佢用3粒Bitcoin買起一間7仔: 第七章 如果我有逆轉的超能力 三之一

「今天列車服務已經中止。」
 
也然畀月台廣播嘈醒咗，右手摸勻個頭，好乾爽，一滴血或者汗都冇，個頭一啲都唔痛，肌肉完全冇被Francis爆樽嘅記憶，但腦入面就有。
 
佢都唔知講咩好，甚至係唔知個腦諗咩好，一片空白。也然經歷緊，比瘋狂更瘋狂嘅事，為咗證實自己冇精神分裂，佢鼓起勇氣望望手機，2022年12月17日，星期六，好彩，sorry，要咁睇日期，已經係唔好彩。
 
港鐵職員忙於疏散月台乘客，也然跟隨人群，慢慢行去德福廣場，腳步浮浮，冇晒方向。大家試下代入也然嘅處境，表面上好似可以靠自已嘅才能改變現狀，但其實幾出力都係倒錢落海咁，懶啲嘅姑且叫呢種叫無力感，也然會話畀大家知呢三個字不足以形容佢嘅內心掙扎，佢面對嘅係掙扎完又掙扎再掙扎仲要掙扎嗰種掙扎，簡稱回來地獄又折返人間。
 
好，都諗唔到咩方法囉，發洩咗先算，已經接近12點，即係CA喺交易所上市時間，也然求其搵咗個Coffee shop買咗杯凍Latte坐低，打去試探Alex，有唔妥就直接同佢反面。
 




「喂，Alex，我打嚟多謝你支持，我隻Clear Air就上市，仲有幾分鐘就係呢個歷史性時刻。」
 
「係呀，未改善空氣質素，先令我哋啲Cold Wallet豐厚啲嘛。」
 
「我驚會有人鋤低CA個價，壞咗我哋大事。」
 
Alex被呢個𡃁仔猜中自己將會做嘅事，當堂怯一怯，「邊會呢，唔會有人咁衰喎。」
 
「係呀，我又唔驚呀。我天使輪賣咗啲幣畀你後，之後仲做咗(前？定輪)做A輪畀啲中資背景私募基金。」
 




Alex估唔到呢個小朋友並唔係普通嘅小朋友，推銷得咁勁。也然繼續講落去，「你知佢哋唔畀買賣加密貨幣，一定要經香港，我同佢哋講好咗，萬一上嗰時畀人惡意沽空，個tokenomic會自動銷毀部份token，減少供應穩定個幣價，點判斷銷毀啲幣，決定權喺我度，我就係tokenomic，唔需要DAO咁投票。白書皮冇寫㗎，我set咗12點上市後自動update新版先睇到，除咗我冇人睇過啲條款。」
 
「所以呢，如果有人沽，我哋就發達啦。每個人手持嘅幣雖然少咗，但會夾到飛天。」也然呢堆嘢講到好firm，好有型咁，其實都係即場發揮，反正吹大啲都唔使成本，兼未必有後果，阻嚇到Alex先最重要。
 
「哈哈⋯⋯勁喎，抵我咁早同啲朋友一齊投落CA度。」
 
也然噓張聲勢成功，用紙老虎嚇走大鱷。
 
「咁等慶功啦，到時食餐勁。」
 




「好呀，同比自己後生嘅人合作，真係學到好多嘢，哈哈。」
 
呢個電話，尚算成功，如果聽日真係聽日，也然就唔使畀Alex貼街招。
 
下一個電話，就真係劃時代，也然要打畀Francis問個究竟。一個人要發生咗啲乜事先會問得出「你係第幾次嚟到今日」呢啲咁違反邏輯嘅問題，也然有心理準備，聽到一啲有晒心理準備都接受唔到嘅答案。
 
「Hi, Francis. 」也然生硬到成碌葛咁。
 
「也然？你好少打畀我㗎喎，有咩好嘢？」也然個心已經寒一寒，Francis幾時會咁熱情，呢一年問一句答一句嗰個Francis去咗邊？也然同Francis由細識到大，好老友，成日一齊玩。只係上到中六後冇幾耐，DSE殺到埋身，壓力壓到佢沉鬱寡言，好似個世界、香港呢個空間欠咗佢咁。青少年嘛，呢啲心態唔健康咯。
 
「我心裡有個疑問，唔知點開口問。」