補習社的女同事: 初次見面

到左面試當日，我食完早餐就出門搭港鐵去荃灣。

一路上，我練習左幾次自我介紹，同埋諗定幾條情境題，只要到時唔好有咩差錯，我應該下星期可以番到工。

「原來呢棟商業大廈係呢個位置......」大廈距離商場有少少遠，比較近住宅區，入口並唔顯眼，不過可能近住宅都令唔少家長揀帶小朋友嚟呢邊上堂。

入到𨋢，撳左5樓，我就咩都唔諗，順其自然，正常發揮就好。

到左5樓，撳門鐘，推開貼左磨沙玻璃嘅大門，我發現雖然全間補習社都開左燈，但好似只有一個女仔坐左係reception。



咦？打電話比我果個係男聲，唔通佢係老闆？點解會得個女仔係度嘅？

「Hello，我係嚟面試嘅。」我有少少腼腆咁同佢講。

「哦～係咪約左今日十點嘅Cyrus？你可以……係呢間房坐住先。」

「好的，唔該你。」我坐低之後，抹走額頭少許汗水，就坐定定乖乖等老細番嚟interview。

一直以嚟，番咩工都好，我都鍾意同女同事相處。除左因為佢地樣靚身材正……咳咳，除左佢地辦事效率唔錯，重點係佢地多數都比起男同事更加善解人意，溫柔體貼，好難唔受人歡迎。有女同事嘅地方，感覺我做野都會特別醒神。



呢段等候嘅時間，我望住佢嘅側面，同埋回憶起頭先同佢四目相對嘅瞬間，我個心就自然覺得幾舒服。佢個樣比較清純可愛，睇落大約25/6歲，似係無論素顏定淡妝都無問題。身高比我矮少少，又唔會太過嬌小，可以話佢就係我嘅理想型之一。

重點係，聽到佢把聲，我就覺得特別好聽。呢種感覺似乎令我第一次見到佢，就對佢有少少心動。

過左十分鐘左右，老闆番嚟啦。佢地同我安排左大約大半個鐘嘅面試，感覺順順利利，應該可以成為呢度嘅一分子。

三日後，我收到一個電話，然後正式加入呢間補習社。