急需二百萬個人俾錢我贖身: 【17】

【17】
 
我已經忘記了哥哥的樣子了，雖然我們一起在人口販賣大本營的籠子裡長大……
 
後來分開之後，我們被分配在同一間公司工作，我哥哥是生物科技的研究員，而我是機械工程的研究員，縱使我們知道彼此的存在，卻從來互不見面。
 
自被公司栽培以來，我所有的生活事務都是由公司安排，換句話說，我從來沒有自由，只是公司的奴僕，但比起小時候的籠子，生活舒服很多了，自由變得毫不重要。
 
來到這一刻，腦袋跳過眼前這個親哥哥的事實，跳過這些年他過得好不好的慰問，跳過他到底是不是我親哥哥的問題，跳過那些我不想接觸的東西，我直接問：
 




「所以你背後嘅組織就係就係宙斯？」我呆呆地問，「係宙斯策劃呢場綁架！」並呆呆地下結論。
 
會長點頭確立我的結論。
 
「雖然我只係申請親身收集新藥後反應嘅數據，但我無離開過宙斯公司，」我開始重整思緒，理性分析，「點解公司咁樣對我？點解咁樣對呢間學校？正如新聞報道所講……」我握緊拳頭，「對佢哋嚟講係二次傷害，點解咁殘忍要連佢哋嘅命都唔放過？公司搞到件事咁嚴重，仲要用咁重嘅成本，真正嘅目的係乜嘢？」
 
「或者係二次傷害，但絕對唔係想殺死佢哋。」會長說。
 
「已經死咗幾個。」我淡淡說。
 




「秘書心悠，話俾佢聽個真相。」會長說。
 
「盧森，你咁聰明都諗唔到，所以外面班差佬更加諗唔到。」叫心悠的女秘書得意洋洋，「假㗎！」她指著我的頸環說。
 
我這刻……好像有一道閃電劈中我的腦袋一樣。
 
假的是什麼？
 
「妳意思係……嗰啲……死咗嘅人……？」我腦袋迅速翻頁，這兩天發生的事情如走馬燈在我腦袋中閃過掠過，然後得出一個答案：「佢哋未死？」
 




「估中！呢場行動裡面，無人會死。」會長輕鬆地笑。
 
「唔係……無理由……頭生嗰個工作人員的確係……」我按住自己的頭，「你哋講大話！」
 
那個康樂組組長從抽櫃裡取出一個頸環，然後敲了一下鍵盤，頸環即時在他手中引爆，鮮血四濺，他自己也發出一聲痛叫，立刻鬆手，頸環落地，喘氣地望向我：「呢個就係答案。」
 
「道具？呢件係仿引爆嘅道具？釋放嘅電流足以擊暈一個人？」我目瞪口呆地說。
 
原來這不只是一場驚世綁架案，而且是一場世紀騙局。
 
康樂組組長捉住自己另一邊手，吃力地點頭，可能剛才的電流令他痛苦不言，苦笑道：「所以我哋一定會『收屍』，就係以防俾你哋發現佢哋無死。」
 
對於公司而言，我一直只是一個無知的員工。何況，我只是這間公司從人口販賣市場買回來的奴僕。
 
「既然無人死，你個心係咪會舒服啲？」會長安慰地問。




 
不……到底是我們頸上的頸環是假，抑或是他手中的頸環道具是假？一切尚未有證據。
 
雖然我不能完全了解公司背後的一切，但我很清楚這間公司沒有道德底線。
 
這不是舉世知名的公司，但背後參與的都是國際級人物。
 
公司規模之大，足以讓我和親哥哥明明身處同一間公司，卻足足九年都無法自由相見。
 
「雖然你無離開過公司，但係你嘅身份未去到知道呢間公司更多嘅秘密。」會長彷彿穿透我的心說，「我同公司講過，希望你可以加入我哋條Team，但係佢話你嘅性格唔適合，除非喺呢次嘅行動裡面，能夠展現出你嘅價值。」
 
哥哥在公司的地位似乎比我高一點，知道的事情比我多一點。
或者，不只是一點。
 
「咁我有無價值？」我問。




 
「你話呢？」會長按住我的頭說。
 
先不說我對這Team要做的事有沒有興趣，但是像我的處境，逃避不會讓自己遠離危險，唯有深入權力的核心，了解得越多，或者才越安全。
 
「我唔知。」我說。
 
「好可惜……」會長語帶傷感，「你仲係差緊啲狠心。」
 
「？」我。
 
「不過已經算合格。」陸欣怡補充說，「公司又唔係要挑選喪心病狂嘅人，只係要挑選幫到手同埋時刻能夠保持理性嘅人。」
 
「咩叫時刻能夠保持理性？」我問。
 




「至少唔容易受到迷惑同欺騙嘅人。」陸欣怡似笑非笑，不經意地撥弄自己的頭髮。
 
話說回頭，我的行動目標只有一個，就是讓自己能夠脫險。我的善心和能力並沒有大到可以拯救全世界，但如果陸欣怡不是個騙子，我也會想辦法把她一同救出來。
 
「我嘅目標金額係咪已經達到？」我問。
 
「係，所以你要離開呢度。」會長爽快地說，「之後我會結束呢度一切，公司會再揾你。」
 
「公司唔想將目標金額再提高咩？」我試探地問。
 
「金額好難再提高，除非有更爆發性嘅故事。」會長直接說。
 
「下一個Game要等幾年之後，所以而家你最好諗定故事。」陸欣怡期待地說。