返去兩年前就真係會有用咩？: 第六章-表白

我：「終於搞掂啦！」我望住我部電腦入面做咗兩禮拜嘅成果，感動到要大叫。既然一切都準備好咁就梗係要約阿穎啦。
我：「31號嗰日你得唔得閒呀？」我message 佢
穎：「得閒呀，做咩呀？」
我：「你有冇興趣去睇吓海呀？我屋企嗰邊。」
穎：「好呀無問題。」
我：「咁31號4:00pm美孚等啦。」
約好咗佢之後我就開始諗緊點樣表白。
好快就到咗31號，同阿穎會合咗之後好快就上咗巴士去我屋企嗰邊。之後我就同佢望住海邊嘅日落行過去我哋嘅目的地，因為條路都幾長，所以都行咗成20分鐘，全程我哋都傾得好開心，有時膊頭會撞到對方，之後隻手又會掂到，一開始我都有擔心過佢會介意，不過慢慢好似佢冇咩所謂咁唔係好理，反而更加主動咁樣行近啲我嗰邊。好快終於到咗我哋嘅目的地——某個好多人影相嘅海灘。
到咗之後我就鋪咗一張沙灘墊同佢一齊坐喺上邊，望住個海傾咗好多嘢。其實喺兩年前有一次同過阿穎去荃灣西海旁，嗰時仲有兩個朋友一齊，不過一去到阿穎就唔小心跌親膝頭哥受傷，之後就聽到即刻衝左過去幫佢買膠布，但係痴完之後佢反而覺得仲衰所以就過咗一陣間冇用到。有樣嘢令到我好內疚，因為另外嗰兩個朋友想去其他地方行吓，所以我哋叫咗佢哋去第二度，我就坐喺阿穎隔離陪住佢，但係我諗唔到講咩好亦諗唔到做咩好然後就係咁問佢有冇事，但係咁樣反而令到佢更加唔開心，即使過咗咁耐我都好記得我自己做得咁差。去到嗰一次之後我發覺自己好冇用，完全唔知自己有咩資格去溝阿穎，我係咁諗就算我同佢一齊咗我完全幫佢唔到咁仲有意義咩？再加上因為有表白過，但係佢一直都話唔想拍拖住，同時佢又一直同我好似好曖昧咁樣，呢一種態度令到我覺得好攰。所以冇幾耐之後，我就自動放棄咗溝佢，決定同佢斷聯絡。其實到而家唔多唔少都有少少後悔呢個決定，有時又會有啲嬲，因為佢隔咗一年都冇就同咗我原本嘅兄弟一齊咗。不過算啦最緊要今次可以同到佢一齊。
見個氣氛唔錯我就攞咗個有線耳機出嚟同佢一人一邊之後就喺我手機度播我一早準備好嘅「禮物」一首歌，入邊係you belong with me同love yourself 嘅medley 係我當初中二嗰陣未識彈琴，我曾經試過上網搵東搵西再自己改少少之後用MuseScore 打咗一份you belong with me同love yourself medley嘅鋼琴譜出嚟，嗰陣佢收到都好開心，今次我再改多少少份譜決定要試吓攞嚟表白用。（對首歌有興趣嘅話可以撳條link，同上面所講嘅描述一樣呢首歌嘅目的就係為咗溝佢，但係之後我就冇掂過呢一首歌，因為我唔想破壞佢。）




https://youtu.be/d27LkYlKhwM?si=AHWQ3VJVT7qlUbF2
佢聽完之後好似好感動咁樣，之後我就順勢咁同佢講
我：「我知道我成日好on9好唔識氹你，搞到你成日唔開心，但係我保證我之後一定會努力咁改，改到成為可令你好開心好幸福嘅男朋友，你可唔可以俾個機會我呀？」佢聽完之後靜咗一陣之後
穎：「可以！」佢笑住咁答我。
阿媽我得咗啦！我終於溝到阿穎啦！我哋喺度玩到差唔多7點我就話送佢返去順便喺佢嗰邊食晚餐，既然而家我係佢男朋友佢當然會應承啦。同佢返去嗰段路程我一直拖住佢，同佢一齊搭車同行路時間都好似過得好快咁，真係好想將時間停留喺呢一個咁美好嘅時光。食完個飯之後我就送咗佢返屋企，去到佢屋企樓下嘅時候我鼓起勇氣試吓攬住佢，佢冇反感或者拒絕，甚至主動啲攬實咗我，攬多一陣佢就放咗手然後佢就返咗屋企啦。
返到屋企之後我去到呢一刻都覺得好夢幻，冇諗過真係可以成功同佢成為情侶，到而家都意猶未盡，然後過多一陣間就開始同佢傾電話，傾到三四點先瞓覺。