命中注定我與妳?: 6. 女排冠軍

第三局開始果時，家琪姐姐已經坐返係後備席休息，場上繼續由高form嘅大姐姐比賽
 
既然唔係女神落場我又冇咁緊張睇波，可惜，我所有動靜都俾慧思盡收眼底
 
佢一腳踩落我到
 
「喂!你女神唔落場你就唔睇呀?」
 
我望住個比分其實都唔洗睇，已經8-2領先緊
 




「唔?家姐都贏緊咁滯啦」我講完又坐返低
 
家姐贏到11分後，家琪姐姐又再次落場
 
我一見到佢起身上場，我同時間坐直個人
 
「呵!你好呀你!一見到女神上場就坐到直一直」
 
慧思又撓實雙手嬲爆爆咁，有見及此，我伸手去捉實佢
 




「做咩喎，你睇女神咪得囉」
 
「話明女神，就當然唔可以擁有架啦。妳好過佢好多」
 
「真係?」
 
「咁我都唔會鍾意D大過我好多嘅姐姐架嘛」
 
「算你啦」
 




慧思又俾我拖住黎睇比賽，而我地雙手就愈捉愈緊
 
因為對手開始大反擊，如果呢局輸埋的話佢地就直落3-0，好冇面
 
所以對方不停咁加強攻勢
 
不過話明係擁有我家姐坐陣嘅球隊，點會咁易就俾人打低?
 
隊長大喊一聲，當堂大家都醒一醒重整旗鼓
 
係呢個情況下，家琪姐姐俾人換落黎，因為佢地幾個後備球員所代替嘅正換隊員已經休息夠
 
比數由12-11，開始再次拋離對手
 
打到20-13果時，家姐佢地再叫左暫停




 
佢地係最後呢5分入邊，打算不停咁強攻對手，唔俾對方有休息嘅機會
 
到最後一分家姐跳高黎一下扣殺
 
然後佢地成班開心到攬埋一舊咁喊
 
佢地成為左學界女排冠軍
 
頒完獎之後，佢地一大班好開心咁跳住出黎好開人咁將D野放係學校部車到
 
不過家琪姐姐係唯一一個姐姐跟學校車走
 
佢臨走時，隊長仲同佢講
 




「Natalie，d野等我地星期一再執啦，妳返去宿舍休息下啦」
 
家姐走過黎我地身邊，佢個樣非常開心
 
係家姐成功背後，佢付出左好多
 
同時間，對手嘅校長行過黎家姐身邊
 
「請問妳係唔係程詩敏同學?」
 
「係，請問有咩事?」
 
「我係女拔萃嘅校長，剛先我見妳表現非常好」
 
「多謝哂妳校長」




 
「我開門見山講啦，我想請妳過黎我地學校讀書」
 
家姐竟然收到對手邀請?
 
「校長…妳即係，想我轉會過黎?」
 
「冇錯，當然我地會負責妳嘅學費同埋其他費用。而且我地都會肯定妳一定入到大學。妳諗下，唔好放棄呢個機會」
 
不過對方校長應該唔知道家姐來歷，因為英華女排都係近年先打返上D1
 
「妳可以帶領住英華係兩年間，由D3升上D1，證明妳打波好有天份」
 
「過獎啦校長，帶領球隊嘅係隊長而唔係我」
 




「我都知道，但係妳仲係F.3，如果妳肯過黎女拔嘅話，妳一定可以連續幾年再贏學界冠軍」
 
「但係校長，背叛學校嘅事，我做唔出」
 
「或者，妳同屋企人傾下先?妳有冇細佬妹?」
 
「我有兩個細佬。一個F.1，一個小二」
 
「如果妳肯過黎，我可以同男拔講，叫佢地收妳兩個細佬讀書」
 
女拔校長好似好想得到家姐咁