當我同朋友離家出走去左異世界: 第4章 超能力
「請乘客落車。」廣播聲又喺我地頭頂傳嚟，㗎纜車度門同時打開門左。
「咁而家即係點呀？」方書文望左眼出面嘅一大片草地，同埋唔遠處嘅森林，托左下眼鏡，不安咁問。
「落車睇下。」喺我答之前，沈沉罕有咁出聲回答。而我嘅答案都同佢一樣。
等我的全部人都落晒車，再回頭望嗰陣，㗎纜車竟然已經唔見左！
「咩料？！」高日維同阿賢同時話，的確，我地都好震驚，因為咁同時代表左一個問題——我地冇得遠路返回。
「算啦，我地見步行步囉。」我安慰道。始終我係拖佢地落水嗰個，點都要負返啲責任。
「咁我地走去邊喎⋯⋯」阿賢提出左個好嚴峻嘅問題。我地應該去邊？！前面就係一大片森林，睇落仲好似係熱帶雨林，應該都幾危險下，但係留喺呢一大片草原唔郁又好似好晒時間⋯⋯
「Er⋯不如我地梳理下而家究竟發生咩事先啦⋯⋯」方書文膽怯怯咁提出。
而家好似得返呢個辦法，所以眾人都有啲無奈咁同意左。
而我就將喺某某樂園換到「離家出走去異世界」非五張，到搭纜車嚟到呢度，同埋某某樂園個職員好似同啱啱票務處個職員係同一個人嘅事完完整整咁講晒出嚟。
「咁即係⋯我地而家真係喺異世界？！」最終，我地得出一個結論。
眾人你眼望我眼，都唔知應該比咩反應，畢竟呢樣嘢的確好難相信。
「事到如今，都冇得返轉頭，倒不如接受現實啦⋯⋯」高日維話。原本佢前半句我地都好同意，但係佢後半句係：「或者我地會有啲咩超能力，同埋靚女魔法師嚟搵我地呢！」眾人集體沈默。
「我講真㗎，不如我地試下會唔會識啲咩隱身呀、瞬間移動呀、時間暫停呀、讀心呀⋯⋯」「等陣，」如果我再唔阻止佢，我唸佢會繼續舉例到下世，但其實唸深一層，佢講嘅嘢都未必係假，啱啱咪有㗎纜車喺我地面前消失左囉！「其實，我地係咪應該聽佢講，試下？」
「係囉係囉。嗱，你地好似我咁，心入面默念自己想獲得嘅能力，想變咩出嚟就變咩出嚟⋯想變咩出嚟就變咩出嚟⋯⋯」高日維邊講邊咪埋眼，等左一陣，佢前方竟然突然出現左一本寫真集！
「唔係呀嘛⋯⋯」其他人即刻深吸一口氣，震驚道。