風之鍊金術士譚:與異世界女高中生之邂逅: 第20章: 燒烤與回憶
第20章: 燒烤與回憶
首先，漢什先手拿著魔法火柴，並開始詠唱把魔力注入......
「咦？枝火柴嘅頭開始發光嘅。」巧晴對此感到驚奇。
然後，火柴上的白光亦點著了變為火花並使火柴頭燒著出煙……
「真係點火柴咁燒著咗喎！」
「但咁細火夠唔夠㗎？」巧晴擔心這樣火苗是否足夠點燃營火。
「睇嘢啦！」
之後，漢什就把這已被點燃的火柴直接丟入堆好的柴火堆中，使其立刻被點燃起來，變為可以足夠用作保暖或煮食的營火。
「立刻成堆營火點著咗啊……點做到㗎？」巧晴當場驚訝問道。
「咪用魔力嚟點著囉，魔法火柴就係把注入嘅魔力轉化成魔火苗，而佢一點到柴火就會轉化成營火㗎啦。」漢什向巧晴說明魔法火柴的原理。
「好神奇喔……又係鍊金術整嘅道具？」巧晴已一口推定是由鍊金術所造的。
「你真係聰明啊！佢都係用鍊金術調合所造嘅成品嚟，遲啲有機會我教你整啊。」
「好喔！」
接下來，漢什就用堆柴火堆時剩下的樹枝，把在湖中抓到的魚分別在串燒般串住，並把其中兩條給予巧晴拿住，之後兩人就一同把這些串好的魚以像一般戶外燒烤一樣去對著火堆來慢慢將其烤熟。
「好似以前BBQ咁啊......搞到我開始諗番起以前啦......」
然而，這樣的燒烤情景卻令巧晴不經不覺地起了思鄉之情......
「哎！凌凌，你啲牛丸燶啦！」
突然間，有一名戴著眼鏡的少女對巧晴提醒著，看來““凌凌””是巧晴朋友對其的暱稱。
而這名少女、巧晴以至在場大部份的同齡少女少年均是穿著巧晴所讀中學的體育服，看來這是巧晴在過去中學學校旅行燒烤時的回憶......
「係喎！死啦......啩住傾計冇睇住啲嘢食㖭！」
巧晴立即急忙地反一反手上燒烤叉，以烤一烤這些牛丸還未燒焦的那面。
「你再燒一燒另一面先，可能嗰度反而未熟㗎。」另一名女同學像馬後炮般提醒巧晴。
「唉......」巧晴對於此情況也一臉無奈。
「係喎，你哋畢業之後諗住點啊？」
突然間，該名戴著眼鏡的女同學突然問及同爐其他人的前途問題。
「Mandy，做咩無喇喇問呢啲嘅？」
巧晴有點感到奇怪地反問道，而““Mandy””應該就是該名戴眼鏡少女的洋名，至於她的本名是羽茵，是巧晴在中學時最要好的朋友。
「因為我哋今年都中四，兩年後都考DSE囉，所以就想問一問吓你哋將來想點。」羽茵說出會這樣問的因由。
「咁啊......其實坦白講，如果淨係講中學畢業之後，我諗住去外國升學，順便見識下出面嘅世界。」巧晴有遠見地回道。
「趁後生出去闖吓都好嘅。」一名同爐的男同學插著嘴說。
「咁凌凌你有冇話想去邊個國家升學㗎？英國？美國？定台灣啊？」羽茵繼續追問巧晴。
「如果要我揀......我諗應該都係英國㗎啦。」
「英國？好貴嗰喎，不過以你屋企嘅收入，要供你去英國讀應該冇問題嘅。」羽茵以羡慕的語氣回道。
「我只不過算係小康之家啫，而且以我同老豆現時咁嘅冷戰狀態，都唔知肯唔肯供我去英國讀書㗎。」巧晴謙卑又帶著一點憂慮地說著。
「咁Mandy你畢業後有咩打算啊？」巧晴反問著羽茵同樣的問題。
「我可能同你有啲似，不過我係諗住畢業後先去外國Working Holiday一至二年，到真係搵到自己人生目標之後再作打算係讀書定其他嘢。」
「咁都幾好啊。」
「嗯......不過無論將來會有何打算都好，我都希望我哋大家都可以一直做好朋友，友誼長久！」羽茵衷心期盼著。
「冇錯，我都係咁諗㗎！」巧晴同樣如此希望。
「我都係！」同爐的其他同學也表示認同。
在此時，巧晴也衷心希望她自己和羽茵以至其他朋友的友誼可以一直長久，直至畢業之後也不變......
「喂！巧晴，你要反一反條魚啦，如果唔係燶㗎啦！」
但是，漢什突如其來的提醒把巧晴從回憶中拉回現實......
「係咩係咩......唔好意思，我立即反！」巧晴回神過來並急忙回應。
同時，巧晴亦先把手拿著的烤串魚反轉去燒，以防止出現有一面烤焦的情況。
「點解會無喇喇諗返起中四學校旅行時嘅嘢㗎？」
「唔知羽茵同其他朋友依家點呢？或許喺佢哋眼中我已經離奇失蹤咗成個幾禮拜……佢哋應該都好擔心我㗎啦……」巧晴在心中憂愁著。
「而且……或許可能佢哋已經將我張相同資料放哂上Facebook…….同Telegram嘅尋人group啦……今次我真係出哂名喇……」
「你頭先做咩發呆啊？」同樣正在烤魚的漢什向巧晴問道。
「冇嘢......我諗返起過去同香港啲朋友嘅往事啫。」巧晴一說到這裡時難免因思鄉而感到傷感。
「咁啊......唉......」
漢什又感到有點虧欠巧晴，因為她自知是他自己令巧晴現時要流落這個世界，因而被迫和家人朋友分開。
「漢什佢又咁啦......我諗佢都好內疚亦覺得係佢自己害咗我啦......」巧晴也一眼看出了漢什現時的想法。
但是，巧晴卻仍礙於面子及原則問題，仍然不能直接向漢什表示完全原諒。
「不過呢.....回想返起我仲喺香港嗰陣時，本來諗住去外國讀書係因為想駁吓之後畢業有機會移民......依家我咁樣真係移咗民喔......雖然係移民去異世界咁解。」巧晴此時苦笑自嘲著。
「你講咩啊？」
「冇乜嘢啊漢什，繼續燒條魚陣間食啦，我估我哋都肚餓㗎喇。」
「嗯。」
之後，巧晴和漢什就繼續在此營火烤魚，期間也會互相談一些較輕鬆的話題打發時間，直至他們的魚均烤熟為止......
「哎？啲魚得囉喎。」漢什見魚已烤熟時提醒著巧晴。
「係咩......咁可以開餐嚕！」
巧晴見串起烤的魚已被烤熟變金黃色時，有點興奮地說道。
接下來，巧晴和漢什就用了漢什他預先所採集準備的大樹葉作為碟，各自把已被樹枝串起烤好的魚整串放在這些樹葉上準備享用。
「我唔客氣啦！」
之後，兩人就像進食串燒般來吃用剛剛烤好，熱騰騰而香脆可口的烤魚。
「都幾香脆好食喎！」巧晴一路進食時也讚不絕口。
「睇嚟今次燒得啱啱好呢。」漢什亦在品味著。
「話時話，點解你對呢啲野外生火和煮食方面，睇落好似好熟悉咁？」巧晴突然有點好奇想得知。
「因為我哋鍊金術士有時可能要去啲去偏遠嘅地方採集稀有而珍貴嘅材料，有時一出去就好幾日都會喺野外，所以野外生火保暖或就地搵食材去煮食充飢都係鍊金術士必然嘅技術嚟。」
「咁鍊金術士咪要識好多嘢喎......連冒險家嘅能力都會識。」巧晴有點敬佩地說著。
「嗯......但其實你都可以直接同啲冒險者或寶物商人去買啲珍貴材料嘅，但可能會非常貴而且有機會喺劣等品質嘅材料......甚至係假貨，所以親自採集係比較好嘅。」
「但咁樣有時咪會好危險囉。」巧晴有點擔憂地說道。
「嗯......咁要做一名優秀嘅鍊金術士，就遇咗要冒險採集最珍貴嘅材料，再鍊成最優秀嘅成品出嚟。」
「原來係咁......所以唔怪之得我當初想學鍊金術時，你會想勸退我啦。」巧晴感到恍然大悟地說道。
「但我之後都會盡力去教你鍊金術，而你同我一齊去採集時，就算遇到乜危險都好，我都會第一時間保護你！所以你唔需要可怕。」漢什向巧晴作承諾。
「唔該哂你啊……之後就繼續拜托你喇……」巧晴感到害羞地輕聲說著。
之後，漢什和巧晴亦繼續進食這些美味的烤魚，亦食得津津有味，同時他們兩人之間亦會有講有笑，整體上一片輕鬆郊遊的氣氛。
但是，漢什和巧晴也未有察覺到，在附近的森林內，卻有一隻擁有多對觸手的魔獸，從較遠處盯上了漢什及巧晴，並蓄勢待發準備蠢蠢郁動，看來是被漢什在野外的生火火源所吸引......