佛誕怪奇短篇 - 廢棄村落之浴「罰」節: （二）回憶 - 搜救
「污糟嘢？」四人異口同聲地看着馮伯。
「牛屎湖嗰邊，喺我細細個嗰陣已經變咗做廢村㗎啦，以前細個邊有依家咁多嘢玩呀，有次我同其他朋友一齊去咗牛屎湖嗰邊玩下水，去到嗰陣我哋見到一大班人圍住個佛像喺度唸經。」
「唸經都好正常啫。」小雅插話。
「就咁唸經梗係正常啦，但佢哋除咗唸經，仲會喺個桶度拎啲紅色液體出嚟倒落個佛像度。」
馮伯邊說，邊做出當時那些人的動作。
「紅色液體？唔會係血嚟啩？」比較膽小的子晴打了一個寒顫。
「係咪血我就唔肯定啦，但當時佢哋將啲紅色液體淋落個佛像度之後，我見到個佛像對眼發光，嘴角上揚，個頭仲擰過嚟望住我哋幾個。」
馮伯用力撐大雙眼，兩邊嘴角向外撐，整張臉變得十分詭異。
「佛像識郁？會唔會係你哋睇錯咋？」坤達邊記錄邊提問。
「如果得我一個就話睇啫，就好似你哋依家咁，我哋當時有四個人，個個都睇到，呀，唔係，應該係三個先啱。」
馮伯回想到這邊，眼睛有點濕濕的，好像有淚光似的。坤達一行人只能默默看着馮伯，等他平伏情緒。
「當時個佛像擰轉頭之外，其他圍住佛像嘅人都即刻望過嚟，佢哋全部個樣都好嬲咁，似乎覺得我哋阻住佢哋。之後佢哋十幾人急步走埋我哋度，咁我哋幾個咪走囉，因為實在太驚嘅關係，我哋幾個一路跑一路跑，最後終於返到嚟三椏村。我哋幾個返到嚟之後都即刻匿咗返屋企，完全唔夠膽再出去。本來以為成件事就咁完咗，但點知第二日朝早，我哋先發現其中一位朋友原來成晚無返過嚟。」
「你哋跑返村之後無確認其他人安全就直接返咗屋企？」坤達皺了皺眉。
「嗰陣咁細個邊有諗咁多。而且當時我跑最前，一返嚟見到有人就跑返入屋，其餘兩個人都一樣係直接跑返屋企。直到第二朝，小丁，即係失蹤嗰個人嘅阿爸阿媽問其他人有無見過小丁，我哋先知原來佢無返過嚟。當時我同另外兩個人雖然好驚，但因為小丁失蹤，所以將早一日發生嘅事同其他人講。知道咗小丁個情況之後，幾乎全村嘅人都去搜索小丁，我哋沿路係咁搵係咁搵，但都唔見小丁嘅蹤影。」
『沿路都唔見小丁喎。』
『會唔會我哋睇漏眼？不如返轉頭搵多次。』
『會唔會小丁爬咗上山呀？』
『襯依家日光日白，我哋上埋去睇啦。』
如是者，村內十多名成年人，帶着年幼的馮伯和另外兩名小朋友，沿着往牛屎湖的路上，而及牛屎湖旁邊的山徑樹林位置努力搜索着小丁。
『都係唔見人，會唔會出咗咩意外？』
『小，小丁......』
『你哋唔好嚇丁爸丁媽啦，可能小丁攰得滯搵咗啲窿位瞓緊覺啫，我哋再仔細啲搵啦。』
搜索繼續進行，但不知不覺已經到了中午時間，仍然一無所鑊。
『唔對路喎，附近我哋都搵過晒，都唔見小丁。』
『小丁會唔會已經返咗屋企啦？』
『應該唔會啦，如果返咗去，村入面嘅人應該會過嚟通知我哋。』
村民你一言我一語，但都沒有任何頭緒。
『小丁，會唔會，被噚日班人捉走咗。』
年幼的馮伯，想起了前一天那些古怪的人，脫口說出了自己的想法。
聽罷，村民們面面相覷，在思考着馮伯說話的可能性。
『大家，我諗我哋要決定，係咪要去牛屎湖村。』
『去，梗係要去啦！萬一我個仔真係被佢哋捉咗咁點算。』
『丁爸你冷靜啲先，我明你嘅心情，但......牛屎湖村，你都知嗰度有幾邪㗎啦。』
『邪又點呀？我個仔如果真係喺佢哋捉咗嘅，我同佢哋死過。』
『大家，我求下你哋幫下手，幫下我哋個仔啦。』
『丁媽你唔好喊先，我哋無話唔幫，我哋條村就係得我哋幾戶人，小丁我哋都有份睇住佢大，幫到嘅我一定會幫。但我始終唔可以代大家做決定，咁啦，大家都搵咗成朝，我提議返一返村先，就算真係要去牛屎湖村，我哋咁樣手無寸鐵去都唔係辦法。』
在一輪討論過後，眾人決定先回村裡一趟，但走到一半，卻發現一個可怕的景像。
『大家，你哋望下。』
帶頭的村民突然停下，手指向回三椏村路上旁邊，一條雜草叢生的小路。
只見本應是綠油油的草堆上，其中一部份變成了暗紅色。
『這，好像是血。』其中一個村民用手摸了一摸後，用鼻子嗅了一下。
其他村民露出驚訝的表情，畢竟雖然是山頭野嶺，但三椏村附近並沒有野獸聚居，所以村民才能在此定居，故一般不會有人或野獸經過，亦因此草堆不可能沾上了血液才對。
『阿仔！』
丁爸看到這情況，心頭突然湧起了不安的感覺，推開了其他人後便往草叢奔跑，其他人見狀亦只好跟上，只留下一人照顧包括馮伯在內的三名小孩。
當其他人趕上了丁爸的腳步後，即被眼前的景象所嚇倒。
只見丁爸此刻跪在地上，抱着一具幼小的軀體失聲痛哭。
『仔，阿仔，點解會咁，點解......』
晚一步到達的丁媽，看到丁爸懷內那身上滿佈鮮血，臉色蒼白的身軀，馬上意識到小丁已然離他們而去。
激動的丁媽承受不住這樣的打擊，整個人暈死過去。
其他人只好幫忙扶着丁媽，然後在丁爸旁邊靜靜等待。
『丁爸，我哋抱埋小丁返村先啦，你老婆都要返去休息，我哋返到去再商量下點做啦。』
話畢，丁爸抱着小丁默默地站起來，向三椏村的方向慢慢走去。