當我同朋友離家出走去左異世界: 第16章 山洞

「呸！咪亂Up嘢呀，你地班衰仔！」雖然話語係鬧人，但係我笑著咁講。

「而家就天黑，我見嗰邊有個山洞，不如入去紮營好過啦！」阿賢東張西望，話。的確，邊個都唔知入夜之後嘅雨林會係咩嘢樣。

「好。」我正唸著答佢OK，隔離嘅沈沈就幫我答左。

我地行過去大概七十米之外嘅山洞。其實如果呢度唔係異世界，而係真實世界，我唸我會停低欣賞下呢度啲風景，話晒平時我地都冇機會去雨林。

頭頂好似鹹蛋黃咁嘅太陽差唔多消失唔見，而我地都已經到達嗰個山洞。





我地擺低啲行裝，撥開啲落葉就一嘢坐落地。

「今日真係嚇Q死我。」高日維話。

「咪當你離家出走去異世界囉！」我開玩笑咁話。邊講仲生起左把火。

「今晚食乜呀？」阿賢第一個提出最重要嘅問題。

「事先聲明，唔係我唔愛杯麵，但係日日食杯麵好寡姐！」方書文托左下眼睛，破天荒冇咁認真咁講嘢。





「有得食就唔錯啦⋯唔通你仲想食下啲山珍海味壽司刺身咩！」我仲沈醉喺一直以嚟睇嗰低慘絕人寰嘅異世界小說，主角好辛苦熬過肌餓嘅場景，但係我一講完，高日維面前就多左兩舊吞拿魚刺身。

我：……

我無奈咁嘆左口氣，跟住嘗試整一模一樣嘅刺身，結果就係我整左兩舊三文魚刺身。

「算，好過冇。」我低聲話。

「我都要呀！！！」阿賢一見到壽司就兩眼發光。





「好好好。」我同高日維話。

過左兩分鐘，每個人面前都有一碟帆立貝壽司、吞拿魚壽司、三文魚壽司、海膽壽司，不過我整出嚟嘅明顯細舊過高日維嗰啲。