人生如夢 — 奇夢/奇事分享: 奇事分享《三》

大家好，我叫阿力。 今篇故事可能會長少少，因為要解釋一切嘅來龍去脈。

上回講到舊屋有幾個惡靈喺到差啲搞到我冇咗條命，亦都好彩多得祖先嘅庇佑先可以逃過一劫。 雖然大難不死，但喺啲惡靈完全冇諗過要放過我。依到要由點解佢哋會出現喺舊屋講起......

我屋企人就好鍾意去泰國旅行，一黎多野食，二黎想過去見白龍王。 但係去咁多次都好，佢哋都冇緣見到。或者呢啲都係一種命運， 親戚個朋友就介紹咗佢哋去見第二個師傅。 我媽聲稱個師傅講啲野好準，之後都有耐唔耐返去請教下佢。有一次見佢嗰陣，嗰師傅比咗一個佛牌我媽， 托佢比我爸（嗰次佢冇去到泰國），師傅話我爸將會有一個大劫，帶住佢就可以逢凶化吉，叫佢平時唔帶個牌就擺喺神枱保平安。 咁返香港幾個月後，我爸真係驗到有癌症，而且過到呢一關。自此之後，我爸對呢一個佛牌愛如珍寶，日日都帶個牌上身，因為佢覺得個牌救返佢條命。其實除咗幫到我爸可以戰勝癌魔，佢嘅生意都蒸蒸日上， 公司規模愈黎愈大。 我哋都由細屋搬大屋，一切如我爸所願咁美好。

雖然聽落好似好順咁，但係自從搬咗去嗰間所謂嘅大屋後，八年入面我同我爸都輪住病。但係初頭我哋成家人都只係覺得因為我爸岩岩打咗場大仗，而我不嬲身體都差，我哋都冇擺上心。 出奇嘅係，唔知點解我媽一啲事都冇，所以我同我爸都成日笑佢「智障係唔會病」。

有一日我爸發現個牌入面個佛像裂開咗少少。睇到呢到，識佛牌嘅人應該都可能知道咩事。咁我媽就叫我爸唔好再帶係個身到，同埋叫佢親自去泰國問嗰師傅點處理。而我爸就覺得裂開咗少少唔代表啲咩，再加上佢要睇住盤生意，走唔開去泰國， 我爸嗰陣都無視勸告，依舊日日帶住個牌喺身，佢覺得個牌唔會對佢做啲咩。隔咗一排，當所有野都開始愈黎愈差，佢先將個牌擺喺屋企其中一個櫃桶底到，但堅決唔返泰國處理咗佢。漸漸，我哋都忘記咗呢個佛牌嘅存在。





正如我外婆所講，人生好多野都避免唔到。因為我爸嘅執迷不悟，再加上我本身八字喺一家三口中最弱嗰一個， 我就成為咗代罪羔羊，承受大部份嘅果。有陣時報應呢樣野係唔會報喺自己到，反之會報喺你最愛嘅人身上。上次講到喺我出咗院之後，啲惡靈開始變本加厲。身體差、電器壞其實都算事小，我自己最頂唔順就係晚晚都比鬼扎同埋發啲好奇怪嘅夢，每晚都訓得唔好。
 我記得最恐怖嘅一個夢，有好多披麻戴孝嘅人喺一個輕鐵車廂入面，但我係完全唔識入面啲人。車廂入面我聽到啲人嘅哭泣聲同埋一啲奇怪嘅音樂。唔知點解嗰陣我有種感覺，我係唔應該出現喺嗰到。我開始慢慢向門口方向企，希望快啲到下一站就即刻落車走人。 但係差唔多埋站個陣，突然之間所有人靜曬，而且面目猙獰咁望住我。有一個好高大嘅男人喺人群中大聲同我講：「你幾時先肯落黎陪我地啊？」

我心知不妙，我冇答佢。同埋估到嗰陣自己喺個夢入面，畢竟嗰排發太多惡夢。我一邊嘗試開輕鐵個窗諗住跳車走，一邊唸住心經希望自己會可以起到身返到現實。但係有第二個女人用佢啲指甲好大力咁抓住我右腳腳踝同我講：「唸心經就有用嫁啦咩？ 上次咁都整你唔死都係因為有祖先幫你。 今次邊個都幫你唔到嫁啦。 仲諗住搬屋避開我哋？」

當時我不斷掙扎，諗住踢開嗰女人但唔成功。之前大聲叫嗰個男人見到我想走，衝過黎抱住咗我，然後好大力壓我喺地下到。喺我一息尚存之際，唔知邊到黎嘅勇氣，講咗一句：「我會搵人幫你哋投胎。」講完呢一句之後，個男人就冇再壓住我，而我都從惡夢中醒返。 起身嘅時候我發現我隻右腳踝附近有幾道紅痕同瘀咗一大撻，我就知道我真係比鬼搞。

嗰陣醒返第一件事就係同我屋企人講返個夢，我媽即刻請返上次個高人黎屋企睇下可以點樣處理。聽到上次高人話請唔走叫我哋盡快搬屋，我哋一直以為啲惡靈本身就住係到所以叫我哋走。點知高人上到黎屋企就發現啲惡靈喺源自我爸個「佛牌」，仲話個牌反噬。你睇到呢到可能會覺得，下？ 你媽拎返黎嗰陣冇問個泰國師傅係正牌定邪牌嘅咩？ 我媽同我爸唔識呢啲野，又諗住泰國個師傅見過咁多次咁熟都唔會呃佢哋，一直都只係當係正牌係護身符咁對待，諗都冇諗過會差啲害死個女。 因為高人叫我爸一定要處理咗個佛牌，如果唔係搬幾多次屋都於事無補。如是者，經高人介紹，我爸最尾都去咗轉泰國搵高人個朋友幫手化解佢個佛牌，順便超渡埋啲靈體。 而送走佢哋之際，我哋都搵到間屋搬走。始終舊屋冇乜太陽入到屋內，氣氛陰陰沉沉，個人都好似病懨懨咁，所以最後都決定搬走。

 舊屋嘅事就係呢到告一段落。初頭以為搬屋就會一天都光曬， 點知喺新屋又出現唔同嘅靈異事件。之後有機會再慢慢同大家分享，多謝大家睇到呢到。