佢用3粒Bitcoin買起一間7仔: 第六章 我過得並不好但是我會活著 三之三

也然落到樓下，再見唔到啲無謂嘅街招，加上依家身處自己經歷最新嘅一日，冇回帶情況，所有嘢都向好。以琳嗰度，即使前晚嘅事冇發生過，幸而既知事實係以琳都鍾意自己，咁無論前晚、今日、後日或者下星期表白，結果都會係成功㗎啦。
 
一架黑色嘅Audi A4，突然高速駛去也然對出嘅馬路，響晒軚咁停低，一個男人加兩個大漢衝落車，走向也然。也然見到大漢真係大漢，個男人原來係Alex，雖然係識嘅，但來者不善，更係拔腿走啦。
 
「林也然企喺度，你累我輸好多錢呀。」Alex大叫，再指示兩個大漢一齊去。
 
也然個環保袋都唔要，掟向Alex拖延時間，也然太驚，唔敢擰轉頭裝下佢哋有冇水喉通或者牛肉刀嗰啲武器，總之用跑100米嘅速度跑1000米咁跑。
 
估唔到條街冇乜人，搵個人嚟見義勇為都冇，只係有隔半條街嘅好心市民，拎手機出嚟拍低事件經過，有咩事用嚟做證據。係喎，7仔有自己控制到嘅閉路電視最安全，也然決定走去谷德昭間便利店，自己主場，點都着數啲。
 




「幫我報警呀！」也然跑到氣來氣喘，終於到咗7仔，向住谷德昭大叫，也然想叫佢個名，但谷德昭從來冇介紹過自己。
 
「報警報啲咩呀？」
 
「我畀壞人追呀！」也然已經衝到去一個閉路電視一定影到嘅位。在場客人，見有人嘈交，急急腳走清光。
 
「依家邊個係壞人呀？」Alex已經追到上嚟，「係你呢個中學生做騙子，呃人投埋啲無厘頭幣。」兩個大漢一邊喘氣，一邊守住便利店門口，唔畀也然逃走。
 
「隻幣已升返原位啦。」也然慢慢向後褪。谷德昭就踎咗喺銀行（收銀機？）下面打電話：「呢度有三個男人捉一個學生呀⋯⋯」
 




「但我每次投幣就係想攞發行人嘅資料，偷偷沽啲幣嚟賺錢㗎咩，你上嗰三間交易所，全部係我老友開㗎。」Alex慢慢向前行。
 
「根本你一直都係呃我。」也然綜合幾次對Alex嘅對話作出呢個結論，也然退到一個轉彎位，同Alex好似兜圈咁。
 
「我隻隻都係咁沽㗎啦，係你隻CA彈得返，累我輸錢，之前send message你都唔覆。」
 
「你開頭仲安慰我話跌咗唔關我事，等我唔做任何反應。」
 
「梗係要咁啦小朋友，你唔停手，我啲同事點樣繼續狂沽落去呀。」嘩，Alex好茅呀。「不過我低位沽空越沽越狠，夾返上去變咗輸大錢，我幕後老闆要搵人祭旗，搵唔你唔通我自己去死咩。」
 




也然保持均速向後退，覺得真相大白，「呢度有閉路電視，執法人員又就快嚟，你唔可以亂嚟。」
 
「執法人員就快嚟？咁我快手啲咯。」Alex唔再隱藏佢個惡相，叫兩個大漢上前夾向也然，其實光頭嗰個拎咗枝伸縮警棍出嚟，有紋身嗰個就拎咗把短刀，兩人互相望一望，之後一齊衝向也然。
 
也然走呀，唔好死呀，我唔想第一次寫網絡小說就爛尾！求吓你。
 
也然聽到我嘅呼喚，拚命走到便利店死角，係一個閉路電視影唔到嘅位，原來仲有一個客人係度，係Francis，寸也然令到忽發奇想買便利店嘅Francis。Francis反手拎住樽白酒樽頸，急急問也然：「你係第幾次嚟到今日？」第幾次嚟到今日？呢個問題嚟㗎咩？兩個大漢爭兩步就去到也然背脊。
 
Francis唔等也然出聲，一樽白酒扑落佢個頭度。也然痛到天旋地轉，迷糊之間見到Francis手上嘅樽好完整，爆樽原來冇睇戲全面嗰啲咁容易，但Francis被兩個大漢捉住。也然痛之餘覺得個頭出晒汗，伸手摸摸頭髮，濕晒，再睇睇隻手，沾滿血同汗，微微呈淺紅，一個前所未見嘅淺紅tone，然後雙腿乏力跌落地，當場暈低。