命中注定我與妳?: 11. 愛神之箭

我同慧思係到溫緊書果時，媽咪就打開門返黎
 
「媽咪!!」「契媽!!」
 
「乖啦，你兩個有冇乖乖地做功課呀?」
 
「有呀契媽!不過哥哥唔肯教我數學」
 
「妳係要我幫妳做，唔係要我教妳」
 




係果時，我先見到家琪姐姐
 
「Natalie，妳唔洗怕羞，入黎先啦」
 
「係…知道..」
 
佢比起之前更加靚，而且瘦左唔少，呢個四眼妹，再加咀角一粒好細好細嘅墨
 
佢真係好靚
 




「慧思呀，呢個姐姐係妳媽咪果班嘅學生，佢可以教妳數學架」
 
「真嘅姐姐?哼!我有姐姐教我!!唔洗你啦」
 
聽到慧思咁講，我就繼續自己溫書
 
我不時偷望家琪姐姐，佢笑起上黎好甜
 
到左家姐返到，佢地就三個女仔係到溫書
 




「慧思妳好叻喎」家琪姐姐不忘讚慧思
 
「邊係呢?我真係數學白痴黎架」
 
「其實數學唔係好難，妳有唔識可以搵我教妳架」
 
佢地三個女仔邊溫書邊傾計，非常開心
 
然後，阿哥放學返黎。今日佢幫媽咪去買餸返黎，不過佢一入門口果時，就已經見到家琪姐姐對鞋
 
要知道，阿哥表面上好有陽光氣息，實際上，佢係好怕羞，特別係對住著長衫校服嘅女仔
 
但係佢自己有個讀培道嘅女朋友喎
 
「家姐妳帶左同學返黎呀?」




 
「唔係呀!佢係媽咪帶返黎架，佢係姑姐果班」
 
阿哥拎左d野俾媽咪後，就好快返左入房
 
不過我發現，家琪姐姐見到阿哥果時，佢係呆左一呆喎
 
唔通…愛神咁快就用箭射中家琪姐姐?
 
「姐姐?」慧思係佢身邊叫一叫佢
 
「呀…係」
 
「妳好攰?」
 




「呀…唔係呀，諗緊野者….」
 
慧思呢個時間同我目光對上左，然後我地一齊望一望阿哥間房同對大家奸笑
 
我地兩個發現左相同嘅事喎
 
溫習完畢，家琪姐姐去左家姐間房，而慧思就走去我到
 
「喂!你頭先見唔見到呀?」
 
「點會見唔到?」
 
「家琪姐姐呆左一下喎，你估佢會唔會鍾意二哥哥丫啦?」
 
「妳咁八嘅」




 
「你唔想知咩?定係你仲當佢係女神呀?」慧思有少少不滿
 
「女…女神?」我開始有d心虛
 
「我認得佢架，余家琪，佢住係英華入邊嘅宿舍，佢媽咪係工友」
 
「妳…妳點知架」
 
「佢F.1果年，daddy車過佢返屋企，佢之前住北角，係唔係?」
 
「妳點解覺得我會知?」
 
「佢係醫生公公嘅病人囉」
 




真係咩都瞞唔過佢
 
「你唔係對佢念念不忘咩?佢係你個排球女神」
 
「妳…妳都識講，佢對阿哥有意思啦，唔好想太多啦，我唔會鍾意d大我咁多嘅女仔」
 
「真係?」
 
「係呀」
 
「算你啦!」