[GL] 重遇之後: 45

「嗯？咩飯盒？」
「呀……無嘢。」察覺自己不小心說溜了嘴，我尷尬地別過視線。
「你個樣唔似無嘢喎。」
「真係無嘢，我、我都係想食多塊餅，哈哈。」
我動作生硬地拿了一塊曲奇，她瞇起眼，投以懷疑的目光說道：「你有可疑。」
「邊、邊有？你多心喇。」
「你唔講……我就要繼續做頭先未做完嘅嘢啦。」
「你、你想做咩？」
旁邊的人收起表情，往這邊伸出手來，以拇指指尖抹去沾在唇角的餅乾屑，在耳邊輕輕喃道：「頭先比你走甩咗……今次無咁好彩㗎啦。」
「吓、吓！？」




懷心眼的情人笑笑地看著這副失了方寸的模樣，慢慢將臉靠過來。內心雖然知道對方只是在裝個樣子，即使我不作任何反抗，她也不會真的吻過來。然而，片刻前還亂跳個不停的心臟，實在經歷不起另一波刺激。
「Tracy！夠、夠啦！我講！」我以兩手抵著對方雙肩，彎下眉宣告投降。「你、你仲記唔記得……有日我喺街度……撞到你同個男同事一齊行？」
「嗯？男同事？你指Sam？」
「唔係……係另一個人。」
「仲有邊個？」
我咽了咽口水，說：「……整爛你飯盒嗰個。」
剛才還一臉疑惑的人，恍然大悟地點了點頭。「呀……嗯。」
「嗰日之後……你哋兩個點？」
「咩我哋兩個點？」
「有、有無一齊……去買……飯……盒？」我避開對方視線，吞吞吐吐地問道。




「無呀。我屋企本身有spare，都唔需要買新嘅。」
「哦……」
我暗地鬆了一口氣，旁邊女生歪頭問道：「你做乜突然咁問？」
「無、無……我八卦問下啫。」
「呢件事好耐以前㗎囉喎，你唔講我都唔記得。」Tracy微微勾起嘴角，將下巴放在我的肩上。一雙纖細的手從背後環抱我的腰，她以甜膩輕柔的聲線問道：「嘻嘻，係咪有人呷醋？」
「邊個得閒呷你醋。」
「真係無？」我別過臉，裝作聽不到對方的提問。背後的人又再說道：「Jane，我當佢只係普通同事。」
「我又無問你，你唔使自己解釋。」
「你唔想知咩？」
我沉默片刻，小聲說道：「……但係人哋好似唔只當你係同事。」




「我知……但係我控制唔到人哋點諗。」
聽到對方的話，我語帶不滿地抱怨道：「哦，咁如果人哋對你做出啲超越同事關係嘅行為，你都會由得佢，唔會阻止咯係咪？」
「Jane，我唔係咁嘅意思，你聽我講先。」Tracy把我抱得更緊，續道：「佢唔會對我做啲咩啦，你放心。」
「你又知？」
「其實嗰次飯盒件事之後，佢係有約過我幾次，但係都俾我拒絕咗。食咗檸檬幾次之後，我估佢應該係get到我無嗰個意思，就無再講呢方面嘅嘢啦。」
「真係？」
「Jane，你唔記得我講過咩嗱？『我對無興趣嘅人，係唔會表現得有興趣。』我淨係對你一個有興趣啦，你唔使擔心。」
「我無擔心。」
「咁……唔使呷醋？嘻嘻。」語畢，她親了一下我的臉頰。
「我都話我無呷醋咯，你放手！」我扭著身體，想要掙開扣著腰部的束縛。
「OKOK，不過有又好無都好，我都隨時歡迎你嚟呷我醋。」
「你做咩咁享受比人呷醋？」
「咁係因為鍾意對方先會呷醋㗎嘛。你呷醋，即係代表你鍾意我，我點會唔開心？」
「唉，無你咁好氣！我去瞓晏覺喇，唔理你。」
我苦笑著搖了搖頭，拍打了一下圈著身體的手，示意要她放手。回復自由的我，背對著她側身躺下，曲起一邊手肘當作枕頭。坐在身旁的情人以指尖溫柔地順著垂在耳旁的頭髮，感覺癢癢的，卻同時令人安心。




晚上，送Tracy回家後，我站在屋苑旁的巴士站，滑著手機打發候車時間。在點開IG的時候，一道陌生男聲叫住了我。
「周雅琪。」
我頓時縮起身子，帶著警戒，緩緩抬頭往聲音方向望去。眼前站著一個面無表情，看起來比我年長幾歲的男人。這張面孔似曾相識，我好像在哪裡見過他似的。
「你係邊個？點解會知道我全名？」
「你同我妹咩關係？」
聽到此話，我當場一怔。
難怪我會覺得他眼熟。
對……我曾經在跟那時還是閨密的女生聊視訊時見過他。
他是Tracy的哥哥。