急需二百萬個人俾錢我贖身: 【12.2】盧天篇

【12.2】
 
「我係現場記者，而家時間係下午4時50分，位置喺學校300米外嘅街道上，而家我哋可以睇見警方依然嚴陣戒備，早前裡面有學生直播揚言今日會為警方開啟一個缺口，讓警方可以進入採取突擊行動，到底係咪真架呢？
有唔少網民當然希望佢哋能夠成功，但如果從理性分析，學生人質成功嘅機會率簡直近乎零，所謂突擊行動嘅先要條件係出奇不意，但學生人質呢次咁高調去將時間去話俾全世界人知，呢種舉突擊策略係聞所未聞，相信警方都好難去配合，但係，亦都有人話呢場只係煙幕，實質佢哋係想聲東擊聲，事實係點，真係無人知！
 
畫面返嚟現場，拿，透過無人機拍攝畫面都可以睇到，綁匪呢次嘅行動部署非常精密同令人讚嘆，佢哋居然利用咗人質去對抗警方嘅行動，一直以嚟無論係天台、學校嘅外圍都有被威脅嘅特別制服學生喺度巡邏，警方相信佢哋身上係安裝在攝錄機或者係其他感應器，如果發現有其他人外來人接近，就會觸發身上嘅感應，或會令其他學生引爆，所以一直以嚟警方都唔夠膽貿然行動。我哋而家先去睇睇現場操埸嘅環境先……
 
大家從畫面可以睇到露天操場有大約有三十多個特別制服學生，而團繞住學校，每隔3米就有一個特別制服學生喺度駐守。
 
警方相信，如果穿著特別制服嘅人質學生唔服從綁匪嘅指令，或會即時被引爆。




 
而家時間已經是5時54分，距離人質學生宣稱嘅突破行動嘅時間仲有6分鐘。另外要提嘅係，贖金APP裡面嘅贖金金額數字已經達到3e9，其中獲得最高贖金金額係一位名叫盧森嘅學生。網上大家都傳盧森就係策劃呢次逃亡計劃嘅主謀，雖然係咁，綁匪似乎都未有因為佢嘅嫌疑，而將佢身上嘅炸彈引爆，網民就話班綁匪都算係均真、守承諾，相信如果贖金金額達到指定程度，佢哋真係會放人，網上討論區嘅風向令贖金金額再探高位。」
 
 
監視螢幕的畫面映在我的眼瞳，千變萬化的資訊填滿了我的腦袋。盧森果然沒有令我失望，他可以將整件事情變得更戲劇性，更牽動觀眾的情緒，這令我們收到的贖金金額越發飆升，相信假以時日真的會達到目標水平。
 
公司說得沒有錯，哪裡有故事，哪裡就有價值。
 
「呢個記者講嘢又講得幾傳神喎。」女秘書趙心悠說。
 




女秘書在看新聞，而康樂組組長則幫我注視著那些人質的舉動。
 
「嗯嗯……佢哋好似戴哂面罩，喺頸環定位顯示器入面一堆堆紅點企得都好密，我又真係分唔到邊個打邊個喎，如果佢哋真係一齊攻擊，而工作人員嘅鏡頭又影唔到嘅話，我未必知道邊啲人有攻擊，邊啲只係行行企企，係咪要一齊引爆？」康樂組組長坐在顯示起面前，樣子懊惱。
 
「當然唔可以！如果係咁，啲人就會覺得我哋唔跟rule，可能唔會俾贖金㗎喇。」女秘書敲打著電腦，她正在各大討論區製造各種利好投放贖金的輿論。
 
「但如果工作人員被攻擊都唔予以還擊，咪俾人覺得我哋個規則有Bug囉？」康樂組組長轉個身望向我，「出句聲丫，一陣我哋應該點做？」
 
「你睇佢氣定神閒咁，阿天你一定有計劃啦！」女秘書趙心悠很有信心。
 




「心悠講得啱，我哋唔可以打破個Rule，目標金額仲未達到。到時我寧願俾人知個規則有Bug。」我說。
 
「點解呀？」康樂組長側著頭，不甘我們這邊吃虧。
 
「有Bug就好，有Bug先有睇頭。做每一件事，都要認清我哋個目的，我哋個目的唔係要話俾人知我哋有幾叻。」我說。
 
趙心悠點頭認同，然後自說自話：「係呀，例如做一件事嘅目的表面上係為咗賺錢，但其實最終嘅目的係為咗自由，但如果有其他方法可以獲得自由，又點解要執著喺錢？」
 
「你哋講咩咁深，我嘅目的得一個，就係要贏！」康樂組組長一時意氣風發，但望向監視畫面又皺起眉，「但佢哋咁搞一搞，驚唔驚佢哋真係放到班差佬入嚟。」
 
「點會呀？」女秘書趙心悠態度輕鬆，「就算班工作人員死哂，我哋都……等等！」她突然觸電般望向我，「佢哋會唔會真係唔理班工作人員生死？」
 
「以慮森嘅性格，可能會，不過佢哋呢次打著正義又團結一心嘅勵志精神嚟發起行動，佢哋未必想犧牲他人，反而佢哋如果喺唔知我哋對工作人員設下嘅Rule而行動，呢個對佢哋嚟講先係風險。」我從容地說。
 
「係，佢哋唔知道，如果工作人員唔能夠好好保護身上嘅監視器，令監視器毀壞或者離身，頸環就會被引爆。」說到這裡，女秘書趙心悠臉色沉重起來，「如果佢哋遇害，佢哋嘅屋企人都會好傷心，希望我哋行動快啲完。」




 
是的，我也不希望有更多人受傷。
 
「不過我有一樣嘢更加擔心。」我真的擔心，「陸欣怡佢……」
 
「大家睇吓操場！！佢哋……！」電視機裡新聞直播員激動的聲音打斷了我的話。