每一次扑嘢，都係一場死亡挑戰: 66

眼前嘅槓鈴有成80kg咁重，莫講話用條脷，就算用手，我都未必可以輕易舉得起。

雖然看似係不可能嘅任務，但如果我無辦法將「不可能」變成「可能」，咁試問又點能夠成為一個超級性愛戰士？！

我跪低並彎低腰，將身體貼近地下，然後伸條脷出嚟勾住中間條鐵柱。

再跟住，我雙拳緊握，谷盡全力用條脷向上擔。

問題係，條脷有口水，滑潺潺，根本啜唔實條鐵柱，之後我試咗十幾次，條柱都俾我舔乾淨咁滯，而個槓鈴卻絲毫不動，半吋都無移開過。





「我唔得啦！我放棄！根本都舉唔郁嘅！」

「NO！身為一個男人，係唔可以隨便講『唔得』呢兩個字！」

個天使立即糾正我：「你唔係唔得，只係『未得』 啫！」

「你講得啱！我只係暫時舉唔到，之後一定得！只但係，請問你有無其他『輕ken』少少訓練，俾我熱下身先？」我問。

「有！」





個天使話口未完，即刻啪一聲手指，變走曬啲健身器材，換成兩條繩同一部雙層巴士。

條友將兩條繩分別綁住我左右手嘅食指同中指。

未等佢俾指示，我已經估到佢想點：「你唔係想我用手指拉郁架巴士下話？」

「無錯！假如你練得成比加藤鷹更厲害嘅『金手指』，咁到時要令Mandy同Emily高潮，就絕對不成問題。」

「咁大架巴士，淨都係用四隻手指，點可能拉得郁？」





「正所謂『世上無難事，只怕有心人』，你要記住，呢個世界上無嘢係唔得嘅！」天使語氣激昂。

一架雙層巴士嘅重量起碼過十噸，明知好難拉得郁，但我都唔理得咁多，總之試咗先算。

架巴士距離我大約二十米左右，我拉一拉筋骨，然後吸啖大氣，四隻手指用力向後扯。

第一下拉唔郁，再加兩錢力又拉過。

綁住架巴士同我隻手指嘅長繩繃得好緊，除咗用手指力之外，我用埋臂力加腰力，幾乎全身嘅力都用曬，但好可惜架巴士都係原封不動，郁都唔郁。

我拉到手指都痛，兼且身水身汗。

天使見我頂唔順最後嗌停，俾我抖啖氣休息一下。

「睇嚟你嘅指力真係有待加強。」





隨後，對方又撻一下手指，變走長繩同巴士：「接落嚟，就要測試你嘅腰力。」

我望一望四周圍，今次唔見有工具輔助。

天使解釋話：「要鍛煉腹背同腰力，最簡單、最基本就係做平板支撐plank，我諗你應該都聽過或者做過。」

「係呀，呢個我識做。」

我心諗，終於有返個正常人都可以做到嘅動作。