每一次扑嘢，都係一場死亡挑戰: 50

望一望外面，個天已經黑曬。

按照約定，插完一萬下，我就應該離開Vincy屋企，不過Vincy叫我唔好走住。

因為電力設施受到地震影響，到呢一刻都未恢復供電，成間屋黑媽媽，Vincy話佢怕黑，所以想多個人留喺度，等自己無咁驚。

條友又畏高又怕鬼又怕黑，果然係好細膽。

而我橫掂都無地方落腳，咁梗係恭敬不如從命，直接留喺度過夜。





間屋漆黑一片，伸手不見五指，我同Vincy開住電話嘅電筒功能，喺屋入面再搵下有無其他嘢可以用嚟照明。

「噹！」突然間，樓上跌嘢落地，傳出一下好大嘅聲響。

「啊！！！」Vincy嚇到彈起兼尖叫。

我無俾樓上跌嘢嘅聲嚇到，反而俾Vincy嘅尖叫聲嚇親：「嘩大佬呀，使唔使嗌到咁大聲，想嚇死人咩？」

「咁人地真係驚呀嘛！」





見條友咁「蛇gwe」，我忍唔住加快手腳，周圍摷下，搵下有無蠟燭、手提電筒之類嘅嘢，等間屋無咁黑，佢就應該無咁驚青。

搵咗一陣，好好彩俾我搵到七、八支蠟燭以及一支電筒。

光就一定唔夠開燈咁光架啦，不過有少少光總好過黑媽媽乜都睇唔到。

至於墻上嘅掛鐘，顯示依家嘅時間為夜晚八點半。

從醫院張病床醒返直到呢一刻，我都無嘢落過肚，中間仲要又扑嘢又跳樓又騎馬，跟住繼續扑嘢同扑嘢，消耗咗咁多體力，個肚餓到咕咕聲。





好在Vincy屋企廚房唔係用電磁爐，而係用緊煤氣爐。

我地撻著個煤氣爐，煲滾一煲水，然後淥咗兩個杯麵醫肚。

兩支蠟燭棟喺餐檯上面，喺光線昏暗嘅環境下，我同Vincy一齊享用「燭光晚餐」。

雖然斷咗電，但我地嘅電話依然收到訊號，仲上到網。

Vincy一邊食麵，一邊用video call打俾佢旅行中嘅阿爸阿媽，向對方報平安。

我就碌下電話，睇睇今日嘅新聞。

根據新聞嘅報道，原來今日下午喺接近大嶼山及長洲對開海域，發生咗7.4級地震。

呢個程度唔係嘢少，唔怪得震得咁犀利，震到連醫院都冧埋。





咁都死唔去，都算係執返身彩。

同屋企人講完電話，Vincy收咗線，然後問我：「咦？你唔打俾你阿爸阿媽問平安嘅？」

「我老豆老母喺我好細個嗰陣就去咗『賣咸鴨蛋』。」

「哦~~啱先我阿爸阿媽話睇新聞見到香港大地震，嚇到佢地幾乎鼻哥窿無肉。」

「新聞都登咗出嚟，據報地震程度有成7.4級。」我將部電話遞俾Vincy睇。

「嘩，唔怪之得震得咁勁啦。」Vincy睇完一條新聞，再碌去下一條。

佢發現有條新聞片，影到我地今日跳落樓嘅畫面：「Tony你睇下！」





條片離遠影到有兩個人影從醫院六樓跳落地下，雖然影得唔算好清，但片段入面見到有個男人抱住一個護士，好明顯就係我同Vincy。

依家諗返起當時嘅情況，其實都幾驚險，跳遲一步隨時都收得皮。

之後Vincy一邊食麵，一邊再碌落去，開下其他片出嚟睇。

睇下睇下，佢見到一條幾日前，我抱住Emily從酒店十八樓跳落巴士車頂嘅片。

呢條片我連本人都未睇過，估唔到當時嘅情形俾附近嘅人拍低咗。