【愛情/奇幻】《只能用餘光看見你》第二部曲:暗戀的餘光: 5
放學後的活動室，鍾婉恩，秋淑儀以及錢卓鏗平坐在我前方，作為評判觀察我的表現。
錢卓鏗說道「今朝你聽到㗎喇，我都就嚟做人老豆，我自己冇時間之餘，副校都唔畀我繼續玩，所以之後你要嚟頂我個位。」
「咁你原本係做咩呀?」我弱弱一問
「男主角。」錢卓鏗一臉自滿地回覆
「總而言之，你試下讀以下一段……」鍾婉恩給了我一段獨白
老實說這不是我的專長，讀字平鋪直敘，感情毫無起伏，表情萬年不變……
「佢同毛月永一樣係面癱人，點搞?」秋淑儀毫不留情地說著
「有得改嘅，反正我哋都冇第二個選擇。」鍾婉恩不斷拿鉛筆戳著自己的腦袋「唔得嘅話就改男主角人設。」
錢卓鏗有點崩潰的說著「又要改? 唔好啦已經改咗十幾次啦!」
鍾婉恩毫不留情回覆「咁係因為你前十次都唔掂，我哋經費同人手都唔夠，只有改到而家咁先勉強做到，劇……」
「劇本唔係小說吖嘛，我知我知。」錢卓鏗有氣無力說著
毛月永坐在一旁默默說著「總之我點都唔會去幕前。」
碟仙在我腦海中緩緩開口「定係我試下?」
「唔使」我默念著，隨後走到他們面前「不如試下畀個劇本我睇下先?」
我快速掠一眼劇本的大概，是一對男女在某場示威中的愛情故事，而看到其中的關鍵字。
男主角默默在背後看著女主角，直至到最後才開口告白……這個心情我懂。
模仿著碟仙早上的語氣，我深呼吸，大家都是用同一具身體，我不信他做到我做不到
我演繹著其中一段「煙霧飄散四周，我捉住你隻手一直走一直走……」
「我哋逃避咗一世，但係今次我唔想再逃避……我哋係一齊好唔好?」我情深的看著鍾婉恩。
三人看完我的表現後忽然驚訝到停頓了，回過神來開始拍著手掌，只有鍾婉恩一直注視著我。
「唔好意思，我去個廁所先。」鍾婉恩的氣場忽然又冷冽起來，到底是為什麼……
我與他到底有什麼的不一樣，為什麼碟仙做的時候她會笑……
「唔好諗咁多，你可能真係唔舒服呢。」碟仙聽到我的心聲安慰我說道。
「如果你一直係咁嘅表現嘅話，應該都冇咩大問題，靠曬你啦男主角。」錢卓鏗拍著我膊頭
「但係呢套劇女主角係邊個?」我問著
「未揀呀。」錢卓鏗苦惱地說「一直搵唔到人……」
我心中默默念道「仲以為女主角係佢添……」
一直沉默寡言的毛月永開口「其實，關於呢樣嘢，我搵咗個人?」
鍾婉恩去完廁所回來後，便看見活動室門前站著一人。
「啊~婉恩，你好呀~」常日羲正在捂著自己心口，充滿精神的喊著
「你喺度做乜嘢呀?」鍾婉恩好奇的問
「我入嚟你哋學會試鏡做女主角!頭先做緊心理準備~」常日羲輕輕一笑
常日羲的演技一致好評，加上率直可愛的性格，立刻就與整個學會的人打成一片。
除我們兩人以外，這次的試鏡也來了幾個同學，挑選過後一共四人，三男一女新加入作為這次的電影比賽演員，其中一個便是早上跟她借用風紀章的陳明慧。
除了毛月永堅決不參與，在一旁看著書以外，我們圍坐成一團，玩著簡單的社交遊戲，互相了解一下對方。
「係呢~日羲你有冇男朋友㗎?」鏟光頭的梁晨光問著
「你咁可愛一定有啦!」陳明慧附和著
常日羲回應著「冇呀……」聽到前半段的梁晨光嘴角似乎微微上揚
「我結咗婚啦。」全場忽然瞬間安靜了，常日羲輕輕一笑。
眾人都不敢置信，重新問多一次「你頭先話咩話?」
常日羲用著真誠又可愛的笑容，說著最匪夷所思的話「我已經結咗婚啦，真係有結婚證書嗰隻。」
「你今年幾多歲呀……?」秋淑儀一臉驚訝地問
「……17?」
「同道中人，畀個五我。」錢卓鏗莫名興奮
「係邊個……邊個咁戀童要同我爭!!」梁晨光摸著自己的光頭，聲撕力竭說著。
常日羲輕輕一指，我們隨著他的方向看……
毛月永一臉沒事的在測試著器材「哦，係呀，我同佢結咗婚。」
「Er??」終於我也忍不住驚訝了一聲
隨後眾人反應過來後「Errrrr???」整個活動室傳出震耳欲聾的驚嘆聲。
秋淑儀無可奈何的一笑看著陳明慧「睇嚟呢個學會，我哋係最正常嗰兩個。」
一聲敲門聲，負責我們學會的副校長進來了活動室，叫走了我們的主席和副主席，時間不知不覺快要將近六點，學會的眾人也準備離去，只留下毛月永與常日羲負責收拾活動室的設備。
在走廊的我忘記戴回眼鏡，摸摸衣衫，才驚覺好像遺留在活動室中，快步回去打開門的時候……
「唔好意思……」我看著空空如也的活動室
只是不到半分鐘，整間活動室已經恢復原樣，而在活動室中的兩人已經不知所蹤。
明明剛剛我一直在走廊中，好奇怪……
我腦海中的預知畫面再次顯現，毛月永與常日羲兩人穿著奇特的服飾，一黑一白，手中拿著一個精緻的舊燈籠，看起來十分詭異。
與此同時的學校天台上，毛月永倚靠被鎖鏈鎖著的大門，看著遠方的夕陽問道「點解你會喺度?」
「同你一樣。」常日羲表情沒有了那種率真的感覺，從旁邊的陰影處走了出來
她緩步走近「點解你咩都唔同我講就走落嚟?」
毛月永默默說著:「我只係唔想你擔心，件事我會搞掂，你快啲返上去。」
「我都係投胎落嚟，返唔到去。」常日羲一同看著遠方夕陽
傾刻間兩人思緒瞬間回到那時候……