命中注定我與妳?: 23. 媽咪的學生

「同學，妳拎唔拎到咁多野呀?」
 
睇佢個樣真係好亂咁，明明自己兩隻手拎唔哂，仲要不停拎野
 
我幫佢執起地上跌左嘅野，然後幫佢拎住
 
「唔…唔該哂你呀」佢一頭亂髮咁向我道謝
 
「搞咩呀妳?個頭咁亂」
 




「呀…」佢面上有少少難色
 
「瞓過龍?」
 
然後佢就微笑點頭
 
「妳俾D野我先啦，妳梳好個頭先，就算係星期六，都有機會俾大白鯊見到」
 
「哈，你都知邊個係大白鯊呀?」
 




「點會唔知，佢咁出名」我仲同佢好熟添
 
當佢扎好辮後，就想自己拎返哂所有野
 
「我陪妳上英華啦，我都有事去果到」
 
「唔該哂你」
 
係巴士上，我地兩個坐埋一齊
 




「你邊間學校架?要去我地學校?」
 
「我讀Queen屎，妳Form幾呀?」
 
「我F.4囉，你呢?」
 
「同妳一樣啦」
 
好快巴士到左英華女校站，我同佢一齊落車，直接行入學校
 
佢見到我直行，完全冇打算停低，所以佢就拉住我
 
「呀….你唔入得去架…」
 
我轉身對佢「難道妳拎得哂?」




 
「咁樣…」佢都呆呆咁諗
 
「我幫妳拎上去啦，俾人問起，我識答架啦」
 
於是我就同呢個F.4女學生一齊拎野去學校
 
我睇一睇四周，有好多學生返左黎
 
「咦?今日咁多人嘅」
 
「係呀，下星期開放日，好多同學都趁今日返黎處理D野囉」即係媽咪今日叫我返黎幫佢整野?
 
我跟住佢慢慢行，F.4A…4B…4C….4D…
 




佢係4D班門口停低左
 
「我到啦，唔該哂你」
 
「唔洗客氣」
 
佢一打開門，佢其他同學就一齊望過黎
 
「D野放低係張檯到得啦」
 
正當我想轉身離開果時，佢叫停左我
 
「呀…我仲未知你叫咩名…」當時佢塊面有少少紅
 
「我叫Clodulf，程浩翹」




 
「我叫Winnie，孫嘉怡…呀…不如你留低聯絡方法丫」
 
我係張紙上寫低我電話俾佢後，就向教員室出發
 
結果未去到教員室，就已經見到媽咪
 
「浩翹，你幫我果班手整野丫，佢地雞手鴨腳咁樣」
 
「妳果班?邊班呀?」
 
「F.4D，你而家過去先啦，我一陣過黎，係門口等我」
 
我再一次返到4D門口，果然Winnie佢地真係雞手鴨腳，就連釘槍都唔識用
 




我真係睇唔過眼，好快係佢地d女仔手上拎過枝釘槍，幫佢地係璧報上釘野
 
佢地個個都俾唔到反應我
 
「仲有咩要整?趁我仲係到」
 
我咁樣問一問，當堂成班個個回哂魂
 
「有呀!!!!」而且非常開心
 
「終於有人幫到我地啦!!!!」
 
「邊到邊到?」我好起勁咁幫班女仔手，結果媽咪入到黎我地都唔知
 
因為成班都依嘩鬼叫咁整野，可能有男仔係到，佢地特別興奮
 
「妳地做咩咁興奮呀?」一把聲音係門口傳過黎
 
佢地成班轉身一望
 
「Miss Cheung….」
 
而我都好乖咁講左句
 
「姑姐」
 
佢地成班瞪大隻眼望住我。既然姑姐係到，咁媽咪都應該差唔多到
 
就係我叫完姑姐後5秒，媽咪黎到
 
「Miss Lam」
 
「媽咪」