風之鍊金術士譚:與異世界女高中生之邂逅: 第16章: 真正成為鍊金助手？
第16章: 真正成為鍊金助手？
就在漢什他們完成鍊製退燒用藥水緊急委託的翌日，漢什和巧晴亦繼續鍊金工房的經營日常，包括看店及不時檢查一下工房內的設施等......
在此期間，漢什突然配起一件重要的事，並知道這是與巧晴有關的。
「巧晴！」
「咩嘢事啊？突然咁急嘅語氣叫我嘅？」巧晴對漢什突如其來的叫喚感到奇怪。
「其實係咁啊......雖然你依家已經算係我助手......但我幾日嚟都唔記得咗幫你向鍊金術協會嗰度註冊啊......」漢什如實說出。
「吓！助手都要註冊嘅咩？」而巧晴感到有些不明覺厲。
「唔洗咁緊張......你聽我解釋先，其實呢......就算唔註冊你都可以照做我助手，只要我意願係想你做就可以，至於點解要想同你註冊返係因為......」
此時，漢什首先開始對巧晴說出，原來由於漢什是擁有整個澤羅爾大陸所認可的鍊金術士執照，所以除了可以有權進入一些高級鍊金素材專店以及會被一般人使為精英之外，最重要的是還可以每月均會收到一定數量的鍊金術士津貼。
「咁好㗎原來......每個月咩都唔洗做就有錢收！」巧晴聽到後也不禁無比羨慕。
「係啊，因為始終澤羅爾大陸上嘅大多數國家都希望發展鍊金術，所以大多願意出錢津貼我哋鍊金術士嘅平時工作研究同生活嘅。」
「分分鐘仲筍過我哋嘅公務員啊......」巧晴在心中自嘲來比喻著。
「但你知唔知個鍊金術士執照幾難考先得㗎！合格率平均一半都唔知有冇啊......」漢什認為巧晴這樣的羨慕是顯得非常天真及想得太簡單。
「果然係有代價......照常理都估到㗎啦......」巧晴對此亦不算意外。
「不過咁樣又同登記我做你鍊金助手有咩嘢關係啊？」巧晴仍然感到不解地追問道。
「當然有關係啦，係因為......」
之後，漢什就表示，原來根據鍊金術協會的規定，任何一名的鍊金術士只要自己認為有需要的話，都可以請為數最少一名的鍊金助手，而這個助手的人選是完全由鍊金術士本人選定的。
而且，只要將其人選向鍊金術協會作註冊備案，就可以額外再得到大約半份鍊金術士津貼的金額來作補助，但每個鍊金術士同一時間只可以得到一份聘任鍊金助手的補助，而鍊金助手註冊其實並非必要親身到鍊金術協會總部進行，可以在自己居住地的市或鎮政廳進行也可。
「原來係咁......即係都係想借我過橋......係咪？」巧晴對漢什提出質疑。
「你又唔好講到咁難聽啦......我都係想要多啲資金，從而有多啲資源快啲幫你研究出幫你返去原本世界嘅方法啫。」漢什嘗試說服巧晴。
「咁啊.....就聽你講啦......」
巧晴想一想後亦同意，看來她心中的首要目標仍是希望盡快找到方法回家，而漢什亦成功捉到巧晴的心理來說服了她。
「不過有樣嘢我有啲興趣想知㗎......就係你講嘅鍊金術協會其實係咩嘢嚟？」巧晴感到興趣而問道。
「鍊金術協會係一個主要負責管理或認可鍊金術士嘅組織，主要委員通常係由啲德高望重或者有地位嘅鍊金術士所擔位，亦會負責每一隔一排就會舉辦鍊金術士資格考試，嚟篩選出有足夠實力來頒發俾佢哋鍊金術士執照咁囉。」漢什約莫說明。
「咁咪即係好似會計師公會咁囉。」巧晴即時聯想到自己認知中認為性質相似的事物。
「你哋世界會計師要考牌嘅咩？」漢什對此表示有些詭異及奇怪。
「你哋世界唔係嘅咩？」
「因為我哋世界雖然都有會計師呢樣嘢，但識計數記帳就可以做㗎啦，只係一個普通到唔普通嘅職業。」漢什順道說出他們世界對““會計師””這職業的概念。
「咁我哋本身屬於兩個世界，所以同名嘅事物會各有唔同意思都好正常嘅。」巧晴嘗試去圓一圓這個情況。
接著，漢什見原來又不知不覺地因和巧晴談天而又耗費一段時間，於是就事不宜遲在和巧晴各自穿上了外出的衣著後，就一同出門到位於城區中，塔洛夫的鎮政廳為巧晴進行鍊金助手的註冊登記。
在步行了一段時間後，兩人亦到達了鎮中心的廣場，而塔洛夫的鎮政廳就是坐落在這裡。
之後，漢什就帶著巧晴在一棟不算大，外表典雅的大理石造建築，其兩旁有一些的大理石柱裝潢的大門前停下來。
「就係呢度啦。」漢什對巧晴指出道。
「呢度就係鍊金術協會？」
「唔係......只不過塔洛夫嘅鎮政廳啫。」漢什搖頭否認並作解釋。
「鎮政廳？唔係應該直接去鍊金術協會度註冊先啱咩？」
「如果只係註冊登記鍊金助手嘅話，鎮政廳都可以做㗎，佢哋會幫手將你嘅註冊轉寄到鍊金術協會度㗎。」漢什對巧晴解釋著。
「但直接親自搵鍊金協會搞唔係會好啲咩？」巧晴似有道理地問道。
「因為鍊金協會最近嘅分部都要去到布拉諾啊，離塔洛夫好遠㗎，就算坐馬車最快都要至少大半日。」
「原來要去咁遠先有㗎......唉......咁就算啦」
巧晴亦只能無奈地妥協，因為她現時也未太想遠行。
接著，漢什就帶住巧晴進入鎮政廳內，他們一開門就進了大廳，這裡有一個類似於接待處的地方，有兩至三名職員站在這裡當值。
之後，兩人亦二話不說地直接走到了這個““接待處””的面前......
「你好啊，呢位先生小姐，有咩嘢可以幫到你呢？」接待處一名女職員見漢什巧晴兩人來到時照慣例先問道。
同時，巧晴亦留意到在女職員的身後的牆壁掛住一幅大的地圖，從其右上角的文字所顯示的應該是澤羅爾大陸的地圖，亦見到這份大陸是分有不同有大有小的國家，其中一個在大陸中部的一個大國卻是特別以深色所顯示，看來這個就是這裡現時所在國家的位置。
「你好......我係鍊金術士，今日嚟呢度係為咗幫我啱啱請到嘅鍊金助手登記註冊㗎。」漢什如實說出他要作的事。
「個助手係跟你嚟嗰個女仔？」女職員老練地看出漢什的一些想法。
「冇錯！」
聽到了漢什的答覆後，女職員立即熟練地用在桌上的一部近似打字機的機器，在一張紙上打著字。
「居然會有打字機呢啲算係近代嘅嘢......有啲估唔到喎。」巧晴見住女職員居然是用打字機工作時也感到驚訝。
「冇問題，咁呢位小姐請你填好呢份表格先啊。」
在一會之後，女職員把剛剛準備好的，一份以草紙所造的表格連同一枝筆一同遞交給巧晴去填寫。
「要填表㗎？」
「因為要交去俾鍊金術協會，佢哋需要有每名鍊金術士嘅助手資料去備案。」女職員解答了巧晴的疑問。
「放心啦......填資料只係走一走程序啫，只要有我同意嘅話，基本上協會都唔會點理我揀嘅助手人選。」漢什亦在旁幫忙釋除巧晴的少許疑慮。
「咁我就信你哋啦。」
接著，漢什就先帶巧晴到大廳內的一個角落的小桌子前，而巧晴亦選擇在這裡專心填好這份表格。
「估唔到異世界都有填form咁現代嘅嘢㗎喎。」巧晴一路看著表格上的內容一路說著。
之後，巧晴就開始嘗試根據申請表上的項目去填寫相應的資料，幸好表格中所用的字眼也是較為淺白的，巧晴雖然只是學了閱讀這個世界的文字一段極短時間，但都可以看得懂裡面大部份的字句。
「主要都係填個姓名、出生日期同出生地......」
「咦？出生日期？」
巧晴在這欄不知應如何處理，因為她並不知道這個世界的曆法。
「做咩事巧晴？」
「漢什，我想問吓今年係幾多年啊？因為我唔知你哋世界嘅曆法啊。」巧晴為此向漢什詢問道。
「係喎......呢方面冇同你講過㖭，今年係澤羅爾曆1771年......」
同時，漢什亦順略一下這個世界的曆法，卻巧合地得知這個世界一年的日數和月份數基本與地球的一樣......
「既然差唔多嘅話，咁我就將你哋世界嘅年份減十六，再配上我本身嘅生日日期當作我出生日期。」
巧晴得到結論後就以此為依據填寫著有關出生日期這欄，即她在這個世界的出生年份變為澤羅爾曆1755年。
然後，巧晴亦繼續填好表格上剩餘的欄目，至於在出生地點的部份，她選擇接受漢什的建議，並未有把出生地直接填作““香港””，以防止引起會負責過目表格及鍊金術協會人士的騷動，因為始終““香港””對這裡的人來說是一個完全不為所知及難以向其說明的地方。
於是，在考慮了一會及在漢什的提議後，巧晴把出生地方跟隨漢什，寫作波莫利亞塔洛夫就算。
另一方面，在姓名方面，她直接以自己本身的洋名「Snow」加在原有的名字的後面，至於姓氏則仍然是填了原有的「凌」姓，但當然是用這個世界的字母所拼寫。
最後，巧晴以自己所理解把表格上的所需資料填好後，亦有把其給漢什幫手過目，以防萬一當中出現甩漏情況。
「你寫個名後面個「Snow」係咩嚟？」漢什對巧晴所寫的洋名感到有些困惑。
「係我香港嗰陣時嘅另一個小名，係英文名嚟，意思係雪。」巧晴對此作解釋。
「英文？」
「係我哋世界裡面最主要嘅語言，以我出生嘅香港為例，除咗本身會用嘅廣東話之外，讀書嗰陣都要學埋英文......兼會起一個英文名，雙語並用喺香港好平時㗎。」巧晴詳細說明。
「原來係咁。」
「不過我又諗一諗過......咁樣寫會唔會有問題㗎？定係寫返““巧晴””算呢？」
「冇所謂，兩樣都可以，反正佢哋本身都唔知你本身嘅名㗎啦。」
「咁就兩個並用啦！」
接著，在漢什檢查完表格上的其他地方並均確定無誤後，就回到剛才的櫃台交給之前交予表格給巧晴的同一位女職員。
而女職員收到了填好的表格後，也循例看一看這份表格，之後對漢什及巧晴點點頭表示應該沒甚麼問題。
「凌小姐，若果冇問題嘅話我就將啲資料交去鍊金術協會㗎啦。」
「嗯。」
「好啦，咁樣你再等我一陣先啦，而家同你即場整張證俾你。」
之後，該名女職員就先帶住這張表格進入身後右方的一房間內……
「呢到嘅張““證””係點㗎？」巧晴此時有些好奇而向漢什問道。
「一張可以防水，寫哂你名、嚟自嘅地方以及所從屬鍊金術士嘅卡片。」
「防水卡片？點做到㗎？」巧晴目瞪口呆問道。
「用鍊金魔法咪可以囉。」漢什感到習以為常地說著。
「又係鍊金魔法......睇嚟呢個世界嘅魔法都幾萬能嗰喎。」
在等候了約半小時後，該名女職員再次回到櫃台前，並把一張已刻好了資料的卡片交給巧晴，並要她先行過目。
「呢張係你張鍊金助手卡片，睇一睇吓有冇問題。」
「嗯。」巧晴從該名女職員手中接下了卡片。
在看了一看後，巧晴對該名女職員表示應該沒有太大問題。
「至於你今日提交嘅資料，我會用魔鴿盡快將佢傳信到維利茲嘅鍊金術協會總部嗰度㗎啦。」該名女職員最後補充道。
「魔鴿係？」巧晴就此對在身旁的漢什問道。
「一種被我哋呢度人類馴養嘅鴿子魔獸，智慧高到識認路同理解人類指令，而且鳥腳亦算有力，所以主要用嚟傳遞信件嘅。」漢什約莫般說明。
「即係飛鴿傳書囉。」巧晴一聽漢什這樣說就大概明白。
最後，漢什和巧晴見所有手續均完成，而巧晴的鍊金助手登記證也到手後，在不忘對櫃台負責的女職員表示感謝後亦離開鎮政廳......