[GL] 重遇之後: 46

「Jane，我去一去洗手間，你可以行出去先。」電影播放完畢後，Tracy靠著椅背伸了一個大大的懶腰，朝我說道。
「嗯，咁我坐喺賣飛附近啲凳度等你。」
我步出電影院，在售票處附近的長椅找了個位子坐下，拿出手機打發時間。此時，一個男聲朝坐在旁邊另一張椅子的女生說道：
「等咗好耐？」
百無聊賴的我假裝滑手機，偷瞄二人交流。女生搖了搖頭，站起身來，兩人自然地親了一下嘴，往售票處走去。我愣愣地看著他們的背影，回想幾天前跟Tracy哥哥的對話。
「你同我妹係咩關係？」男人板起一張臉，低聲問道。
「我……」
「你點解會喺我屋企樓下出現？」
「我……送Tracy返屋企。」
「用咩身份送？」




「……朋友。」咄咄逼人的態度令人生畏，我避開男人那道尖銳的目光，撒了不該撒的謊。
「朋友？但係你哋之間嘅行為，唔似只係朋友咁簡單喎？」
「咩意思？」
「你哋成日坐嘅嗰個暗角位，你知唔知係邊個話俾佢聽嘅？」對方沒有直接回應我的提問，然而，此話已足以說明一切。
所以……之前跟Tracy在一起時，那道突如其來，令人毛骨悚然的視線，是來自眼前的人嗎？
我咽了咽口水，戰戰競競地問道：「你……見到我哋兩個……」
「我見到你錫佢。」直截了當的回答讓我當場眼前一黑，差點就要暈倒在地。對方並沒顧及這邊感受，冷冷地續道：「朋友之間會好似你哋咁？你哋到底係咩關係？」
「我哋……」走投無路的我無助地搓著雙手，久久不能說出一句話來。Tracy的哥哥一語不發，只是以眼神施予無言壓力。終於，我明白自己再也躲不下去，深深的吸了一口氣，如自言自語般小聲說道：「拍緊拖。」
「……」男人繼續緊抿嘴唇，以冰冷的視線打量著這邊。
我語帶遲疑，朝沉默的男人問道：「你……係咪反對我哋一齊？」




男人聽罷嘆了一口氣，依舊面無表情地說：「我唔會干涉佢同咩人一齊，但係我得呢個妹。我只係想確定同我妹一齊嘅人係真心真意嘅。你係咪真心鍾意我妹，唔係玩玩下？」
我微弱地點了點頭，對方又以一副懷疑的語氣續道：「但係就算我無意見，唔代表我屋企其他人都無意見。你確認你應付得到？」
「……」
「你明唔明我講咩？同性戀會遇到好多困難，你有無覺悟去面對將來會遇到嘅困難，堅持到底？」
「我……」
「Jane，我OK喇。」Tracy的聲音打斷思緒，我怔了怔，生硬地點了點頭。從洗手間回來的情人坐到我旁邊來，臉帶擔憂地問道：「你做咩咁嘅樣？好似有啲面青青咁，係咪唔舒服？」
「無……只係啱啱睇完戲，覺得有啲攰啫。」
「哈哈，我都覺得好攰，咁我哋去搵個地方，食個tea、叉返足電先！不過……我而家要嚟個快速叉電先。」對方淘氣地說著，以雙手環抱我的肩膀，將臉埋在裡頭。
我無言地摸了摸靠在肩上的頭，平常總是讓人安心的體溫，此刻並未能撫平據佔心頭的焦慮。