【已完結】【廣東話】《魔都姬神：退魔巫女千夜》（走甜健全作死日更小說企劃）: 其之十

其之十



話說千夜一行向下行，棄守突圍嘅Echo Team向上行，雙方終於響11樓會面，
但情勢卻唔係想像中咁和平順利。

「舉高雙手！你咃係咩人！？」

「搞咩呀自己人呀！」





「阿頭明明重傷響18樓，有咩可能響呢處出現？！一定有鬼！」

「冷靜啲先！唔好開槍呀！」

「Delta2！」千夜身邊由18樓落嚟嘅馬上意會到係咩事。

而佢身邊嘅兩人聽到亦馬上報數「Delta3！」

「Alfa1！」





「扮得幾似呀，但係大隊長Alfa1隻腳斷咗都企得咁穩會唔會太假呀？」

「妳呢？妳又係咩人！？」

相反，千夜仲理解緊咩事「我？我…我係退魔協會嘅神樂千夜……」

「條女連槍都無應該無威脅…」

「你都痴線…響呢處著成咁先係最可疑果個呀！」





的確…千夜只有五尺身高配上性感巫女服裝束，響一班平均六尺幾全副武裝嘅猛男堆中異常突出。

「…你話你係自己人，除低面罩俾個樣嚟睇下。」

「ＯＫ無問題…」

「慢慢嚟唔好諗住出古惑呀！」

「你哋先係…唔好手震走火呀！」

於是一行三人慢慢除低面罩表露身份。

「點呀，信係我哋未呀？」





「…點先證明你哋唔係妖魔假扮？」

「…好問題，你想我哋點證明？」

「可唔可以等小妹講幾句呀？」呢個時候千夜開口。「而家仲有隊人困響地牢等緊我哋去救，可唔可以俾啲信任唔好浪費時間呢？」

「咁嘅環境仲要對外通訊被干擾你好難要我哋毫無戒心喎！」

「係囉，一係妳除低件衫驗明正身先啦！」其中一個明顯見色起心嘅隊員對千夜出言不遜。

「小喇叭你條打靶仔呢個時候正經啲得唔得…」作為帶住三隊人入嚟嘅大隊長Alfa1好自然反應咁即刻小佢。

然後，因為咁，Echo1笑一笑就放下戒心將槍口指向地下。

因為佢相信眼前呢個真係死過翻生執返條命嘅大隊長Alfa1。





［次回待續］