【愛情/奇幻】《只能用餘光看見你》第二部曲:暗戀的餘光: 13
「我之前搵過資料蒐集，碟仙係唔係淨係會寄宿喺碟上面?」鍾婉恩詢問
「話明碟仙，咁梗係啦，所以故事裏面連繫佢哋嘅可能要將碟仙紙改做一個碟仔。」劉道士回應
「但係如果係鬼靈……方法啱就算係碟仙紙都可以寄宿。畢竟碟子只係靈嘅寄宿媒介，所以先叫碟仙。」徐道士喝了一口茶接著說道
「反而女鬼一直喺男主角身邊所以病呢個設定可以改一改，其實我哋一直周圍都圍繞好多鬼靈，唔係刻意嘅話根本唔會病……」
我呆滯片刻，緩緩開口一問「有冇其他原因會導致咁樣?」
「如果要貼合返愛情主題……有。」劉道長忽然站起身在抽屜中翻找，隨後拿出一本古舊泛黃的筆記簿
「牛郎織女大家知道係邊個啦，相傳佢哋即將分別之際，織女手上的紅線與牛郎身上的血汗無意中成為媒介，創造出一種獨一無二的術式。」
鍾婉恩聽到非常入神「係咩術式?」
「一種靈魂牽引法術，曾經有人揣測過，牛郎織女代表陰陽，紅線與血汗代表物質與靈魂，係一種獨特的陰陽召喚儀式……」 劉道長翻開下一頁
「故事嘅下半段係織女曾經傷心欲絕，想要自盡，相隔千里嘅牛郎瞬間感受到織女即將彌留……牛郎便將自己嘅靈魂分一半畀織女。」
「所以我估計，呢個術式可能係一種契約，可以均分兩人嘅靈魂，又或者係雙向嘅召喚術，不過全部都冇根據，冇名冇方法，只有一句咒語所以聽下就算，不過呢個幾適合喺個故事裏面。」
劉道長再次翻揭那本筆記簿「嗰個口訣好似叫……紅繩繫身，以血為引。」
不知不覺一小時過去，而我的心神一直停留在剛才那句說話中……
秋淑儀在剛才一邊聽，不知不覺喝了一杯又一杯「等我一陣，我去一去廁所。」
「好多謝你哋……做嘅一切。」我忍不住伸出雙手，劉道長熱情的回應握手。
在轉身之際，徐道士叫住了我「點都好，唔好勉強自己。有咩唔明再搵我啦。」
我走到門外，徐道士摸一摸自己的胎兒，不知是擔心還是放心，輕輕說了一句「老公，我估我哋個bb應該會順順利利長大。」
我在門外摸著下巴想著「係咪因為呢個法術……所以我先會出現喺度?」
「喂!」
「但係點解我會喺呢條友身上……」我思考過程中，鍾婉恩吹一口氣在我的後頸中
「喂!你唔係話你係普通鬼仔嚟㗎咩，點解你啱先會識呢啲法術?」向我拋來質疑的眼神。
「好基本啫。」
「咁，你知唔知頭先道士講嘅嗰個術式?」鍾婉恩緊張的問
看著她的臉龐，我不由自主想起了一些回憶，她的聲音在我腦海中響起「我教你一句咒語……咁樣無論相隔幾遠，我哋都會再見。」
「我都唔知。」我回應
鍾婉恩靠近我的臉龐，緊盯著我的瞳孔，繼續用質疑的眼神看著我「我唔信，你個樣明明就知道啲嘢!」
「我都想知，咁你呢?你知道啲咩?」我淡淡然回應
鍾婉恩背向我「同你講都唔明，你連真名都唔肯同我講，我點樣信你?」
「你之前講嗰個武士頭守護靈，夠冇同你講啦。」我不屑的回應
「你點樣同人哋比，佢係一個成熟穩重……甚至……」鍾婉恩面色逐漸變得失落「總之就畀你呢個無名小鬼好得多啦。」
「話說頭先……你點解對劉世檜呢個名咁大反應?你識得佢?」我雙手插袋裝作冷靜
鍾婉恩面有難色，沉默良久才回應「總而言之，如果你見到佢，你要小心啲。」
「小心啲……OK……」我皺眉思索一下「講起上嚟，佢應該知道咗，你見到我。」
時間回到他們會見校長的數天後，小息期間，鍾婉恩坐在自己的座位盯著和同班同學聊天的易天恆。
「總係覺得佢最近有啲唔同，之前佢小息都淨係匿埋會讀書。」秋淑儀坐在一旁說著
鍾婉恩裝作不在意，把視線回到面前的書本上，直至放學時段，她叫住了即將離開的易天恆。「喂。」
「今次應該得你一個啦? 你究竟玩夠未?」鍾婉恩的說話讓我停下了腳步。
「唔知你講咩，我有緊要事要走先。」
鍾婉恩跑在我前面，一臉認真的詢問著「唔好再扮嘢，我知你唔係佢，你係邊個?」
「做咩呀，臨時對戲呀?唔好玩啦真係趕時間呀。」我向左走向右走，卻不斷被她攔著去路。
「你唔答呢條，咁我問過第二條囉。」她說罷便跳到走廊的欄桿坐下。
「你做乜嘢呀，落返嚟先啦好危險㗎!」我瞬間變得驚慌
「你知唔知潛水員係點樣入水?」鍾婉恩緩緩問著
「吓?」
「係咁樣。」鍾婉恩背對邊緣，義無反顧向後攤下去。
我馬上衝上前拉著她「好啦，我講啦我講啦，你落返嚟先!」
見我雙手發抖，鍾婉恩不慌不忙的跳下欄桿說道「你好關心我咩?」
「唔關事囉，無論係邊個都會救咗先囉。」
「你再唔同我講真話，我就喺你見唔到嘅地方跳落去……你究竟係邊個?」鍾婉恩眼神看起來非常認真
「我係……易天恆嘅守護靈。」
「呃人。」鍾婉恩作勢回到欄桿邊
「我只係一隻普通鬼仔，咁啱上咗畀身，同佢交易，就係咁多咋。」我如實相告
「交易?」
「商業機……」看見他的動作，我滴了一滴汗「……幫佢溝你。」
「咁你叫咩名?」她直接問
毛月永忽然在我的後背出現，讓我神經繃緊了一下「常日羲呢?」
「佢啱啱落咗樓下呀。」鍾婉恩回應
待腳步聲走遠，我輕輕一回頭 「我叫……」
而他卻忽然回頭看著我……
「……我叫咩關你咩事，同你好熟呀。」我裝作輕鬆壓低聲線說著
「你之前叫我鍾隨心係咩意思? 突然之間攬住我嗰陣……仲有個劇本女主角名……你搵緊佢? 你搵佢做咩?」她忽然間低下頭
「我，只係覺得你同一個熟人好似。」我無奈的笑著說
「其實我……」鍾婉恩欲言又止，忽然間她視線移向後方，一聲貓叫聲讓我順勢跟隨她的視線看去。
一隻不請自來的黑貓在走廊處搖著尾巴看著我們。
「嘩，有隻貓仔呀!」
「你……識唔識得一隻綁武士頭嘅鬼靈?」鍾婉恩的詢問讓我回頭。
「冇見過，講起上嚟你點知我嘅存在?」我直接了當回應
「我見到囉，每次望住你個樣，都有啲似重疊咗嘅模糊感覺，而家模糊感覺冇咗，可能淨係得你一個或者得佢一個。」鍾婉恩指著我的臉龐說 「聽語氣同埋啲動作就知道而家眼前嘅係邊個。」
乜得你咁醒，我緩緩說著「總而言之，你見到我嘅事要保密!」