急需二百萬個人俾錢我贖身: 【16.3】

【16.3】
 
「相隔一年，再逢厄運！這幾乎是各大新聞台對這所學校的報道標題。
 
你哋困喺學校裡面可能無辦法睇到網上嘅討論區，佢哋都話呢間學校嘅學生受到詛咒。不過，嗰場傳染病中，除咗第一個被發現感染嘅學生之外，但無一個人被傳染病殺死，大家都服用特效藥，呢個功勞都係因為你。」會長說。
 
「睇嚟你哋知得好清楚。」我一直對事件感到很抱歉。
雖然我不是這事情的主謀，但亦難辭其究。
 
「你只係將特效藥帶返嚟學校，然後大家喺服用特效藥之後都無事。」會長把表面的結果說出來，「所以你唔需要覺得愧疚。」




 
「但係，特效藥帶嚟摧毀性嘅副作用。」我說。
 
「當時學生嘅家人同病人本身都簽咗同意書，只係因為新藥未經臨床測試」會長說說，「只係後來大家都知事實係，呢隻病毒有70%係可以靠自身免疫力對抗，尤其係年青嘅學生，更加達到80%。」
 
所以為什麼全校師生如此憎恨我，就是因為當年我信誓旦旦勸喻他們簽下試藥同意書，到全世界都知道病毒根本沒有那麼恐怖，恐怖的反而是藥後的副作用。
 
「上年我係其中一名研究人員，因為係我堅持要完成呢項實驗，完成阿我哥嘅研究，所以係我令大家承受呢啲副作用。當時露面同全校解說同簽約嘅人，正正就係我。所以我承受大家嘅憎恨，亦都係罪有應得。」我坦言。
 
「之前藉藉無名嘅宙斯科技藥業公司因為特效藥嘅成功而股價飆升，賺咗唔少錢。」會長搭著我的肩說：「但所有人都唔知道，呢場傳染病嘅起始，亦都係宙斯科技藥業公司搞出嚟。」




 
我怔住：「連呢樣你都知道？」
 
「因為我就係呢隻藥嘅研究發明者。」會長說。
 
？
 
嗯？
 
忽然間，我腦袋一片空白。




 
「你……你係……」