【愛情/奇幻】《只能用餘光看見你》第二部曲:暗戀的餘光: 26
隨著銅幣貼著額頭的觸感，我回到了現實，剛才的經歷原來只不過是彈指之間的事情，鍾婉恩依然拿著銅幣貼著我的額頭，見我似乎恢復平靜她才緩緩鬆手。
我以去廁所為由，站起來匆匆離去，站到冷清走廊的轉角處，劉世檜從我眼前出現，我背靠牆壁不自覺咬著口腔內側，嘗試釐清剛才的記憶。
「頭先你都見到?」我開口問著，現在的他彷如一個活生生的人站在我身前，儘管面容不同，可是卻有一種從心底的熟悉感。
劉世檜表情複雜的點點頭
「你就係劉千山……鍾暮雪就係鍾婉恩?」我咬破了嘴唇
劉世檜再次點一點頭
「你知，你一早知……」我不禁一笑
「係」
「你知道係你殺死佢，你仲夠膽返嚟搵我哋? 劉千山!?」
「我嗰陣冇得揀!」劉世檜激動的回應
「你有，係你揀開槍!!」我失控的大喊
「我可以唔揀!如果嗰陣你肯行前一步，你揀返去搵你個書包……揀去救佢而唔係搵我，只要你揀啱一次，你都可能救到佢!」劉世檜走近瞪大眼睛看著我「你唔好得我幾多，頭先我咩都睇到曬，根本原因……係你驚!」
「你放棄咗佢在先……未計你講大話……你呃我呃埋佢。」
我默默回應「就算係咁，都改變唔到你親手殺咗佢嘅事實。」
「我想補救㗎……但係我點樣都搵唔返條路!」劉世檜語氣帶點怨恨。
我一陣語塞，因為我，是我弄走所有標記，鍾暮雪倒在染血雪地的場景不斷刺激著我，我只能跪在走廊地上，感受著那時候的懊惱與後悔。
「所以一切都唔係巧合?點解要上我身?點解?」
「我唔知，呢樣真係唔關我事!你估我真係好想黐住你?」劉世檜語氣還帶著少許激動 ，直至沉默了一會後他才緩緩開口「我諗只有一個人知道……」
恰好在此時，走廊的燈不斷閃爍，劉世檜馬上察覺到不妥，面露難色的說道「真係日頭唔好講人……」
走廊盡頭處，毛月永穿著全黑出現，準確來說是逐漸變深黑色的校服，皮鞋踏地的聲音格外響亮……他不慌不忙的逐漸靠近。
我還在原地一臉茫然，劉世檜已經步步後退向我喊著「走!快啲走!」
「估唔到進度突然快咁多。」毛月永沒有表情看著兩人，隨後視線確確實實的看著劉世檜所在的位置，而不是易天恆的肉身。
劉世檜轉身想逃，可是當他愈發遠離我，速度就越慢，直至數米左右他彷彿像原地踏步一樣。
毛月永看著我說「放心，我目標唔係你。」
話畢他手中憑空出現一盞散發詭異氣息的燈籠，另一隻手朝著劉世檜伸出，無數鐵鏈的聲音從我耳邊響起，這時我才發現不知何時一道鎖鏈在我耳邊越過，緊緊綁在劉世檜身上。
隨著鐵鏈逐漸收緊，劉世檜被拉回我身邊，這刻他焦急的向我悄聲說道「你要幫我!如果唔係冇人幫你救鍾婉恩!」
他奮力掙扎，鎖鏈收縮的力度越來越強，見他逐漸被拖向燈籠，我腦海一片混亂。
「點解我要信你?」儘管我口上這樣說，腦海卻不由自主的擔憂。
的確如他所說，只有他可以幫到我，現在切身體會後我才明白，難怪當初這傢伙說正面完全不能抵抗。
儘管現在目標不是我，單是站在身旁，那種難以言喻的壓迫感，已經讓我動彈不得。
「要救嗎?」眼見他即將被捉住，我下定決心搭前一步……
「儘管那傢伙不可信，可是，我有一件事非常確定……就是那傢伙跟我一樣，愛著她。」
「他不會想鍾婉恩死!」當我腦海產生了這個念頭，還未等我思考怎樣救，一種無可抵抗的吸力瞬間把我吸到去劉世檜身旁，他彷彿重新回到我的體內。
巨大的吸力與鎖鏈驟然消失，我們坐在地上還反應發生什麼，抬頭只見，毛月永帶著少許失望的神情幽幽說著「易天恆……唉，果然仲係太早……算啦。」
未等我們回神他已經消失不見，劉世檜茫然的看著走廊盡頭「你做咗啲咩?點解……」
我搖搖頭表示一無所知，重新站起來後，我再開口「點都好，似乎係我救咗你，唔好唔記得你講嘅嘢。」
劉世檜面有難色「繼續個計劃都得，但係，無論如何都要尊重鍾婉恩嘅意願。」
當我們準備回去食堂，轉角卻衝出來一個小女孩，撞在我們的腳上。
「哎呀!」小女孩屁股著地，一臉委屈的看著我們，隨後回頭看自己的正在忙著聽電話的父親。
「叫咗你唔好周圍走!」父親溫柔的蹲下來安慰小女孩，隨後緩緩抬頭對我說「唔好意思呀。」
「你覺唔覺得個細路女有啲眼熟?」劉世檜開口問著
未等我回應，小女孩便忽然大叫「家姐!」
隨著小女孩的路徑看去，鍾婉恩拿著電話從食堂中緩緩走出來「麗玉，你又喺度嘅?」
「放學喇嘛。」麗玉自豪的展示自己的幼稚園校服
父親首先留意到的是她手上的繃帶，語氣馬上緊張的問「你整親呀?止咗血未?」
「放心放心，我冇事。」鍾婉恩說罷看著我，隨後向他父親介紹著我。
父親聽著他的悄悄話忽然醒起「哦哦……你就係幼稚園同班到而家嗰個吖嘛，我記得喇，嗰陣你放學喺門口大叫話要同你求婚嗰個吖嘛!」
「喂呀，爸比!」鍾婉恩尷尬的打斷他說話
隨後走來跟我說著「一陣我屋企人會車我返去，會返埋學校一轉拎書包，你一唔一齊呀?」
「……好呀。」我隨口附和
「不過你要等一陣……我咁啱今日要檢查……你明啦。」鍾婉恩尷尬一笑