急需二百萬個人俾錢我贖身: 【9】
【9】
「但我仍然唔明白，點解你會成為票王？」陸欣怡頭上仍然充滿問號。
雖然我把計劃告訴她，但她還不知道我真正的身份，如果她知道我是誰，一定會知道為什麼我會是最該死的人，在大部份同學眼中，一定比張銘成更該死。
「一陣間妳就會知道。」我不是故弄玄虛。
「你好似好神秘咁，我開始覺得你戴住口罩係有原因。」陸欣怡繞有興味地說。
我很多謝她，即使我很多事都沒有透露，令她覺得我神秘，但她依然相信我。只是，如果她知道我是誰，她就不會相信我了。
第一次票選的當選者一定是張銘成，但當他知道自己要成為試驗品時，為了自保， 他或者會把我的身份供出來。
如果大家知道我真正的身份，我會是作為試驗品的最佳人選。
對大家而言，我死不足惜。
「我想問，妳有無一個好想佢死嘅人㗎？」我問。
「有。」陸欣怡很快回答。
「係邊個？」我問。
「佢係……呢間學校嘅人都應該好想佢死嘅人。」陸欣怡想了想，「不過你應該唔太清楚，因為你係今年先轉校入嚟。」
「嗯……我喺新聞都聽過下，係咪因為嗰次……」我說。
但我沒有說完，陸欣怡就以一聲感嘆打斷：「唉……呢間學校好似總係多災多難，明明上年先經歷一次人為意外……」
「如果嗰次係無遺下副作用呢？我話……如果……」我說。
「佢喺我哋無知情權下就對我哋做呢種事。」陸欣怡堅定地說。
「嗯。」我點頭。
「好啦，唔好講喇，係咪要去搵物理老師林sir？」陸欣怡說。
「嗯。」我點頭。
我四處張望，發現林sir不在禮堂，那麼他應該在教員室了。
於是，我和陸欣怡離開禮堂，前往到教員室門外，發現門沒有掩上，看來大部份老師都離開了教員室，出來「保護」學生了。
我和陸欣怡踏進教員室，果然看見林sir坐在某堆滿文件的辦公桌前，一邊翻閱一本類似參考書的書，又一邊看著自己手中的一張紙。
「林sir！」陸欣怡聲音爽朗。
林sir身子一直，望向後面。
「陸欣怡？」林sir望見陸欣怡，然後望向我，「仲有盧森？」
「林sir，你睇緊啲乜嘢？」我好奇。
林sir再定睛在手中那張寫滿字的紙，說：「可能係拯救我哋嘅一線新機。」
「或者只係令我哋陷入地獄嘅催命符。」我直接。
「你講咩？」林sir聞言震驚。
「你係由邊度得嚟呢張紙？」我問。
「呢張紙係警方傳送過嚟，係破解我哋頸環炸彈嘅方法。」林sir坦白。
「你肯定呢張係警方傳嚟？佢係用咩方法傳嚟？」我問。
林sir從椅子站起來：「你想講咩？你覺得我俾人呃咗？邊個會做呢種事？」他的反應已經反映他心裡的不安。
「我只係想知道，警方用咩方法話我哋知。」我不徐不疾地說。
林sir猶疑了一下，說：「電話、網上、Fax等等全部都用唔到，警方又唔可以用新聞廣播明目張膽向我哋傳遞信息，所以只好用信鴿。」
「信鴿？你話我哋花園養嗰隻？」陸欣怡即刻想起來。
「嗯。」林sir說，「我哋就係利用信鴿同外面警方偷偷聯絡。」
「但林sir你肯定信鴿去嘅地方，一定係警方？」我問。
「呢個係生物學會嘅玩意，雖然你無參加，但生物學會嘅人都知道，信鴿嘅飛行路線，係由學校到黃金海岸一間小店，小店嘅老板一向同我哋有聯絡，佢知道之後就會通知警方。」林sir對白鴿很有信心。
「嗯……」我瞥了一眼林sir手中的紙，「如果一陣間真係要試驗，希望唔好有人死。」
「呢個係唯一方法……」林sir眼神閃縮，沒有望向我。
「點解唔講『一力承擔』？」我問。
林sir沒有說話。
「林sir，我想問，你可唔可以俾條鎖匙我入木工室？」我問。
林sir果真從抽櫃裡把鎖匙拿出來，遞給我：「你想用裡面啲嘢？」
我點頭：「裡面有好多機械嘢，我想睇睇有無啲有用嘅資源。」
「咁你去啦。」林sir說。
「林sir我仲想問你一個問題。」我說。
「隨便……」林sir有點不耐煩。
「生物學學會仲養咗啲乜嘢？」我問。
「龜、魚……仲有……一啲昆蟲，但除咗信鴿之外，裡面應該無咩可以幫到我哋。」林sir對我的問題有點困惑。
「蜜蜂呢？」我問。
「你想做咩？」林sir愣住。
我搖搖頭，道謝後立刻前往旁邊的木工室。
木工室的工具擺放整齊，我把自己的手機放在一張實木檯面前，在架上取了一些螺絲批、小鉗等工具，有條不紊地放在工作桌上，然後開了一台手提電腦，好整以暇敲打著鍵盤。
「你做咩呀？」陸欣怡奇怪地問。
無法勸喻林sir終止試驗，陸欣怡已經不知道我下一步想做什麼。
「唔好睇我咁，我喺機械工程呢方面幾叻，曾經有人話過我可能係個天才。」我望著電腦的螢光幕說，「我只係想喺自己部手機到做少少改動。」
我有兩部手機，一部是自己的，無法上網，一部學生會給我用作直播的，應該也不能上網，只是應該連接到六樓的儀器。
「天才？」陸欣怡反應略帶敏感，「一講起天才，我就諗起嗰個人！佢好似都係機械工程天才，仲係創科界嘅奇蹟少年添。」
她口中所說的人，應該是我。
「妳有無覺得好奇怪？點解明明成間學校網絡都受到干擾，唯有佢哋部手機可以做直播？」我問。
「唔知道，電子嘅嘢我唔係好熟。」陸欣怡拿起了一個小鉗端詳，「但你到底想做啲乜嘢？想駭入佢哋部腦？」
「我想借妳個手機用。」我邊問邊拆開了我手機的鏡頭。
「唔可以。」陸欣怡搖頭說。
「點解？」我問。
「裡面有好多珍貴嘅資料，唔俾得你。」陸欣怡堅決說。
「咁好啦。」我失望地說，「咁你件衫個扣針呢？可唔可以俾我。」
陸欣怡除下扣針遞給我。
應該大約花了四十幾分鐘，陸欣怡雙眼放光地望著我手中的扣針，不可置信地再一次問：「係咪真㗎？」
「真㗎，我將手機個攝錄鏡頭同藍芽裝置拆咗出嚟，然後砌埋一齊，呢個扣針真係可以攝錄㗎。」我說謊。
陸欣怡知道時間緊逼，收起興奮的神情，認真地問：「咁要嚟做乜嘢？」
「我諗住會容易啲喺神不知鬼不覺下錄低其他人嘅罪證。」我邊胡說，邊在一張紙上寫上極細的字：唯一能夠上六樓的人質就是『工作人員』，我需要把監視器扣在工人的衣服上。
可能因為我的字太細，她拿起紙移近自己的眼睛，樣子困惑。
「妳有近視咩？」我問。
「唔係呀，但點解要咁做？」她視線放在眼前的細字紙。
於是，我再在紙上寫了幾行字，同樣是細字：因為有監聽/監視。
是的，大家都可以肯定學校外圍有監視器，但我認為不只是學校外圍有監視器。
但我不肯定我們身上的是監聽抑或是連同監視，但肯定的是那些工作人員身上一定有小型鏡頭作監視。
陸欣怡閱後驚道：「你點肯定？」
我搖搖頭，說：「投票時間到喇，妳快啲返去先。」
我用眼神告訴她別問太多，陸欣怡唯有無奈應道：「嗯……你自己小心啲。」
於是，陸欣怡離開了我。
我亦可以開始展開行動。
離開木工室，我走到操場上，果然看見四個工作人員在「巡邏」。
按我的觀察，工作人員在學校的巡邏從來都不會是單人，至少是雙人，通常四人。
我走到他們旁邊，他們隨即對我警戒起來，並舉起手示意我不要接近他們。
如果細心留意他們的衣著，不難發現他們制服上的口袋有一個小扣針。如果我估計沒有錯，他們的扣針就是監視鏡頭。
這就是為什麼他們一定不會是單人的原因，因為除了監視外圍、監視我們，工作人員之間也要互相監視。
「我無惡意㗎！」我慌張地舉起雙手。
四個工作人員同時望向我，他們雖然不說話，但表情並非漠然，反而摻雜無奈與悲傷。其實他們一點也不想成為綁匪的工具。
沒有事了，我轉身離開。
我知道，是時候要回去接受現實。
希望我計劃的種子，能夠在我被炸死之前成功萌牙，救我一命。