《是咁的，我係做極極尼嘅卡通公仔》: 第四集

睇咗三集之後，發覺好似呢份工都幾開心，每日都好似俾女圍咁，係啲辛苦位你唔知啫。
-
試諗下而家室外氣溫三十五度，你入嚟極極尼排隊玩一啲室外設施，企十五分鐘都已經出晒汗，何況我哋要焗住喺公仔衫入面，仲要同你哋班賓客喺度嘻嘻哈哈。
-
室內影相區都還可接受，有冷氣都冇咁焗，一出到去同陽光玩遊戲就誇啦啦！
-
暴曬當然唔使講啦，想當年仲要有大型巡遊，由劇場沿著大路巡去大街頭，再加上唔係個個都有車坐，要著住件衫慢慢行。不過好彩，而家淨係上架巡遊火車，企喺火車揮揮手，輕鬆喺車上面轉兩個圈去到街頭就收工落車，雖然都係熱㗎喇，至少起碼唔使咁曬啊！
-
曬，冇問題，因為笠住公仔嘅曬，都不及一班靚女公主辛苦。笠公仔嘅我，可以喺入面著少啲衫，亦都可以偷雞痴退熱貼散熱，但公主又要化妝，又要著沉重又厚實嘅公主衫，同時又要保持住自己嘅儀態。
-




係熱，不過我都好享受呢份工，好鍾意夢幻樂園帶出嚟嘅氛圍，無論喺度做嘅員工定係遊客，入到嚟之後都可以追隨自己嘅夢想。
-
可惜……啲遊客對待公仔啲行為真係呢……
-
（待續 To be continued）

IG：chingchingstory