每一次扑嘢，都係一場死亡挑戰: 番外篇（1）

「抱起了幾千攝氏陽光 來讓相戀近乎熱燙
如淚要落下 待我瞬間走訪 能在光速間 蒸發絕望 」

今日我同Vincy嚟到睇Rubberband嘅演唱會。

除咗睇show之外，我褲袋入面收埋咗一隻求婚戒指，等Rubberband唱完首《阿波羅》，我就會拎隻戒指出嚟求婚。

我同Vincy拍咗拖兩年幾，感情一直有增無減，而且大家嘅工作、收入穩定，亦都儲咗一筆錢，所以我已經認定佢係我嘅終生伴侶，亦都ready好同佢步入人生嘅另一個階段。

怦怦！





呢刻嘅我非常之緊張，個心十五十六，諗緊究竟Vincy會唔會應承我呢？

「世界沒有光 火花如驟降
靠我掌心給你釋放 la la la la...」

當樂隊演奏埋成首歌嘅最後一粒音符，我就伸手入褲袋。

就喺準備拎隻戒指出嚟嘅時候，突然間，喺我地隔籬有個男仔向住身邊嘅女伴下跪。





「Ivy嫁俾我啦！」個男仔拎出鑽石戒指向佢女朋友求婚。

佢隻戒指上面粒鑽石成粒花生咁大，閃閃發光，好鬼死掁眼。

然而佢女朋友有啲愕然，唔知點反應。

跟住個男仔由單腳跪變成雙腳跪，以最真誠嘅態度，向對方求婚：「Ivy我真係好想你做我老婆！請你嫁俾我，等我可以照顧你一生一世！」

個女仔猶豫咗一陣，最後點頭答應咗個男仔嘅求婚。





隨即全場拍手歡呼為二人送上祝福，連台上嘅表演者都特登演奏一段結婚進行曲嚟贈慶。

至於我就棟咗喺度，有啲不知所措，心諗竟然同人撞咗「橋」，仲要俾人搶先一步用咗條「橋」。

雖然同一條「橋」無話唔可以同場一齊用，但係條友隻求婚戒指粒鑽石大粒過我嗰隻，搞到我有啲唔好意思拎自己隻戒指出嚟。

再加上條友求婚求咗一輪，佔用咗唔少台上表演嘅時間，如果我都求埋一份嘅話，咁就會好影響演唱會嘅流程。

因此經過一番考慮，最後我決定袋返穩隻戒指，唔向Vincy求婚住。

之後演唱會結束，觀眾陸陸續續散場。

喺我送Vincy返屋企嘅途中，我地講起啱先有人喺演唱會求婚嘅事。

「無啦啦睇睇下演唱會，側邊有人求婚都有嘅。」我先帶起呢個話題。





「其實喺人地演唱會求婚，呢個行為都幾自私。」Vincy表達自己嘅睇法。

「下…係…係咩？」

「係呀！你諗下喎，演唱會嘅主角應該係台上嘅表演者，如果有人突然求婚，咁咪會喧賓奪主，咁樣其實有啲唔係幾尊重。」

「你咁講都…都有道理嘅…」

「同埋個男仔咁樣當眾之下求婚，我相信個女仔俾咁多人望住，一嚟會覺得尷尬，二嚟有群眾壓力，心入面未必enjoy。」

聽完Vincy咁講，我有啲慶幸自己俾人搶先一步，無攞到戒指出嚟求婚。

「咁…你理想中求婚係點樣架？」我打蛇隨棍上問對方。





「求婚呢啲嘢簡簡單單得架啦。」

簡簡單單…？

佢咁講反而考起我，點為之簡簡單單？

「係啦，我地唔好講呢啲住，」Vincy好嗲咁翹住我隻手，挨住我嘅膊頭，「我阿爸阿媽過咗澳門玩，今晚唔喺屋企，不如你上嚟過夜？」

有得同對方二人世界，我當然話好！