彬彬，按照之前宋楚妍嘅講法就係好貴族少爺，不過佢成個人都散發住氣質嘅感覺

「你已經睇到第五冊啦？」黎昕淇望到鍾安而手上拎住嘅小說係佢最近都有睇緊嘅小說，「我先睇緊第二冊⋯」

「我都係隔咗好耐先開第五冊嚟睇，之前一直都冇心情睇。」鍾安而合埋書望一眼封面，然後又靠住櫈背悠閑咁睇書，「不過佢係寫得幾好嘅。」





「嗯！我就嚟睇完第二冊，聽講第三冊最好睇。」黎昕淇點點頭附和道

「其實都差唔多，不過可能因為第三冊嘅內容撲朔迷離啲⋯？加上最後嘅反轉，又真係精彩好多嘅。」鍾安而嘅臉上掛上淡淡嘅笑容，不過對於黎昕淇有睇係有啲意外

「我要快啲睇完第二冊先得，比你咁樣講一講更加期待啦⋯！」黎昕淇有少少激動咁講道

「第三冊真係幾好睇。」鍾安而微微點頭，扭開水樽蓋似一啖水

喺距離上堂鐘聲仲有五分鐘嘅時候，黎昕淇起身執好嘢準備番課室，鍾安而比佢早一步起身，拎齊嘢就走

「我番去先啦。」鍾安而淡然咁同佢地講咗一聲就起身離開會室

黎昕淇同陸修然望住會室嘅門緩緩閂上，會室又只係剩番佢地兩個人，黎昕淇執齊嘢就準備走，行到門口要扭門鎖開門嘅時候，黎昕淇動作一頓





「我今日放學唔同你一齊走，今晚見。」黎昕淇望向陸修然，語氣平淡講道，「我番去先啦。」

陸修然喺原位再呆坐咗一分鐘，然後先起身離開會室，閂燈鎖門，然後行同黎昕淇唔一樣嘅方向番課室

⋯

「會長出咗新po！居然！」宋楚妍坐喺黎昕淇嘅對面，放低食刨冰嘅匙羹都要先睇陸修然出嘅新po，「平時會長好少更新IG㗎！」

「係咩。」黎昕淇唔太在意，只係一啖一啖咁品嘗眼前嘅刨冰

「你睇下～」宋楚妍滿臉笑容，將手機遞到黎昕淇嘅面前

黎昕淇無奈咁抬起頭望一眼，望嘅第一眼就已經知道呢張相喺幾時影、邊度影什至邊個影，因為呢張相係佢影，嗰日佢就喺陸修然隔離

「會長真係好好睇⋯！」宋楚妍作為一個外貌協會會員，對陸修然嘅讚賞從不吝嗇，「但呢張相點解咁女友視覺嘅⋯？」





「可能只係同朋友一齊出去嗰陣影？」黎昕淇嘅眉心突突跳動，「人地都有朋友㗎⋯」

「都係～」宋楚妍即刻中止咗啱啱嘅想法，「可能你真係成日喺學生會對住會長太多，都已經感受唔到會長嘅魅力啦⋯」

「可能真係？不過都一樣，因為仲有副會長喺度嘛～」黎昕淇笑道

對住陸修然太多所以感受唔到佢嘅魅力都係一個原因，但絕對唔係因為喺學生會開始，佢太清楚陸修然嘅真實性格，喺人前嘅陸修然一直都係咁細心、咁沉穩、咁可靠，亦有一定嘅領導才能，的確係值得被仰慕⋯

「你中意副會長多啲？」宋楚妍瞪大眼，眼神裏係滿滿嘅好奇

「唔係中意，只係崇拜佢？嗯，崇拜。」黎昕淇點點頭，「我覺得副會長嗰種文質彬彬就好好呀。」

「會長戴眼鏡嘅話唔係都好好咩？」宋楚妍問道，「唔知會長戴眼鏡係點樣呢⋯」





「唔⋯應該都係同副會長嘅氣質唔一樣。」黎昕淇托住下巴稍微幻想一下，然後笑住搖頭，「鍾安而係文質彬彬嘅類型，但陸修然係自帶氣場嗰種。」

「你咁樣講我就明啦～」宋楚妍用力咁點頭，比黎昕淇咁樣一講，佢都可以好肯定咁知道兩人嘅分別喺邊度，「今晚一唔一齊食飯呀？」

「今晚約咗人，唔得閒。」黎昕淇搖搖頭

「哦⋯咁好啦～」宋楚妍冇追問落去，只係點一點頭

黎昕淇同宋楚妍喺車站分別，一上車坐低就收到陸修然嘅message：「人到邊？」




IG Link: https://www.instagram.com/nd_cotttoncandy/?hl=zh-tw