［搞笑］［打機］收錢幫人戒除網癮，幫到困咗喺遊戲世界: 四十一、明燈

「佢要我盡可能幫你逃出遊戲。」



又係呢份善良。



「唔好誤會，我唔會直接俾真實結晶你，你當我只係喺隔離扶你一把。你都千祈唔好誤會我好樂意幫你，只係樂樂好怕佢一世都見唔返你。」







米餅神情落寞，同平時嘅佢無法喺我記憶中重疊。



「我知你要救走一個人，而家嘅你唔似會掉低佢走咗去，所以我要全力幫你收集真實結晶。」







「從今以後你可以依賴我，我未必有能力令Dust為你所用，但我一定會盡全力保護你、扶持你，令你喺每個活動都有最佳嘅表現。」



「我雖然睇你唔順眼，但我頭先講嘅全部都係真話。」



冇咗蛇仔明呢個強力嘅法師，我本身都有啲不安，但米餅嘅加入令我覺得有返些少安全感。我同佢好難做到同蛇仔明之間嗰種互相信任，但佢嘅實力係目前嘅我好需要嘅嘢。雖然我都識魔法但一定唔夠米餅咁專。







「明白，睇嚟我都要重新振作，幫我同樂樂講我都好想見佢。」



聽到我呢句故作深情嘅對白，米餅乾嘔咗一吓，連帶佢隔離嘅精靈都乾嘔咗一吓，仲反我白眼。



「柒頭，佢未完全原諒你㗎，你唔好講埋啲懶有feel嘅對白啦。」



「收到，米餅姐，但你可唔可以照幫我同佢講。」







「唔使，我嘅視角係同佢共享嘅，我諗佢已經聽到晒喇。」



吓，咁佢咪睇到我望到米餅實一實嘅畫面？



呢一刻我好想見樂樂，我想佢知道我已經變咗，至少似返個人，唔再係以前嗰個自私嘅我。







本身我仲意圖催眠自己，同自己講一唔一齊唔係重點，我想見佢係因為想同佢一齊懷緬吓美好時光，大家做返好朋友。



但我控制唔到自己，我根本仲係好想同樂樂喺返埋一齊，我恨不得而家就四圍打劫大家嘅真實結晶，之後喺現實世界中閃亮登場，喺佢屋企樓下拎住九百九十九朵玫瑰等佢。



聽到樂樂想見我比Reality嘅任何活動都更令我嘅鬥志燃燒，我成日笑烏鴉係狗公，但呢一刻嘅我其實同佢一樣。



我哋其實只不過係勇敢追愛嘅騎士。







我哋嘅純愛之心係呢個世界嘅唯一一片淨土。