佢用3粒Bitcoin買起一間7仔: 第七章 如果我有逆轉的超能力 三之三

也然醒啦，仲係趴喺德福咖啡店張枱上面，正話，真係一個夢，瞓晏覺改唔到呢個時間洗牌。
 
鈴鈴！鈴鈴！
 
來電者，係以琳。
 
「你今日冇事嘛。」
 
「我⋯⋯」也然好想話好掛住你，但以琳依家係女同學定女朋友呢，「我冇事呀，點解咁問呀？」
 




「不如見面講。」
 
「嚟我度？」
 
「嗯。」
 
「今日大塞車喎。」
 
「咁⋯⋯」
 




「平時間便利店你去唔去到？」
 
「OK嘅。」
 
「嗰度等，再搵地方。」
 
「嗯。」
 
兩個人都唔想喺電話講咁多，也然就話心力交瘁啫，又到以琳發生乜事？
 




也然率先到咗便利店門口，佢唔想再嘥力同谷德昭寒喧，費事入去。按返也然以外嘅正常人時序，呢一刻嘅前一晚，以琳喺也然個竇入面，睇咗兩個神秘短訊就急急腳走咗，以琳嘅出現。
 
以琳嚟到，今日換咗套冷色系嘅便服，都係紮馬尾，個樣好似好攰咁，冇乜表情，同也然攰到爆嘅腦，幾襯。
 
「搵個地方坐低？」也然先開口。
 
「好。」
 
「茶餐廳？」
 
「是旦。」
 
「咁隔離街丫。」
 
「嗯。」




 
兩個人嘅對話，似足冷戰情侶，女嘅嬲個男嘅，男又唔知個女嬲乜，實情係，佢哋只係普通同班同學關係。
 
入到一間舊式茶餐廳，佢哋揀咗張最角落嘅枱，隔離枱咁啱冇其客人，講乜都唔怕聽到，也然準備先開口之際⋯⋯
 
「麻煩兩位掃返個針紙丫。」唔識撈嘅侍應突然殺出嚟，用霸氣嘅態度，拎部電部出嚟scan疫苗通行證，也然難得鼓起勇氣，頭耷耷喺iPhone開個碼出嚟，以琳就會輕微嬲爆爆咁拎部Flip 4出嚟，scan完就將部Flip 4放近也然面前。
 
佢哋，繼續唔講嘢。
 
「你噚晚究竟做過啲咩？」以琳忍唔到先開口，望望電話，望望也然。
 
「我做過啲咩？」也然都想總結下呢幾日做過乜，但佢自己都有口難言，係幫佢Update咗部電話之嘛。
 
「你究竟係咩人？我完全睇唔清你為人。」係喎，以琳冇提到Update Android OS單嘢，因為第一次經歷嘅嗰一晚，也然冇出動到更新系統呢招拖延時間，如果主動提手機更新呢單嘢，就會畀以琳知道自己出現時空洗牌。由於唔知以琳啲記憶停喺邊晚，佢未提及嘅嘢，也然唔敢駁落去講。
 




「點解你會有錢買起間便利店，點解你可以租到啲新盤擺啲舊嘅唱片，完全唔啱你身份，識咗你咁耐你又唔係富二代。我噚晚去嗰度，係咪你嘅臨時製毒工場，你啲錢係犯罪得返嚟？」以琳喺袋掏出噚日拎到嗰一大堆印花，「呢啲印花，我係唔會要㗎。」
 
也然呆咗，噚晚咪講咗咯，crypto呀，crypto呀係crypto呀，啲錢唔係天跌落嚟㗎，都有努力過㗎，買得起便利係因為有腦，同埋畀Francis激親，「Crypto嘛，我邊會，同埋邊識販毒喎。」佢用最平靜嘅語氣，再簡化答案回應以琳。
 
「Crypto嗰啲嘢，我都唔明，我點知你啫。」女神呀，當你女神啦，DSE唔考啫，你可以google睇吓乜嚟㗎嘛，也然好無奈。
 
「仲有⋯⋯」以琳呢兩個字，講得特別有重量，同佢嬌的的嘅聲音有強烈對比，「你犯毒嘅行家，噚晚send咗兩個短訊畀我。」
 
What？也然犯毒咩？仲有行家？
 
以琳打開Flip 4，遞畀也然睇短訊內容，發出者應該係用太空卡。
 
//快啲離開林也然屋企，佢係一個危險人物，將會有大件發生。//
 
//信我，你嗰度係咪睇到隻黑色唱片，有塊棱鏡喺上面？I see you，速逃。麻煩會搵上門，快走。//