急需二百萬個人俾錢我贖身: 【10.1】

【10.1】
 
我回到禮堂，投票已經進行中。
 
兩名工作人員仍然站在禮堂內的大門兩側，作為綁匪的眼睛監視著這場選舉的一舉一動。
 
我剛好看見陸欣怡把紙仔投入A4紙箱，然後回到她的朋友當中，就是石仔、謝凱玲和李施賢當中。
 
本來我想靜靜地站在禮堂門邊，誰知陸欣怡很快發現了我，高興地向我招手。
陸欣怡對我的歡迎與她身旁的石仔形成鮮明的對比，他望著我一臉厭惡。




 
 「聽講係你搞掂咗張銘成嗰班痴線佬喎。」謝凱玲對我充滿讚賞。
 
「有咩咁勁？好彩有阿怡，如果唔係，佢死撚咗啦！」石仔嗤之以鼻。
 
我抓抓頭，沒有回應。
 
李施賢卻一臉深沉地望著我，竟問道：「你下一步諗住點？」
 
「吓？」我愣住。




 
「我意思係，如果呢個試驗計劃失敗之後，你諗住點？」李施賢認真地問。
 
「喂，你問佢呢啲問題做咩啫？」石仔不屑地說。
 
「無，我只係覺得佢好似有啲打算啫。」李施賢正經八百，總令人感覺腦袋裡有很多分析和考量，「因為今日係因為你，令我哋聚集喺呢度。」
 
「咁你呢？」我反問。
 
「學生會班人嘅目的係乜嘢？」李施賢的眼光放在禮堂上的人群，「以佢哋嘅行為嚟講，佢哋好似係想鼓勵我哋互相殘殺，你唔覺得咩？」




 
「所以呢？」我問。
 
「學生會越係咁做，我哋應該越係要團結，只有秩序先可以減少危險。」李施賢嚴肅地說。
 
「恐怕唔到我哋話事。」我輕描淡寫地說，「能唔能夠生存，唔係話分化或者團結就可以解決得到。」
 
「就算係咁！」李施賢深切強調，「亦都既然係咁！我哋嘅性命係咪都受學生會嘅主宰，至少我哋仍然可以選擇分化定係團結。」他對生命似乎有強烈的信仰，說得令人肅然起敬。
 
「單純為咗留住人性美好嘅人面？」我問。
 
「如果呢個係我哋唯一能夠選擇嘅事情！」李施賢氣魄十足。
 
「咁如果我話俾你知，即使係呢個拆炸彈嘅希望，都係學生會搞出嚟嘅分化計劃呢？」我試探地問，「你會點阻止？」
 




李施賢怔了一下。
 
「計我話，要阻止就只有一個方法。」我緊接說。
 
「……」李施賢沒有說話，因為聰明的他知道是什麼方法。
 
「等我話俾你知係咩方法。」我說畢，便轉身。
 
李施賢望著我一步一步走到台上，我不是為了投票，而是拿起米高峰，讓米高峰發出的電音令全場驟然安靜，並將所有視線吸引過來。
 
「唔駛再投票喇，我諗清楚，我決定自願成為試驗品！」我宣佈。
 
台下的陸欣怡感到極度錯愕，因為這跟原本我告訴她的劇情截然不同。我原本跟她說的是，如果親自勸喻林sir他也不願意放棄計劃，我就希望她能夠代替我自願成為試驗品，讓大家和林sir不忍如此可愛動人的美少女置身於死亡邊緣，然後同意放棄試驗。
 
只有傻人才會答應我這種請求！也只有傻的才會相信這種計劃會成功！陸欣怡竟都答應，也竟都相信。




 
無論如何，原本我就沒計劃她會代替我成為試驗品，以此逼使林sir最終放棄試驗。因為，如果我的真正身份若然被公開，陸欣怡也未必會願意相信我，幫助我。
 
所以，趁他們還沒有打算把張銘成拖出來之前，我就自己成為自願者，這是我唯一的選擇，也是最佳選擇。
 
「你……」李施賢像大受打擊一樣走到台前，「呢個就係你嘅方法？」
 
「唔通你唔知咩？」我對他說，再抬頭面向台下所有人說，「學生會嘅目的係要我哋自相殘殺，至少我哋要選擇團結一致。」
 
我要用李施賢剛才的說話贏盡光環。
 
這時候胡sir來到台上，堅壯的手握緊我手上的米高風，虎目含淚地對著米高風說：「要做試驗品嘅唔應該係你，作為老師，應該係我至啱，對唔住，我唔應該逃避呢個責任。」
 
台下的人哭了，大都被感動得一塌糊塗。
 




這時候，還欠一個關鍵的人物。
 
「邊個都唔需要成為試驗品！」
 
他出現了，尋得真相的物理老師林sir。
 
幸好，所有走向都在我掌握之中。