［搞笑］［打機］收錢幫人戒除網癮，幫到困咗喺遊戲世界: 四十、花車

隔咗半個鐘，烏鴉同我講有兩個人會加入我哋嘅花車小隊。



基本上，佢搵人嘅方式就係開個朋友名單出嚟，逐個send「花車++？」出去。好一個簡單直接嘅招攬方式。



咁都搵到兩個人，我實在太感動，佢哋就好似沙漠入面嘅點點雨水咁珍貴，我決定咗，無論佢哋係咩人都會欣然接受。







我賭上自己拉丁舞天之驕子嘅名義！



人數同我預想中嘅所需人數有好大出入吓，可能因為佢睇落都唔似可以喺花車巡遊搞出咩花樣，不過佢至少冇我呢隻過街老鼠咁乞人憎。







睇到成員名單，我倒抽一口涼氣。



拉丁舞之神，我可唔可以收返我嗰句？



原來我唔係任何隊友都接受到。







烏鴉一加我入group，我就見到兩個熟悉嘅名字。



係八寶粥同米餅。



八寶粥我可以理解，因為我哋都算係老熟人，而我都算幫佢向紅玉巫女報咗仇，佢拍硬檔加入我地隊伍都算係合情合理。佢同烏鴉講自己平時有跳開舞，喺我地嘅隊伍入面都算係一個大大嘅加分位。



但係Dust嘅副會長紓尊降貴加入我地呢個騎呢小隊係咩一回事。







先唔講佢同我有幾大仇口，如果佢要搞個好好睇睇嘅花車巡遊，基本上Dust全人絕對會為佢鞍前馬後，佢想點巡遊就點巡遊，點輪到我地呢三個賤民同佢一齊操辦。



我嚇到即刻私下搵烏鴉。



我：「烏鴉哥，你知我同呢個痴線婆嘅故事㗎喎，你想佢臨門一腳炸咗我哋架花車？」







烏鴉：「魚哥，唔知我主動邀請佢㗎，係佢自己要求加入，佢真係有啲諗頭㗎，佢如果肯認真表演嘅話，我哋有著數。」



我：「佢主動得，一定係圖謀不軌，我話知佢曉飛，踼佢出去先係正路。」



烏鴉：「我叫佢露返吓散手你睇你就明，你個人都唔化嘅，妖。」



就係咁，我好唔情願咁同我嘅小隊會合。







場地方面，揀咗八寶粥嘅蘑菇花園，一個設定咗玩家之間唔可以攻擊大家嘅場地。



啱晒。



一見到我，米餅笑容滿面咁同我打招呼，但佢哋精靈已經對住我舉緊中指，真係好一個令人心情愉快嘅重逢。



「魚仔，乜咁啱嘅，我哋又見面喇喎。」







佢愈行愈近，可以睇得好清楚佢標誌嘅五官，呢一刻嘅佢皮笑肉不笑，氣氛略為尷尬。



「我知你好唔想我嚟，不過我嚟唔係搞亂檔，我係有幫你嘅理由，你睇埋我表現如何再下定論啦。」



我無奈地點頭示意，即管睇吓佢可以耍到咩花樣出嚟。



「Music！」佢示意一邊嘅八寶粥打開音樂。



八寶粥即刻打開花園嘅音樂，係呢期好紅嘅女團流行曲。



本身淨係得米餅開始跳，我都只係覺得佢跳得唔錯，但未到好有水準嘅表情。



直到佢將精靈幻化為人型，同佢地一齊跳舞，每個精靈嘅外表都唔同，三個嘅舞步更加唔係一模一樣。



咁樣嘅話，完全可以一個人當四個人用。



我最後都係勉為其難咁同意佢留低。



不過，佢係有啲咩目的？我同佢之間，除咗樂樂嘅事以外係冇任何關聯，佢都冇咩理由要幫我。



莫非佢對我一見鍾情？



冇可能，就算成個遊戲死剩我一個男人，我敢講佢寧願自殺都唔會同我一齊。



「做咩眼金金望住我啊？係我太靚定你有嘢想問？」



俾佢察覺到我望住佢，大鑊。