人生如夢 — 奇夢/奇事分享: 《奇夢分享一》

大家好，我叫阿力。 

我成日都發預知夢。可能大家會好羨慕有預知能力嘅人，但其實發夢呢家野，未係現實發生前你都唔知係預知夢。 我講緊嘅預知夢並非喺現實生活當中突然一下你覺得好熟悉嘅感覺，而係真係發咗嘅夢。所以對我黎講，預知夢只係一個雞肋嘅超能力。

 我最記得嘅一個預知夢，嗰年我婆係仙遊後一年。 咁我哋「架己冷」就有個習俗第一年唔會拜祖先，第二年清明前先拜。 咁喺拜阿婆嘅前幾晚，我發咗個夢，夢入面有幾個我未見過嘅婆婆同我一齊行山。周圍環境都係好多霧氣，但感覺唔恐怖，而係有一種好放鬆嘅感覺。 嗰陣我行行下我就覺得好奇怪，因為個山愈行愈斜，愈黎愈難行。 我就停咗喺到一陣休息，眼望見同我一齊嘅婆婆行得快過我好多，仲要唔喘氣但我就喘曬氣。嗰陣我淨係覺得自己好廢，連啲阿婆都勁過我。

突然之間有個個樣好慈祥婆婆走返落黎問我：「點啊阿妹！ 做咩行個少少路就索曬氣咁啊！ 仲有好遠先到喎！」 

我就答佢：「下，咩話？ 我仲以為就到。 咁我唔行啦！你哋自己上去啦。」





然後又有第二個婆婆行過黎同我講：「過黎啦，上面好靚嫁！ 包你會鍾意。」

我堅決唔去， 佢哋都冇逼我繼續行。 但個婆婆好匪夷所思咁講咗句： 「唔緊要啦，我哋好快又見面嫁啦！ 今日同你打定招呼姐。」

然後我就從夢中醒返，醒返第一件事就同我媽講有幾個婆婆帶我行山，仲叫我跟住佢哋行。 我媽就話好彩你冇跟， 因為嗰陣我媽同我講有機會係啲鬼呃我，但我又唔係好感覺到佢哋係想害我。 

戲玉黎啦， 幾日後我去拜我婆，咁我媽一去到就叫我幫手裝香比我婆嘅隔離鄰舍，同佢哋逐一打個招呼。我拎住一大束香走到每一個墓碑前，每行一個墓前，一望張相就發現係前幾晚夢到同我一齊行山嘅婆婆。 個下我緊係呆咗啦，但我又唔係話好驚，只係好愕然。然後我係心入面講：「多謝你哋提前同我打招呼，幫我好好照顧我阿婆。」

到離開墳場返到屋企，我先夠膽同我媽講。我媽就話可能佢哋打定招呼，想你拜阿婆嗰陣就裝支香比佢哋。 之後每一次我去拜阿婆嘅前一晚，我都會夢到班婆婆同我一齊，有時係一齊打麻雀，有時係同我講佢哋想要啲咩野食，叫我帶埋過去拜山。 而我都會帶埋過去，畢竟可能佢哋嘅兒孫收唔到先人報夢。





故事就黎到呢到，再次多謝大家睇到呢到。黎緊都會繼續分享我唔同嘅預知夢～