市民與公主[短編]: I. 邂逅(1)

我諗呢個世界上開學禮都唔返嘅得我一個。

本應我呢個時候係應該返咗學聽啲老師校長講野，但此刻的我依然係屋企張床度熟睡中。
無他，第一日返學都冇野做，我唔想聽人講野，同埋我今日放自己假就多3日假放。

可惜嘅係，3日真係太短，眨下眼就過咗，我根本就仲未玩夠。

——————

返到班房發覺個個位都已經有晒主人，得返一張係角落頭，而我個朋友阿金就坐到勁遠。




不過都唔差得晒，起碼呢個位唔會引起老師注意，做咩都得。

「星期五做咩事唔返呀俊哥？」一坐低阿金就行過嚟搵我。

「唔想返咪唔返囉，我個日唔返我個暑假就多3日！」

「呢啲野係得你先做得出，都已經中四都係咁。」

「唔好講廢話，功課借嚟。」





「我今晚影相send俾你啦，放心！啲功課上堂先收。」

時間仲早，於是乎我決定訓一陣，好彩就訓到放學，點知冇耐就即俾人吵醒咗。

叩叩叩。

「......」
「做咩呀？」我睡眼惺忪望向前面。

「呢啲係上星期五派嘅野，收好佢聽日交返嚟。另外聽日要交中文嘅暑期功課，做咗未？」




講野嘅係呢班嘅女班長，應該係，反正年年都有佢份。同時佢都係一個女神，呢個稱呼係集唔同男仔嘅意見，投選出嚟，選票來自各個班房，六個年級都齊，絕對公平公正。

佢叫......叫咩呢？死！冇印象添，因為我同佢係冇咩交流。

「妳係？」

「阿詩呀，同班咗3年都唔記得。」

「係，唔好意思阿詩，唔該晒。」
「中文嘅暑期功課，應該......未做。」

「唉～都估到，畢竟你年年都係咁。有唔識就問我啦，唔好抄人地呀！」
雖然佢係女神，但都幾討厭嘅係佢正義都癲，抄功課咁小事都要管。

返到屋企之後，我煮完晚飯食埋洗埋就開始我嘅抄功課大計。雖然係抄，但其實都辛苦，因為都好多版要抄。




所以！我抄中文就算，橫點聽日淨係要交呢份。