佛誕怪奇短篇 - 廢棄村落之浴「罰」節: （一）三椏村

香港，大部人的印象，應該也算是一個現代化的地方。事實上，在發展到如此規模前，香港曾是一個以農業和漁業為生的地方，所以很多舊式村落，都是依山而建，以海為生。
 
當經濟慢慢起飛，基建慢慢完善，很多以往在深山居住，靠海為生的人們，都紛紛搬離了以往居住的村落，亦因為這樣，香港存在着很多大大小小，已經荒廢的村落。
 
這些被荒廢的村落，雖然已經人去樓空，但本來的建築物，和一些帶不走的物品，往往就會被遺留下來。
 
當中，亦包括大量的宗教物品。
 
由於以前的人民，大都比較相信宗教神佛之說。而為了村落平安，一般都會在村內設立自己的廟堂，亦有屬於相關村落的祭祀方式。
 




「喂，等，等埋我呀。」一名氣喘吁吁，身形略胖，名叫阿棠的男性，滿頭大汗地追着前面三人。
 
「你有無咁渣呀，叫你唔好成日匿埋喺房度打機，多啲出嚟運動㗎啦。」其中一名頭載鴨舌帽，身材高挑，皮膚黝黑，名叫小雅的女性，停下了腳步等待阿棠。
 
「阿棠加油呀，再行多十分鐘就三椏村，嗰邊應該有士多可以休息下。」站在小雅旁邊的女性子晴，可說是跟小雅完全相，身材嬌小，皮膚白晢，給人一種深閨的感覺。
 
「我幫你揹個背囊啦。」四人之中最為健碩的坤達，主動把阿棠身後的背囊拿走。
 
然後四人慢慢邊走邊聊，很快便來到三椏村的茶室。
 




「終，終於到啦，老闆，我要可樂加冰，唔該晒！」
 
「你又話減肥嘅死肥棠，仲飲可樂。」
 
「你，你理得我啫，今日咁鬼熱，我又做咗咁多運動，咩都夠皮啦，你唔好飲吖笨。子晴，坤達你哋飲唔飲？」
 
「死肥棠我幾時有話唔飲呀，老闆，加多三罐可樂加冰。」
 
一名滿頭白髮的老人，拿着四罐可樂走近四人。
 




「咦，後生仔，今日佛誕喎，你哋入嚟呢度做咩呀，呢邊無活動㗎喎。」
 
「我哋知道呀，我哋唔係嚟玩，係嚟考察㗎。」子晴禮貌地回應。
 
「考察？呢度荒山野嶺，有咩好考察？」
 
「你好，我叫坤達，我哋幾個都係城市大學學生嚟。因為修讀緊一科有關中華文化嘅學科，需要研究一啲舊時嘅文化。我哋幾個對舊陣時嘅宗教文化有興趣，知道香港有好多村落保留咗一啲獨特嘅祭祀方式，所以先襯住佛誕假期去啲舊村探討下，之前我哋都有去過鎖羅盆村，但嗰邊無乜關於宗教嘅嘢遺留落嚟，所以今次諗住嚟三椏村睇睇有無關宗教嘅嘢可以去考察下。係呢，我哋點稱呼你好？」
 
「叫我馮伯得啦。但我諗你哋要失望啦，我喺度住咗幾十年，最多都係燒吓香，無咩特別。同埋你哋都一眼睇晒，呢度得我哋幾戶人，今日佛誕啲人仲要出晒去，無咩嘢可以畀你哋考察。」
 
「吓，啫係我行得咁辛苦得個吉？唔理啦，老闆畀多罐可樂我。」
 
「死肥棠你再飲就變豬㗎啦！係喎，馮伯，附近除咗三椏村之外，仲有無啲咩地方係有人住㗎？」小雅從馮伯手上接過本應屬於阿棠的可樂，自顧自地喝了起來。
 
「附近？無啦，最近嘅已經係荔枝窩。如果你哋早二三十年嚟嘅話，近牛屎湖嗰邊都可能有人住嘅。」




 
「牛屎湖？啫係印洲塘嗰邊？」坤達拿出了紙本地圖，向馮伯詢問。
 
「差唔多啦。不過無靠到咁海邊，真係要講嘅，應該算係呢啲深山位置。以前呀，因為牛屎湖嗰邊有個位置儲住啲淡水，所以都多人住㗎。不過依家啲人都走晒啦。」
 
「走晒？聽你咁講牛屎湖嗰邊仲方便過呢度，又近海又有淡水，點解會走晒嘅？」坤達拿出了筆記簿，雖然已經是21世紀，但坤達還是習慣用紙筆來記事。
 
「我同你哋講啦後生仔，聽講呀，嗰邊有啲污糟嘢呀。」馮伯壓低聲線，仿佛怕被甚麼別的東西聽到一樣。