命中注定我與妳?: 33. 她喜歡的早餐

F.4嘅夏天，考完大考後嘅我地，除左補課外，仲同英華女校有個聯校中樂團表演
 
而地點，又係英華女校
 
冇他嘅，媽咪學校成座山咁大，而我地果到又冇咩位擴建……
 
而我今次，就係皇仁書院嘅攝影組
 
我所用嘅器材都係來自爸爸。因為爸爸經常都同姨丈去影相(女)，而爸爸見我影得唔差，佢就送左D同鏡俾我
 




因為媽咪關係，所以我唔洗返學校先，我係直接去英華等班同學黎
 
就當我係小食部叫奶茶時，小食部英姐走出黎同我傾計
 
「浩翹，你又黎啦」
 
「英姐，當然我要黎啦，妳沖嘅奶茶咁好飲」
 
「你真係丫…似足你阿哥」
 




「咁都係同一個媽咪生架嘛」
 
「咁你會唔會好似哥哥咁，係英華搵返個女朋友呢?」
 
俾英姐問一問，我都心虛左一陣
 
雖然我係由細開始就鍾意慧思，但係近年又多左個嘉怡出黎。我對嘉怡唔係冇意思嘅，但係我鍾意果個始終係慧思，真係好難揀下
 
我不停R頭
 




「浩翹，你人仔細細就吸引到媽咪D學生，真係同哥哥一樣」
 
「我吸引到英華D女仔?」
 
「上次你開放日，好幫4D班嘛，阿姐我一眼就睇穿左有女仔對你有意思啦」
 
「英姐…唔會掛」
 
「唏!阿姐我係到幾耐呀，4D班學生而家仲經常提起你，佢地知道你今日會黎，佢地好開心添啦。不過英姐知道呢…你心中係鍾意Miss Cheung個女呢?」
 
咁阿姐都知?
 
「邊…邊係呀英姐…..」
 
「你同慧思兩個好細個開始就成日係學校手拖手出現，阿姐我好清楚，你地媽咪都好清楚」




 
我放得杯奶茶慢慢諗
 
「但係英姐….我唔知姑姐….」
 
「我都係老師間聽過傳聞，不過上一輩嘅事，就唔好累到你地啦，知道嘛」
 
「我知啦英姐」
 
然後我聽到一大班女仔嘅傾計聲，應該係依嘩鬼叫聲
 
係女仔埋中，我見到嘉怡
 
佢仍然扎住對孖辮
 




「Clodulf!!!」
 
「妳咁早嘅?」
 
「咁要準備表演嘛，我連早餐都未食呀…..唔講住啦，我去後台先」
 
嘉怡跟全其他同學去後台睬排
 
而我呢?就去左英姐到買一份豬腸粉加燒賣同檸檬茶俾嘉怡
 
呢個早餐配搭，係英華之中好受歡迎
 
我自己行到去後台，果然佢地一班中樂團係到準備緊
 
大家放好自己嘅樂器，準備行返出黎果時，有同學發現到我




 
「下?咁早d Queens仔就到?你點樣黎我地後台架?」
 
「我?」我指住我自己
 
「係呀!你一個人?」
 
「我係呀」
 
「你點入到黎架?」
 
大家報以奇怪眼光望住我，此時，係最後嘅嘉怡見到就行上黎
 
「Clodulf?你入邊做咩呀?」
 




「搵下妳囉」
 
「咁呀….」
 
音樂老師對於我擅自走入學校有d不滿
 
「同學，你唔可以咁樣擅自走入我地學校架喎!」
 
唉，睇黎呢個老師係新人
 
「呀…Miss Yeung….佢唔係擅自入黎架…..佢係….」
 
「如果唔係擅自入黎，點會得一個男仔?立即搵訓導主任黎!!!」
 
妳地個訓導主任而家應該係教員室瞓左係到
 
有同學打電話上教員室，話有男仔進入結界，姑姐好快就游落黎
 
佢一到後台就見到我
 
「浩翹你係到做咩呀?」
 
「我拎野入黎」
 
「Miss Cheung!呢位同學擅自走入我地學校」
 
「唔緊要呀Miss Yeung，佢入黎嘅話，係用正常方法」
 
「正常方法?」
 
「冇錯，你冇同老師講咩?」姑姐望住我
 
「佢地一輪咀咁講，我邊有野講呢?」
 
「咁你話俾人知啦」
 
我望實中樂團「各位，妳地嘅訓導主任大白鯊…」
 
「吼!!」
 
「係我姑姐」
 
「下??」
 
「生物科科主任林雪凝老師，係我媽咪。美姐同偉叔係我阿哥女朋友嘅屋企人」
 
「Miss Lam呀…」
 
「仲有…我叫妳地校長做婆婆，敢問，我入黎仲需唔需要申請?」
 
大家望住擁有後台嘅我都唔敢出聲，所以我趁呢一個機會，幫佢地影左一幅相
 
「咔嚓」
 
「我仲係今日嘅攝影組添」
 
「喂!!!!有冇影我地影靚d架」
 
「當然有啦」
 
姑姐呢個時間打完場「好啦，妳地去休息下先啦」
 
我同嘉怡去到休息室，我遞份早餐俾佢
 
「拿!請妳食架」
 
「你..做咩買俾我?」
 
「咁妳未食早餐嘛」
 
「唔該你」