當我同朋友離家出走去左異世界: 第2章 山頂票務處
好快，我手機就傳嚟幾個消息：
阿賢：「得呀，去邊？」佢係我地之中最正常嘅一個，成績同我一樣中規中矩，不過體能相對冇咁好，但係屋企超有錢，書包都係貴價貨，而且天生「吸金」，財神爺都會主動搵佢。
高日維：「有好嘢？Ok！」全班都知道佢鹹濕，擺明係誤會左此「好嘢」不是彼「好嘢」；但係有三寸不爛之舌，同乜人都可以傾兩嘴，收風能力爆燈。
沈沉：「冇問題。」啲人鍾意叫佢「深沉」。人如其名，無論遇到咩都好冷靜，兼且好少講嘢；觀察力超勁，乜都逃唔出佢眼睛。
方書文：「OK，去邊都得。」顧名思義，極愛睇書，乜類型都鍾意，成績最好，學識淵博，穩居全班第一。
我：「聽日再話妳地知去邊。」
我覆完佢地之後就落左地鐵，跟住行返屋企。
一返到屋企打開門，我首先去左洗手，跟住行返出客廳坐低食飯。凳都未坐暖，我阿媽嘅疲勞轟炸就已經到達：「衰仔，又去左邊度玩！你知唔知我地供你返學好貴㗎！日日唔好好讀書淨係識得玩玩玩，好心你學下隔離屋明仔啦，人地考全級第一呀，仲攞左個咩奧數比賽第一名，再睇下你呀⋯⋯」我成績唔算好差，但係阿媽每次都唔滿意，久而久之就變成咁，一見到我就鬧，呢個就係我日日發夢都想離家出走嘅主要原因。
喺佢鬧完我之前，我已經極速食完飯。我放低筷子同碗，講：「我食完飯啦，你地慢慢。」跟住冇理到阿媽嗰對好似可以殺死人嘅眼睛，徑直行左入房。
未關房門之前，我仲聽到我阿爸同我阿媽好冇低氣咁講嘢：「下次唔好鬧佢啦，年輕人就係仲意玩㗎啦⋯⋯」未講完，已經被我阿媽打斷，「玩咩啊玩，淨係識玩，有得佢讀書又唔好好讀，都唔識得珍惜嘅，梗係要鬧啦⋯⋯」跟住又係一大段輸出。
返到入房，我第一時間打開電腦，登入一個討論區，跟住上載嗰五張「離家出走去異世界」門票嘅圖片上去，喺個post下面留言話：「請問有冇人見過呢張非？我喺某某樂園都用七萬分換返嚟㗎。」最尾附上兩個「謝謝」emoji。
過左一陣，我個post下面係一大堆「冇見過」同埋「你被人呃左」同埋「唔好玩嘢」。簡單嚟講，即係呢五張非得我一個有。
跟住我就冇再理呢個post，之後就打左一個鐘頭機，然後訓覺。
********************************************************************************************************
第二日，放學之後。
「傅綽希，到底我地要去邊？」阿賢問。全日上下佢地四個已經問左我好多次要去邊，我都只係一笑置之，話「到時你咪知」。
「我啲好嘢呢！？」高日維超級緊張佢所謂嘅好嘢。
「我地而家出發去山頂⋯⋯嘅纜車票務處！」我話。
「去嗰度做乜？」方書文托左下眼鏡，問。
我攞出嗰五張「離家出走去異世界」非，繼續講：「去玩踢爆！」