命中注定我與妳?: 19. 第一日中學生涯

9月1 日，我拍熄個鬧鐘後，起身著住新校服
 
係廳到食好媽咪煮嘅早餐，然後就出門口
 
去到32樓，電梯門打開，係我眼前出現左個著真光3000藍色長衫校服嘅慧思係到
 
「早晨」「早晨」
 
我地兩個打完招呼後，佢對我條白色校褲好有興趣
 




「妳做咩呀?係咁望住我條校褲」
 
「其實…你唔怕走光架咩?」
 
「咁我著白色底褲咪得囉!!!阿哥教嘅!!!!」
 
老實講，我真係好怕著白色校褲會走光
 
我地一齊上左爸爸部車，車上仲有媽咪同姑姐
 




係車上我望住慧思，佢扎起對孖辮，加埋套長衫校服，真係好襯佢
 
首先，爸爸車我地去大坑真光
 
姑姐同慧思落車後，佢地影左張相
 
「浩翹!」
 
「係!姑姐」
 




「你黎同慧思影一張丫」
 
「我地影?」
 
「係呀!!小學雞升級啦嘛」
 
慧思揚揚手叫我過去佢到，佢隻手撓住我影左張相
 
相中嘅我地，笑得好開心
 
「一陣等埋妳放學返屋企?」
 
「唔…女校喎，一係…我地係starbucks等啦」
 
「好啦」




 
自從上次勾左手指尾後，我同慧思都當果件事冇發生過，每次見到大家都笑得好開心
 
究竟佢真係當我係佢哥哥定係點呢?
 
我踏入皇仁，直入F.1D班，坐低係位到
 
班主任一入黎就係到巡視我地每個人，佢手上有哂我地嘅資料
 
大家來自咩小學、成績係點全部都好清楚
 
「程浩翹，Clodulf」
 
「係」點名果時，班主任畢SIR望住我
 




佢望一望我file再微笑
 
「歡迎你黎到皇仁，英華女校嘅男同學」
 
大家一聽到我係英華女校嘅男仔，個個都好困惑，究竟係咩一回事
 
「大家唔好困惑，只係佢媽咪係我地友校嘅老師」
 
即係代表我又走唔出媽咪五指山
 
望見我班同學，好多都同我一樣，薯下薯下
 
好快我地第一日就放學
 
我依約定去starbucks到等慧思，坐低係到等佢果陣，我都見到d同學放學




 
當慧思到果時，佢同幾個同學講bye bye
 
咁快識到同學?我立即打左自己個頭一下
 
係喎，佢係真光小學架喎，d同學好多都揀返真光中學，佢識多朋友一d都唔出奇
 
「點呀?識唔識到新朋友呀?」我地係地鐵上傾計
 
「我?暫時未呀，不過今日個班主任已經介紹我係英華女校黎嘅男同學」
 
「其他人咩反應呀?」
 
「呆下呆下囉，如果俾佢地知道我係英華搶閘出世、同埋我屋企同英華關係嘅話，可能會引起好大回響添」
 




「係囉，點解英華唔破例收你呢，你都係果到出世囉」
 
「女校男生?我冇咩興趣喎」
 
「俾一大班女仔圍住喎，好似契爺當年咁」
 
「我真係冇興趣」
 
「點解呀?」
 
「妳唔係到，冇興趣」