風之鍊金術士譚:與異世界女高中生之邂逅: 第17章: 咖啡店收集到的傳聞
第17章: 咖啡店收集到的傳聞
在走出了鎮政廳後，巧晴出於好奇再從裙袋中掏出，剛才先放在裙袋內的鍊金助手證件。
「咦......咁奇怪嘅？」巧晴望著時突然認為有些不妥。
「係咩事啊？」
「就係證上面所屬國家嗰部份點解唔係寫波莫利亞公國......而係顯示為奧蘭特王國嘅？佢係咩嘢地方嚟㗎？」巧晴憑自己的感覺指出。
「我冇同你講㖭......其實我哋而家所屬嘅國家就係奧蘭特王國裡面，所以你一登記咗個出生地做塔洛夫後，自動將你嘅所屬國家選做奧蘭特王國都係好平常嘅。」
「原來呢度係奧蘭特王國裡面......咁你之前提過嘅波莫利亞公國又係乜嘢嚟？你之前一開始同我介紹呢個鎮喺邊個國家嗰陣，又淨係講出波莫利亞公國，完全冇提過啲乜嘢奧蘭特王國㗎？」巧晴以求真的心態追問。
「既然你咁想知道......我就不妨講埋俾你聽啦......」
之後，漢什就開始向巧晴說，原來波莫利亞是塔洛夫所屬的地區名，是位於澤羅爾大陸中部的內陸區域，嚴格來說是奧蘭特王國的一部分。
至於““波莫利亞公國””，它是奧蘭特王國的其中一個領地的名，主要範圍為剛才他所說的波莫利亞地區，而領地則是由奧蘭特王國國王賜封當地貴族為公爵所管理地方的稱呼。
但一般來說，這地區的居民在向外人說自己所在的國家時，一般只會說波莫利亞公國，絕少會說奧蘭特王國。
「咁我明白啦......睇落咪好似歐洲中世紀啲封建制咁囉，以前初中西史老師都有講過吓。」
巧晴以在過去讀書時的知識領略到漢什所描述的制度，因為它的確與巧晴現實中，過去歐洲的封建制度出乎意料地十分類似。
「嗯......順帶一提啊......頭先個職員提及嘅維利茲，其實係奧蘭特王國嘅王都嚟嘅。」漢什另向巧晴繼續補充道。
接下來，漢什見時間尚早，於是向巧晴提議不如到艾絲卡及羅傑他們的咖啡店喝下咖啡打發時間，而巧晴亦表示同意。
在一進入了咖啡店後，漢什居然在此巧遇到米蘭，他獨自坐在靠牆壁的一張三人餐桌中，同時米蘭亦覺察到他們兩人，於是也示意大家可以坐在一起。
故此，在巧晴和漢什亦樂意地同意後，就一同在米蘭所在的三人餐桌中分別在其餘的兩個位坐下。
「今日咁啱嘅米蘭？」漢什坐下後先行向米蘭作問侯。
「因為今日我休假，所以咪嚟呢度消磨吓時間......點知就咁啱撞到你同巧晴小姐。」米蘭說出今日會在這間咖啡店的因由。
「嗯......你好啊卡明斯基先生。」巧晴亦在禮貌上對米蘭打了招呼。
「你好啊巧晴小姐。」
「你要嘅黑咖啡及鬆餅。」
「唔該。」
就在此時，作為咖啡店內侍應的艾絲卡亦走了過來，把米蘭之前所叫的餐點及黑咖啡端上桌給米蘭享用。
「咦？原來漢什你同巧晴都嚟咗啊。」
同時艾絲卡也察覺到漢什和巧晴也在此，而更驚奇的是，他們可組成一個““嬲””的三人居然會坐在一枱。
「你好啊艾絲卡，好耐冇見啦。」巧晴率先主動回應艾絲卡的友善問好。
「嗯......巧晴最近過成點啊，同漢什進展成點啊？」艾絲卡亦順道關心一下巧晴目前和漢什的關係。
「乜嘢進展啊......我同佢最多只算係普通朋友關係，艾絲卡你又亂講啦！」巧晴當場變得紅著臉澄清。
「同伴？嘿嘿......睇嚟唔簡單喎......」
「其實巧晴而家係我嘅鍊金助手。」漢什及時為巧晴對艾絲卡解釋道。
「嘿嘿......原來係咁......睇嚟要繼續觀察會好啲啦。」
「艾絲卡真係啊......」
「好啦，唔講呢個住啦，你哋兩個想叫啲咩啊？順便依家同你哋落單啊。」
「照上次啦。」漢什對艾絲卡說著。
「我都係。」
聽到漢什和巧晴這樣說後，艾絲卡就為他們兩人寫單寫上了上次其光顧時所叫的飲料及食物。
「喂……咁巧晴小姐你而家同漢什住有冇咩嘢大問題啊？始終都算係孤男寡女共處一室呢……」
在米蘭開始先行用餐後不久，他突然主動關心著巧晴的近況。
這是因為，在上次米蘭來訪工房時，他也從中得知漢什和巧晴現時同居的事實，於是在今日巧遇到他們時，也不自覺關心一下巧晴現時和漢什這個異性同居的近況。
「多謝關心啦……漢什佢對我好好，而且我依家咁做咗佢嘅鍊金助手，開始跟漢什學習鍊金術。」
「真係㗎？」米蘭對此感到有些意外。
「冇錯啊，我同巧晴今日出嚟就係要去鎮政廳度，同佢做我鍊金助手嘅註冊登記嘅，之後見時間尚早就過嚟咖啡店呢度坐下。」
「嗯。」
「而且我發現巧晴係幾有鍊金術嘅潛質同天份呢。」漢什在米蘭面前稱讚巧晴一番。
「唔好咁讚我啦......我只係照我能力去學習啫。」巧晴頓時感到受寵若驚而紅著臉。
「咁要好好加油啦！而且漢什你都要教好巧晴小姐啊，等佢可以好似你咁成為一個國家認可嘅鍊金術士。」米蘭鼓勵著漢什和巧晴。
「嗯......明白！」
在過了不久後，艾絲卡亦到來把漢什和巧晴點的食物和熱飲端上......
「巧晴漢什你哋要嘅三文治、熱嘅奶茶溝咖啡同熱奶茶。」
「唔該！」巧晴和漢什異口同聲對艾絲卡道謝。
「請慢用。」
「咁我唔客氣啦！」
之後，巧晴和漢什他們兩人亦開始享用艾絲卡端上的茶點及飲品。
與此同時，在巧晴他們進餐的期間，坐在隔壁枱的兩位各帶著佩劍，一身冒險者裝束的男子正在談論著一些事情……
「喂，你知唔知聽聞塔洛夫南面嘅森林深處，嗰一帶近期有一隻兇惡嘅魔獸，頻繁咁出沒喎。」冒險者A對同桌的另一位冒險者說著。
「好似係啊……聽講係一隻陸八爪魔獸嚟，聽人講番會對路過嘅人施襲，甚至直接殺死之後食掉。」冒險者B感到有些毛骨悚然地說著。
「咁即係最後屁骨無存？」冒險者A追問。
「係啊……所以盡量都繞過呢個森林行會好啲啊……」
「隔離嗰枱......好似話......乜嘢有魔獸？」
漢什無意中聽到其隔壁枱兩名冒險者的對話，因而引起了他們的注意。
「喂……其實我有啲問題想問你㗎！」
「係咩嘢事啊艾絲卡？」
此時，艾絲卡突然的叫喚把漢什的注意力帶回來，因而沒再進一步認真打聽到這兩名冒險者之後的對話。
「你究竟係咪同巧晴佢係同居㗎？」艾絲卡以仿佛已知般的話氣問漢什。
「吓……邊有啊。」漢什嘗試否認。
「咪呃我啦……巧晴依家係你助手，而你哋兩個仲同住喺漢什你自己嘅鍊金工房㖭。」
艾絲卡表示自己已看穿巧晴現時為漢什的鍊金助手及為同居的事實。
「點解你會知道哂嘅？」漢什驚訝向艾絲卡反問道。
「因為我係由啲客人嘅交談中，打聽到你間鍊金工房請咗個黑色長髮，外形可愛嘅妹妹做助手，於是我就聯想到應該係巧晴你啦，而漢什你就係唔知邊到搵巧晴去做你鍊金助手......係咪？」
艾絲卡直接把漢什說得啞口無言……
「唉……你啲情報都幾靈通嗰喎。」漢什只能苦笑而對艾絲卡默認她說的話。
「洗咩講！」艾絲卡得意洋洋回道。
「但點解會咁㗎？而且巧晴係咩嘢人嚟？」
「其實......」漢什和巧晴頓時感到有口難言般。
「因為......其實上次你同巧晴一齊嚟咖啡店嗰陣，我已經感覺到巧晴唔係一般人嚟㗎喇......」
「點解嘅......我有咩嘢問題啊？」被艾絲卡這樣一說的巧晴不禁反問道。
「因為我見你當時嘅依著同你本身嘅外表都同我哋呢度嘅人有唔少分別，加上我之前都冇打聽到漢什想請個鍊金助手嘅先兆底下，你就突如其來咁做咗漢什佢嘅同伴。」敏銳的艾絲卡一針見血地指出巧晴令自己在意的點。
「冇錯啊......其實我初初見到巧晴小姐時，我都有差唔多嘅諗法㗎，但唔太好意思講啫……」米蘭亦附和道。
「唉......果然我個樣同嗰陣時嘅純香港學生妹衣著，真係好難唔引起人注意嘅......」巧晴因而嘆氣著。
接著，巧晴已經難以對艾絲卡再作解釋後，內心作了一個決定。
「艾絲卡……雖然我講完之後你可能會感到難以置信，就算係我親身體會到嘅時候都係咁諗，但其實我本身……」
之後，巧晴就對米蘭及艾絲卡說出自己是從另一個世界來的事實。之後漢什亦補充著自己的鍊金調合意外而誤把巧晴帶來這個世界的事。
「原來巧晴你係經歷過啲咁嘅事㗎，即係你本身係嚟來異世界裡面一個叫香港嘅地方，的確令人好難相信啊……」艾絲卡對此感到有些愕然。
「艾絲卡你會有咁嘅反應都正常嘅......我當初知道自己被穿越到呢個世界時，我都係唔敢相信仲認為自己發緊夢，醒番就會冇事......但點知都係......」
「唉......但漢什你又真係冒失嘅......點解會犯上將假材料當真材料用都有嘅......」米蘭亦不禁搖頭嘆息著。
「對唔住啊。」
「咁你知道事實同短期內都返唔到去後，你會唔會好黝漢什佢㗎？雖然唔係有心，但漢什始終係令你現時被迫流落呢個世界嘅罪魁禍首喎。」艾絲卡一針見血地問。
「坦白講......我最初從漢什知道係因為佢自己嘅失誤而令我嚟到呢到時，都忍唔住失控咁鬧咗漢什一餐，甚至到第二日從蘇菲亞口中我可能要消耗起碼十年以上嘅時間先返到去嗰陣，我甚本忍唔住出手打漢什，以及狂言唔想再見到佢㖭......」
巧晴回想起被傳送這個世界頭一至二日的事情時，難免感到一些百感交集。
「但睇倒你依家同漢什同住兼做堆佢助手，我諗你同漢什佢應該算係和好如初啦啩？」艾絲卡繼續問巧晴。
「咪亂講......其實我到依家都仲未完全原諒到漢什㗎。」巧晴帶有點硬朗地回應。
「巧晴......」漢什此刻仍然感到有些對不住巧晴。
「不過我都諗通咗㗎啦！」
「而且呢......既然唔發生都發生咗嚕，淨係一味指責漢什都無補於事㗎啦，不如一齊合作諗方法搵出可以施展返回原世界魔法嘅方法仲好啦！」巧晴額達地表示已釋懷並樂觀面對。
「咁唔通呢個就係你會做漢什嘅鍊金助手嘅原因？」艾絲卡對巧晴提問道。
「冇錯，而且我仲跟緊漢什學鍊金術㖭。」巧晴展露微笑回應。
「巧晴......你好堅強啊。」艾絲卡忍不住稱讚了巧晴。
「或者因為經歷過一啲事後......成個人都會變得容易堅強咗......」巧晴意味深長回應。
「嗯......或者真係咁都唔定啦......」艾絲卡回應巧晴的看法。
「但我相信既然你有方法嚟到我哋呢個世界，就一定會有辦法可以返去嘅，所以你要加油唔可以灰心啊！我同羅傑都會支持你㗎。」艾絲卡拍了巧晴的膊頭以示支持她。
「我都會㗎。」米蘭和漢什亦表示同樣會支持巧晴。
「好多謝你哋啊！」巧晴感激著。
之後，由於艾絲卡突然又被羅傑呼喚去拿已製作好的飲料端上結另桌的客人，於是只能結束與巧晴之間的對話先行離開。
其後，巧晴他們餘下三人在享用完他們的餐點及飲料，並在此坐了一會時間後，也決定結帳離開......
而在臨離開前，巧晴亦不忘再次當面感謝著艾絲卡及米蘭今日對她的關心，之後巧晴亦在互相道別後照常跟隨漢什回到工房......