每一次扑嘢，都係一場死亡挑戰: 53

到食早餐嘅時候，Vincy同我講：「我阿爸阿媽啱先send咗message過嚟，佢地話一個禮拜後先返香港，假如你未想去自首，又搵唔到地方落腳嘅話，你都可以繼續留喺度嘅。」

「真係？」

「見你救過我，幫到嘅我就盡量幫下你啦，不過屋企啲家務你要幫手分擔下，包括吸塵、掃地、洗衫、煮飯等等。」

既然寄人籬下，咁都無理由白吃白住嘅，所以我無考慮太多就應承咗。

食完個早餐我就幫手做家務，大約喺朝早11點嗰陣，間屋終於都有返電。





卒之可以吹下風扇、睇下電視同幫部電話叉電。

電視咁啱播緊新聞，電視台搵咗個地理學家嚟講解今次地震嘅成因，當中涉及各種專有名詞，唔係好聽得明。

不過明唔明都唔太重要，最重要係聽到個學者話佢相信短時間之內，應該唔會再發生地震。

有佢呢句，咁大家個心都定啲。

另外，地震期間錄得超過二十單冧樓事件，包括醫院嗰單，至今傷亡數字超過五十人，估計數字仲會持續上升。





政府宣佈全港停工一日，至於Vincy做嗰間醫院冧咗，佢有嘗試過聯絡醫院嘅同事同上司，但都打探唔到咩消息。

「放心啦，你啲同事、病人應該都會大步檻過，無事嘅。」我同Vincy講。

「望就咁望啦。」

「唔好諗咁多啦，擔心嚟都唔用。」

「都係嘅，希望佢地無事啦。」





然而睇住呢啲關於地震傷亡嘅報道，我腦海中浮現咗一啲好黑心嘅想法。

例如係Mandy同Emily如果喺地震中出咗事，咁咪唔會搵我算賬囉？

只但係Mandy又識武功又識輕功，點會咁容易有事？

至於Emily條仔個老豆係警司，照計有人保護，所以應該都無事。

學Vincy話齋，除非著草走佬，否則睇怕我都係走唔甩架啦。

既然點都走唔甩，咁唯有見步行步，匿得一日得一日啦。