異世界重生，職業選地產霸權: 艾芙庭園
艾芙庭園
經過民主的全民投票，咪啦決定聽聽我的計劃，以大地為紙，以樹枝為筆，我向艾芙族眾人推銷我的石幣和房屋計劃。出乎我的意料，他們對金錢的概念和接受程度十分高，我解釋完便已經全盤接受，可能是因為常年搬遷而進化出的適應和接受力吧；至於房屋，他們還是需要花點時間去接受。
集會之後，我拉着樂蒙和亞旺努，還有刑天及咪啦開了一個會議。
「你哋搬到邊，羽白都揾到你哋，我覺得只得兩種可能性︰有鬼或者佢哋聞到花香。」我提出我想到的可能性。
「咩叫有鬼？」樂蒙問。
「即係有卧底。」我快而準的答。
「無可能！」咪啦斬釘截鐵否認。
「我都係咁諗，所以花香先係主因。」我說︰「我哋要令佢哋聞唔到花香，見唔到有花，咁你哋就會安全。」
「我知，唔種花就得。」亞旺努自作聰明的答。
「無可能，無花我哋生存唔到。」咪啦大吼。
「真係呀，跟我咁耐都無嚟醒目，仲要衝出嚟柒嘅，我諗嘢又點會咁簡單。」我自信的笑着說︰「以下落嚟，就係今次嘅重點，我精心為你哋打造嘅夢幻屋苑──艾芙庭園。」我認為艾芙村應該有別於佐呼村的獨立屋，它適合發展成一個大型屋苑。
「艾芙庭園？咩嚟？」咪啦問，不過她的反應我一點都不意外，因為我已經經歷過一次。
「據我觀察，你哋平時都係住喺花入面，所以啲童話先會話有花精靈。但係住喺花入面係咪有咩特別原因？」我問咪啦。
「為咗方便採到每日第一滴最新鮮最甜嘅花蜜，呢一滴用嚟做藥效果係最好，所以我哋都會直接住喺花入面。」咪啦回答。
「即係話如果無其他對手同你哋爭，就無必要住喺花入面，我可唔可以咁講？」我問完之後，咪啦微微點頭。
看到她點頭，我咧嘴大笑，興奮的宣佈︰「艾芙庭園就係你哋一直尋找緊嘅夢想之地！」
我邊在地上用拙劣的技巧畫畫，邊用由樓盤廣告所學的瑰麗詞藻介紹我的設計︰「艾芙庭園，係專為艾芙族打造嘅無敵花海低密度住宅項目。整個設計概念源自温室，預求令每一朵花都可以安全同安心咁沐浴喺陽光之下、茁壯健康咁成長，生產出最香甜嘅花蜜。艾芙庭園着重採光，花海由三十棵半圓半開放式參天大樹圍住，氣勢磅礡，盡顯超然地位。由國際知名設計師同建築師聯手打造一個戶戶無敵園景，又有效防止花香外泄嘅温室花園，盡心用心細心。由職人匠心獨運，每棵樹均提供五個極致豪華闊落大單位，每個住戶可獨享三百六十度迷人花海景致，優美醉人。艾芙庭園，係你嘅夢幻鄉。」
「嘩，我想像得出會好靚。」亞旺努沒有看我的畫作，只憑我的說話去想像。
「你睇埋幅畫，你會有唔同感覺。」樂蒙潑冷水道。
「唔好唱衰我，畫得差，但最後起出嚟靚就得，好似佐呼村咁唔係幾好咩？」我反擊說，可是作為住客的咪啦始終不發一言。
我打蛇隨棍上，接着說下去︰「既然咪啦都無反對，證明我呢個設計令佢哋好滿意，咁就直接執行。樂蒙、亞旺努，我哋傾傾啲細節；刑天，你都要幫手，我會有錢畀返你。」
「吓？我都要？」刑天心不甘，情不願。
「梗係，想有飯食就要付出，好基本。」我大條道理說。
就這樣，我們討論了一個下午，到傍晚終於有定案。
「如果我想將成件事壓縮係三日內搞掂，連埋整多個街市，需要多幾多人手？」我問。
「我諗大概十個左右，主要負責室內方面。」樂蒙經過反復計算後回答。
「好，咁就請十個人啦，每人一日一個石幣做人工。」我下了決定，同時小聲對樂蒙和亞旺努說︰「而你哋兩個就每日兩個石幣。」
「聽日我會搞個集會宣布，同時請人，之後就立即開工，有無問題？」我問咪啦。
「無問題，我會安排。不過我有嘢想問，咩係街市？」咪啦好奇的問。
「街市係交易集中地，可以用石幣買需要嘅嘢。」亞旺努搶答，我點頭並給了他一個「叻叻」手勢誇獎他。
「但我哋本身都無石幣……」咪啦說。
「放心，聽日我會每人派十個，之後你哋就可以用嚟買嘢，另外你哋仲可以同佐呼族做生意，令大家更繁榮。」我對她報以微笑，她問過明白後便離開。
「咁今日整埋石幣就收工。」我對他們說。
晚上，我們睡在花海旁的空地，以天為被，以地為床，看着那繁星密佈的天空，在香港極度罕有，與旁邊那顆日漸接近、日漸變大的妖星形成強烈對比。
「瞓唔着、瞓唔着、瞓唔着呀！」在如此舒適寫意的環境之下，我竟然失眠，於是我決定在繞着花海跑一圈，運動之餘順道查看附近環境。
在剛起步不久，就聽到不遠處傳來啜泣聲，我循着聲音走去，發現咪啦獨自坐在崖邊飲泣。在一望無際的浩瀚星海前哭泣，實在太奢侈，同時又太浪費了。
「你又瞓唔着？」我行近她，温柔的問。
咪啦被我突如其來的慰問嚇了一跳，差點掉下崖，我伸手把她牢牢捉實，並道歉︰「唔好意思，我無諗過會嚇親你，我只係見你一個坐喺度，所以過嚟同你傾吓偈。」
「你乜都見到哂？」咪啦問。
「見到，梗係見到啦。」我逗趣的答，她立刻漲紅了臉，十分害羞，我知她不想讓我知道她偷偷地哭，所以我故意答道︰「我見到你一個人喺度偷偷哋霸住個咁靚嘅夜景唔畀人知，然後好似做咗虧心事咁畀我嚇到差啲跌落崖。」
「哦……咁喳，咁都好啲。」她以接近零分貝的聲音說，可是周圍環境太靜，我還是聽得清清楚楚。
「唔介意我坐喺你隔籬呀嘛？」我循例問，她搖搖頭。我坐下後，大家都沒有再發一言，只是專心的欣賞着這美妙的大自然環境，直到東邊露出魚肚白的陽光才一起回村，臨分別時，我再次對她說︰「一陣十二點幫我召集哂全部族人，我要同佢哋詳細介紹艾芙庭園同派錢。」說完之後我們便各自回去準備。
小睡一會後，到了中午十二時正，我準時站在花海中間，對艾芙族人闡述艾芙庭園的設計理念和概念圖，以及讓他們發問，而當中以安全性最為眾人所擔心。
「好，我明大家嘅擔憂，你哋一直未住過屋，所以會擔心呢個問題好正常，或者我咁講，喺呢方面你哋完全可以放一萬個心。羽白只要聞唔到花香就揾唔到你哋，而我呢個設計就係完全將花香與世隔絕。我用三十棟二十米高嘅樓將花海圍住，密不透風，佢哋唔知入面喺花海；另外，成個庭園由外面睇就係一棵巨樹，佢哋食花蜜但唔係飲樹汁，所以唔駛驚；最後，成個庭園只得空中入口，完全係為咗識飛嘅你哋而造，竣工之後連我都入唔到去，非常安全，加埋你哋嘅幻鄉藥，成個庭園就好似唔存在一樣，係神話傳說入面嘅夢幻鄉。」我將一早預備好的答案背出來，艾芙族人立即拍手叫好。
「成個屋苑會喺三日之後落成，而每個單位價格劃一五個石幣，靚單位先到先得，買幾多個都得，集會結束之後就可以買。」我同時宣佈價錢，這令他們有點糊塗了，他們雖然接受金錢這概念，但事實上他們並未有錢，一時之間不知所措，都鼓譟起來。
在他們對我破口大罵之前，我立即派糖，向他們宣布︰「大家稍安無燥，我會每人派十個石幣畀你哋，咁你哋就有錢買屋，同時我會開個街市畀你哋做生意賺錢，另外你哋都可以經商同佐呼族做生意，佢哋都用緊石幣。仲有仲有，我要請人幫我起屋，人工一個石幣一日，只請十個，想賺錢就一陣嚟揾我。」
收到我的糖之後，他們也安靜下來，而部份人更已經走到我面前排隊見工。我多說了數分鐘的客套話和總結後便匆匆結束集會，趕緊進行面試，最後精挑細選出七個工人來一起完成這個偉大的項目。
「救世主大人，又話請十個人嘅，點解得返七個？」亞旺努問。
「我都想請十個，但得七個人嚟interview，我已經唔揀人，全部都請哂，盡做啦兄弟，三日要起好，OT都要做到。妖星就殺到，羽白又唔知幾時再嚟，時間無多，會補返錢畀你哋。」我充滿決心說︰「我都會落手幫忙。」語畢便脫下救世主裝備，與新來的工人做了一個簡介會，安排他們的工作。
有了明確的分工之後，我們便立即動土，劃出了屋苑的佔地範圍，接着便尋找合適的參天大樹，砍樹運木。這裏真的不能不誇讚刑天，他一刀一棵樹，齊齊整整的將樹一分為二，將我們的效率提升不少。
不消半日，建屋所需要的樹幹已經準備好，接着便是單位內部的裝潢，由於每棟大廈都是一體成形，故這部份是最困難的，艾芙族的七位工人發揮最為重要。樂蒙和亞旺努把單位大致的輪廓和設施都雕刻好，而細節位則靠艾芙七子加以潤飾和雕琢，還根據艾芙族的生活習慣加以改良，最終成為為艾芙族度身訂造的理想之家。
室內裝潢估計要花最少兩日時間，由樂蒙和亞旺努兩位熟手技工監督，我和刑天則負責花園和街市。
面對漂亮的花海，首先我要做的是破壞，即是把我劃為花園範圍外的花朵挖起，移植到範圍內。這種需要細膩操作的工作絕對不適合刑天，故此，我請他把大樹幹掏空當作街市。
一整日下來，花園的花大部份已經移植好，餘下的明天估計數小時便能完成；大廈內部加工完成了七棟，還有二十二棟，應該能趕及後日早上完成；街市外殼亦已準備好，這次有五層高，絕對能夠滿足未來的經商需要。
「好，幫我手豎起埋今日完工嘅大廈就收得工，辛苦哂大家。」我發出今日最後的請求，他們亦很快便辦妥，果然要放工便能激發潛能。
「唔該哂咁多位，而家出埋糧畀你哋先，一個跟一個排好隊。」我把承諾好的石幣發給他們，然後說︰「聽日都要拜託大家喇，聽朝我會請咪啦召集開個村大會，到時我會同村民報告進度同埋開始賣樓。賺錢機會嚟喇，聽日你哋邊個揾到一個人買，邊個就會分到一個石幣，揾得多人就分得多錢，絕對係幫你哋成為富翁嘅好機會！記住，石幣嚟緊好有用，唔信可以問吓樂蒙同亞旺努，聽日見。」
道別了他們後，我總算有時間思考，石幣雖然體積也很細小，但大量攜帶也有一定重量，對艾芙族而言更是一大問題，看來必需用一些更輕身的東西來替代。我左思右想，只有樹葉和花瓣合適，但太易複製且損耗極大，完全不可用。
「或者我要自己造紙先得，之前睇過啲節目話係以啲樹葉、樹皮之類嘅嘢加水煲爛變糊，再倒出嚟攤平風乾，一於試吓。」我努力回憶蔡倫造紙的故事，以及電視節目和書本的記載，花了一整晚時間，憑大概的記憶，總算勉強造出一張粗糙且堅韌的紙。
我滿意的看着自製的紙，統一裁好大小，再寫上「財」字以及面額，一張紙幣便製作完成了，這是明天集會的一個重點項目，連同其他消息一次過發表，順利的話，錢的使用率在女母便會大大提高。
我抱着大把的鈔票，想像自己未來成為富翁後的生活，想着想着便昏睡過去，再次醒來的時候，太陽已經日上三竿，村民都在花海靜心等待，我亦帶着鈔票和最新的樓盤消息往花海去。
「大家好，係咪等咗好耐好心急喇？我專登嘅，好嘢係要等，等吓先會好。」我以輕鬆的開場白來試圖掩飾自己遲到的事實。
「我可以同你哋講，你哋嘅等待係完全值得，因為今日我有三件影響艾芙族嘅大事要宣佈，全部都同你地息息相關！」我頓了頓，令他們稍稍期待，然後續說︰「首先，我為你哋度身訂造咗啱你哋用嘅錢，而且係全女母通用。石幣對你哋嚟講實在太大太重，拎出拎入好唔方便，我琴晚諗咗成晚，終於將錢改良咗，今日正式同大家公開──紙幣！一張紙幣等於十個石幣，上面有我親筆書寫嘅『財』字做防偽，仲用我獨特研發嘅紙嚟製成，輕便耐用，大家儲夠十個石幣可以嚟揾我兌換。」這消息一公布，眾人都歡喜萬分，因為昨天他們把石幣帶回家已經花光了氣力。
「接住落嚟第二樣重要嘅事就係同你哋介紹街市，同埋同佐呼族嘅經商路線。今次艾芙庭園三十座入面，有一座係街市，街市就係畀大家買賣、做生意嘅地方，大家可以將自己嘅商品放喺度賣，自由定價，我哋唔會干預，全部由市場嚟話事，不過喺度擺檔做生意，我哋每日會收返一個石幣當租金，超平。除此之外，有啲嘢係你哋族有人哋族無，亦都有啲嘢係人哋族有你哋族無，呢個時候就需要同其他族做生意。目前佐呼族都係用緊石幣，你哋可以同佢哋做買賣，而路線我已經粗略整咗幅地圖。不過提醒大家，沿路有咩風險我哋唔會負責，富貴險中求，大家自己衡量。」我用最簡單的說話向他們講述了做生意的原則，當中有部份人看得出對此很有興趣。
「最後第三件事，就係艾芙庭園已經可以參觀同買喇！」我興奮的宣佈，但換來的卻是他們的鴉雀無聲。從這反應我想到的解釋只有一個，他們認為單位都是免費入住。我要扭轉這錯誤的想法，於是神態自若、理直氣壯的繼續說下去︰「艾芙庭園經我哋絞盡腦汁設計、身水身汗建造、精益求精裝修，耗費大量人力物力去打造，不過我哋唔求賺錢，只係賣返成本價益街坊。本身每個單位成交價賣五個石幣，但而家樓花預售只賣四個石幣，只限今日，只要有錢，買多幾個投資收租都得，買入數量無限。示範單位已經喺我身後，集會完結之後就會開放畀大家參觀，睇啱可以即買，想買邊座咩單位都得。」
我說完之後，眾人的目光都聚焦在我身後，但偏偏有一個人例外，他舉手發問︰「咩叫投資收租？」
「Yes！太好，佢問啱問題喇！咁就可以激起佢哋不勞而獲嘅心，開始炒樓，我啲樓先會值錢。」我心裏暗喜，但不形於色，維持專業形像答︰「投資收租係一個幫你財富增值嘅途徑，單位買返嚟就係你，你可以轉賣出去賺錢，或者可以畀啲買唔起屋嘅人住，收返佢哋租金。長期收租有固定收入，你可以工都唔駛返，係一個好好嘅賺錢方法。」
這段說話其他人沒有留意，但問問題的那位卻全部都印進了腦海，他雙眼發光，不斷問旁人借錢，看來很快這裏便會誕生女母第一個大業主了。
集會結束後，參觀示範單位的人不算太多，在眾人的拉攏後，總共賣出了二十六個單位，成績算不錯，但當中有一半是一個人買入，無錯，便是剛剛問問題的那位，名為噢啦的艾芙族人。
賣完樓花，把錢都分發好之後，我們便繼續開工，過程十分順利，工人收到賣樓佣金後也更加賣力，成品品質也非常高，最終整個項目按時完成，能夠準時交樓給業主。
「今次真係唔該哂咁多位，有你哋件事先可以咁順利完成，無言感激。」我向眾人道謝，再加點演技，擠出兩滴眼淚，他們看到後均大吃一驚，紛紛歸功於我的英明領導。就這樣，他們自願把我抬上上位，自己則自認下位，在他們的心理上有了主從關係，大大便利了我之後的管治。
「而家場仗先正式開始，我哋艾芙庭園二十九棟總共一百四十五伙，今日賣出咗二十六個單位，但係仲有一百一十九個單位未賣出，我哋定個目標，我想最少賣出八成單位，即係一百一十六個單位，咁我哋大家先賺到錢。」我給了他們一個目標，並激勵道︰「呢個數字我絕對認為你哋做到，我哋十一個人，只係每人揾十個客多啲就搞掂，而成個艾芙族有百幾人，絕對可以消化哂成個艾芙庭園嘅單位。呢度絕對會再有人一口氣買好幾個單位，你勤力，遇到呢個客嘅就係你！你哋合埋雙眼諗吓，而家你哋已經達到目標，賺咗好多錢，第一件事想做乜？吃喝玩樂唔駛做，日玩夜玩？衣錦還鄉、光宗耀祖？每日要人準時餵食，唔愁三餐？做一方霸主，等啲人為你賣命？無論係咩，呢啲都係有錢先做到。而家張開返雙眼，望住你哋嘅目標，開始去實現你哋嘅夢想啦！」
聽完我一番說話之後，他們鬥志旺盛，就像賽場上的一級方程式賽車般，如箭在弦，只等待我的綠燈。
「最後記住，我會絕對配合你哋，有咩要求都可以揾我傾，大家一齊爆數！」我演講完畢，大家都蜂湧而出，像飢腸轆轆的餓狼般去瘋狂尋找獵物。
與此同時，我決定重施故技，加快艾芙族人上樓的速度。