補習社的女同事: 自我介紹

約定番工時間係一點至八點，咁我第一日就想留個好印象，於是就早少少十二點五十分番到去。

一撳門鐘，上次係reception嘅女仔就開門迎接我「Hello你好，請入嚟。」

「上次好似未正式自我介紹，唔好意思。我叫Regina，係呢度嘅老師，主要教英文同坐reception位，有咩唔明你都可以問我。」佢嘅溫柔聲線、態度同笑容又令我對佢加分。

「好呀，咁請問第一日我可以有咩做呀？」

「你……你呀……聽趙sir講，你之前都有教過補習社，係咪？我可以同你簡單介紹下呢度嘅教材、設備同配套。」



去到呢個時候，我發現補習社最入果間房未有開燈，於是我問：「想問下呢個時間老闆趙sir係咪未番嚟，定係咁啱出左去？好似得我地兩個。」

「係呀，佢地平時可能兩三點先番，所以通常頭一個鐘都得我係度，而家就有埋你咁解。」

「哦，明白。」估唔到一個簡單嘅提問，令我覺得可以同呢位叫Regina嘅Miss獨處，有種暗自歡喜嘅感覺。

跟住落嚟，我地花左唔少時間了解對方……嘅工作經驗同心得，有左初步交流，之後工作上都更容易配合大家。

「去到呢步仲有咩唔明或者想問嘅地方嗎？」



「暫時無」見到趙sir番嚟，獨處時間結束，興致索然，我都未有興趣再繼續問落去。

頭個一兩星期嘅工作尚算輕鬆，都係睇下功課班同開始教專科班。後來學生多左，亦都要應付家長嘅查詢，工作量自然都多左。

有日放工之時，Regina走過嚟問我「點呀Cyrus？你覺得呢份工感覺如何呀？」佢突如其來嘅關心令我有點意想不到。

「哦……幾好呀，有d同學都幾聽話，家長都有時nice嘅，只係有一兩個比較棘手啦，因為講左唔少次叫佢地專心，佢地都坐唔定。」

「呢度有d學生係咁架啦，不過我睇過你嘅表現都唔錯，有時對曳嘅學生再惡少少同嚴少少就得架啦，加油啦！」呢次係我第一次聽到佢同我講「加油」



「好嘅，我會架啦！」

「拜拜」Regina今日嘅拜拜，令我覺得特別甜美。