每一次扑嘢，都係一場死亡挑戰: 番外篇（8）

由中午到日落，大家飲飽吃醉過後，party就結束。

隔日，阿銘真係send咗幾個求婚策劃公司嘅聯絡電話俾我，仲鼓勵我一定要準備一個終身難忘嘅求婚俾Vincy。

對於求婚呢件事，我攝高枕頭認真諗清楚。

雖然Vincy話求婚只要簡簡單單就得，但諗過度過之後，我決定都係要大搞。

話曬求婚、結婚呢啲都係人生頭等大事，至低限度都要留一個美好又難忘嘅回憶俾大家，等日後可以回味一世。





因此我最後選擇聽取阿銘嘅提議，搵求婚策劃幫手設計一個別出心裁嘅求婚儀式。

適逢下個禮拜係我同Vincy嘅拍拖紀念日，一於就揀呢一日嚟求婚。

求婚策劃公司亦都諗咗一個都幾正嘅求婚計劃。

佢地將求婚場地set up喺中環摩天輪前，另外book咗一隊管弦樂團即場演奏。

當我求婚嘅時候，策劃公司會搵人喺摩天輪上面，不停撒啲花瓣落嚟地下，同時管弦樂團就演奏浪漫嘅樂曲。





就喺一個咁動人嘅時刻，我就會拎出準備咗好耐嘅鑽石戒指，跪地向Vincy求婚。

有歌有花有戒指，再加上我對佢真摯嘅感情，咁樣求婚斷估都實食無黐牙！

苦苦等咗一個禮拜，期待咗咁耐，卒之都等到正式求婚嘅呢一日。

我喺腦入面已經模擬過無數次求婚嘅情景，求婚要講嘅說話亦都背到熟曬，我相信一定可以感動到Vincy。

傍晚時分，日落西山。





我同Vincy一路欣賞美麗嘅夕陽，一路喺中環海濱長廊上散步。

我拖住佢隻手慢慢向前行，只要再行前多一段路就會到達摩天輪前。

求婚策劃公司已經安排好曬所有嘢，等到我地一行過去，管弦樂團就會即刻演奏，跟住就有漫天花瓣從天而降。

喺一個咁美妙嘅環境下，我伸手到褲袋入面拎出求婚戒指，然後單膝跪喺地下，用最真摯嘅感情向Vincy講出愛的宣言。

最後，對方俾我真誠打動，眼泛淚光咁點頭答應我嘅求婚。

「嗯？你今日做咩成日都神不守舍咁嘅？你無事呀嘛？」行行下，Vincy突然停低問我。

「無事，我只係諗緊嘢啫。」

「諗緊乜嘢諗得咁入神？」





「諗緊一啲好重要好重要嘅嘢。」

「下？」Vincy聽得一頭霧水，唔知我講緊乜。

我無繼續講落去，只係想加快腳步，拖住對方快啲行到摩天輪前面。

眼見一切仿佛都準備就緒......

「啊！救命啊！」

殊不知人算不如天算，突然間喺我地面前，出現咗一啲意想不到嘅狀況！

我同Vincy先係聽到求救聲，同埋一連串密集而急促嘅腳步聲。





兩秒之後，我地見到喺大約一百米處有班麻甩佬從摩天輪嘅位置，向住四方八面慌忙逃走。

當中包括埋管弦樂團嘅樂手同埋求婚策劃公司嘅人。

喺佢地身後，有一班面目猙獰嘅女人，發咗癲咁追住佢地。

我同Vincy呆撚咗，完全唔知發生咩事。

直至我地見到有個阿叔跑得唔夠快，好唔好彩俾兩個女人捉到。

個阿叔喺俾人搭住膊頭嘅一瞬間，佢全身當堂定咗格郁唔到。

隨後嗰兩個女人一個剝咗阿叔條褲，另一個就攞把較剪較佢賓周。

唔係講笑，係真係成條嘢chop一聲剪撚斷咗！





「啊！！！！！」

個阿叔下半身大爆血，發出極痛苦嘅大叫聲。

睇到咁嘅畫面，身為男人嘅我感同身受，嚇到同個阿叔一齊大嗌咗出嚟。

仆佢個街！嗰兩個女人竟然咁陰毒剪人賓周、斷人子孫？！